ಕಾರ್ಕಳ: ಕಾರ್ಕಳ ನಗರ ಪೊಲೀಸ್ ಠಾಣೆಯಲ್ಲಿ ಅವಹೇಳನಕಾರಿ ಫ್ಲೆಕ್ಸ್ ಅಳವಡಿಕೆಯ ಕುರಿತು ದೂರು ದಾಖಲಾಗಿದ್ದು ಅದೇನೆಂದರೆ ಸಾಣೂರಿನ ಮುರತಂಗಡಿ ಸಮೀಪ ಪ್ರಶಾಂತ್ ಕ್ಯಾಶು ಫ್ಯಾಕ್ಟರಿ ಬಳಿ ಇರುವ ಹಳೆ ಶೆಡ್ನಲ್ಲಿ ಫ್ಲೆಕ್ಸ್ ಒಂದನ್ನು ಅಳವಡಿಸಿದ್ದು ಅದರಲ್ಲಿ “ಹಿಂದೂ ಹೆಣ್ಣು ಮಕ್ಕಳ ತಂಟೆಗೆ ಮೈಮುಟ್ಟಲು ಬಂದ ಪೋರ್ಕಿ ಮುಂಡು ಬ್ಯಾರಿಗಳೇ, ಹುಷಾರ್” ಎಂದು ಬರೆದು ಅದರ ಕೆಳಗೆ ಇಂಗ್ಲಿಷ್ನಲ್ಲಿ ‘one of the freedom fighter’ (one of the department) ಎಂದು ಬರೆದು ಯುವಕನೊಬ್ಬನ ಭಾವಚಿತ್ರವನ್ನು ಹಾಕಿ ಅಳವಡಿಸಲಾಗಿತ್ತು.
ಇದು ಉದ್ದೇಶಪೂರ್ವಕವಾಗಿ ಒಂದು ವರ್ಗವನ್ನು ಅಥವಾ ಸಮುದಾಯವನ್ನು ಪ್ರಚೋದಿಸಲು ಅಳವಡಿಸಿರುವ ಫ್ಲೆಕ್ಸ್ ನಂತೆ ಕಂಡುಬಂದಿದ್ದು ಅನುಮತಿ ಪಡೆಯದೆ ಅಳವಡಿಸಿರುವ ಸತೀಶ್ ಎಂಬ ವ್ಯಕ್ತಿ ಹಾಗೂ ಆತನಿಗೆ ಫ್ಲೆಕ್ಸ್ ಮುದ್ರಿಸಿ ಕೊಟ್ಟವರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಬೇಕೆಂದು ಪಿಡಿಓ ಮಧು ಎಂಸಿ ಕಾರ್ಕಳ ನಗರ ಪೊಲೀಸ್ ಠಾಣಾಧಿಕಾರಿಗಳಿಗೆ ಮನವಿ ಮಾಡಿದ್ದಾರೆ.
ಇದಲ್ಲದೆ ಸ್ಥಳೀಯರಿಂದಲೂ ಕೂಡ ಫ್ಲಕ್ಸ್ ವಿರುದ್ಧ ಆಕ್ರೋಶ ವ್ಯಕ್ತವಾಗಿದ್ದು ಮುರತಂಗಡಿ ಪರಿಸರದಲ್ಲಿ ಯಾವುದೇ ಅಹಿತಕರ ಘಟನೆ ನಡೆಯದಿದ್ದರೂ ಉದ್ದೇಶಪೂರ್ವಕವಾಗಿ ಪ್ರಚೋದಿಸುವ ಸಲುವಾಗಿ ಫ್ಲಕ್ಸ್ ಅಳವಡಿಸಲಾಗಿದೆ. ಶಾಂತಿ ಕದಡುವ ಉದ್ದೇಶದಿಂದ ಈ ಕೃತ್ಯ ಎಸಗಿರುವವರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಬೇಕೆಂದು ಒತ್ತಾಯಿಸಿದ್ದಾರೆ.
