ಬೆಂಗಳೂರು: ಬೆಂಗಳೂರಿನ 90ಕ್ಕೂ ಹೆಚ್ಚು ಆಸ್ಪತ್ರೆ ಮತ್ತು ಕ್ಲಿನಿಕ್ಗಳಿಗೆ ಶಂಕಿತ ನಕಲಿ ಹಾಗೂ ತಪ್ಪು ಲೇಬಲ್ ಹೊಂದಿರುವ ಔಷಧಗಳು ಪೂರೈಕೆಯಾಗಿರುವುದು ಎಸ್ಐಟಿ ತನಿಖೆಯಲ್ಲಿ ಬೆಳಕಿಗೆ ಬಂದಿದೆ. ಹೆಚ್ಚಿನ ಬೇಡಿಕೆಯ ಫೈಜರ್ ಉತ್ಪನ್ನಗಳ ನಕಲಿ ಆವೃತ್ತಿಗಳು, ಕ್ಯಾನ್ಸರ್ ಔಷಧಗಳು ಹಾಗೂ ಐಸಿಯು ಇಂಜೆಕ್ಷನ್ಗಳು ಇದರಲ್ಲಿ ಸೇರಿವೆ ಎನ್ನಲಾಗಿದೆ.
ಈ ಔಷಧಗಳನ್ನು ಶೇ.50ರವರೆಗೆ ರಿಯಾಯಿತಿ ದರದಲ್ಲಿ ಮಾರಾಟ ಮಾಡಲಾಗುತ್ತಿತ್ತು ಎಂದು ತನಿಖಾಧಿಕಾರಿಗಳು ತಿಳಿಸಿದ್ದಾರೆ. 15ಕ್ಕೂ ಹೆಚ್ಚು ಮೆಡಿಕಲ್ ರೆಪ್ರಸೆಂಟೇಟಿವ್ಗಳನ್ನು ಒಳಗೊಂಡ ಜಾಲದ ಸುಳಿವು ಸಿಕ್ಕಿದ್ದು, ಔಷಧಗಳ ಪೂರೈಕೆ ಮಹಾರಾಷ್ಟ್ರ ಮತ್ತು ಗುಜರಾತ್ಗೂ ವಿಸ್ತರಿಸಿರುವ ಸಾಧ್ಯತೆ ಇದೆ.
ಆಸ್ಪತ್ರೆಗಳಿಗೆ ತಲುಪಿದ ಬಳಿಕ ಈ ಔಷಧಗಳನ್ನು ರೋಗಿಗಳಿಗೆ ನೀಡಲಾಗಿತ್ತೇ ಎಂಬುದು ಈಗ ಪ್ರಮುಖ ಪ್ರಶ್ನೆಯಾಗಿದೆ. ಬ್ಯಾಚ್ ನಂಬರ್, ತಯಾರಕರ ದಾಖಲೆ ಹಾಗೂ ಔಷಧಗಳ ಮೂಲವನ್ನು ಆಸ್ಪತ್ರೆಗಳು ಪರಿಶೀಲಿಸಿದ್ದವೇ ಎಂಬ ಬಗ್ಗೆಯೂ ತನಿಖೆ ನಡೆಯಬೇಕಿದೆ.
ಇದೇ ವೇಳೆ, ಕ್ಯಾನ್ಸರ್ ಔಷಧಗಳ ಅಕ್ರಮ ವ್ಯಾಪಾರದ ಪ್ರಕರಣಗಳು ದೆಹಲಿ ಹಾಗೂ ರಾಜಸ್ಥಾನದಲ್ಲೂ ವರದಿಯಾಗಿವೆ. ಆಗಸ್ಟ್ನಲ್ಲಿ ದೆಹಲಿ ಪೊಲೀಸರು ಅಂತಾರಾಜ್ಯ ಜಾಲವೊಂದನ್ನು ಭೇದಿಸಿ 17 ಮಂದಿಯನ್ನು ಬಂಧಿಸಿದ್ದರು. ಕದ್ದ ಹಾಗೂ ನಕಲಿ ಕ್ಯಾನ್ಸರ್ ಔಷಧಗಳ ಮಾರಾಟದಲ್ಲಿ ಈ ಜಾಲ ತೊಡಗಿತ್ತು ಎಂದು ಆರೋಪಿಸಲಾಗಿದೆ.
ರಾಜಸ್ಥಾನದಲ್ಲೂ ಸರ್ಕಾರಿ ಪೂರೈಕೆ ವ್ಯವಸ್ಥೆ ಹಾಗೂ ಬಿಕಾನೇರ್ನ ಸರ್ಕಾರಿ ಆಸ್ಪತ್ರೆಯೊಂದಕ್ಕೆ ಸಂಬಂಧಿಸಿದ ಕ್ಯಾನ್ಸರ್ ಔಷಧಗಳ ವಯಲ್ಗಳ ಕುರಿತು ಪ್ರಶ್ನೆಗಳು ಎದ್ದಿವೆ. ಆಸ್ಪತ್ರೆ ತನ್ನ ಪಾತ್ರವನ್ನು ನಿರಾಕರಿಸಿದ್ದು, ಈ ಹಿನ್ನೆಲೆಯಲ್ಲಿ ರಾಜ್ಯ ಸರ್ಕಾರ ಔಷಧ ಪೂರೈಕೆ ವ್ಯವಸ್ಥೆ ಪರಿಶೀಲನೆಗೆ ಆದೇಶಿಸಿದೆ.
ಬೆಂಗಳೂರು, ದೆಹಲಿ ಮತ್ತು ರಾಜಸ್ಥಾನದ ಬೆಳವಣಿಗೆಗಳು ಔಷಧಗಳ ಸಂಪೂರ್ಣ ಪೂರೈಕೆ ಸರಪಳಿ ಮೇಲ್ವಿಚಾರಣೆಯ ಅಗತ್ಯವನ್ನು ತೋರಿಸಿವೆ. ದೇಶದಲ್ಲಿ 10,000ಕ್ಕೂ ಹೆಚ್ಚು ಔಷಧ ತಯಾರಿಕಾ ಘಟಕಗಳು ಹಾಗೂ ಸುಮಾರು 10 ಲಕ್ಷ ಮೆಡಿಕಲ್ ಶಾಪ್ಗಳಿರುವುದರಿಂದ ನಿಗಾ ವಹಿಸುವುದು ದೊಡ್ಡ ಸವಾಲಾಗಿದೆ.
