ಚೇತನ್ ವರ್ಕಾಡಿ
ತುಳು ಕಥೆ
ಅಲೆ ಮೋನೆ ತೂದು ರಗುಗು ಎಕ್ಕಂದೆಲ್ ಎಚ್ಚಿಗೆ ಆಂಡ್.ಉಂದು ಎಂಚಿನ ಕತೆ,ಒಂಜಿ ಸರಿಯಾನಗ ಕುಡೊಂಜಿ ಬೇನೆ ಉಂಡಾವೊಂದುಂಡು.ಸಂಪತ್ ರಗುನ ಮೋನೆನೇ ತೂಯೆ,ಆಯನ ಮೋನೆಡ್ ಅಪ್ಪೆ ತೋಜಂದಿ ಬೇನೆದ ಗೀರ್ ಕನನೀರಾದ್ ಜತ್ತೊಂದುಂಡು.ರಗು ಜಾನಕಿಡ ಪಾತೆರ ದುಂಬರಿತೆ.ಅತ್ಯ ಜಾನಕಿ ಸುಮತಿ ಓಲ್ಲಲ್ಯ..?ಈ ದಾನೆ ಪೊಟ್ಟಿಲೆಕ ಉಂತೋಂದ ಪಾತೆರ್ಯೆರಾಪುಜ ನಿಕ್ಕ್ ಪಂಡ್ದ್ ದಟ್ಟಿತ್ ಕೇನ್ನಗ,ಜಾನಕಿನ ಪಾತೆರ ಪಿದಡ್ಂಡ್.ಯಾನ್ ಪೋವೊರ್ಚೀಂದ್ ಆತ್ ಪನ್ನಗಲ ಈರ್ನ ಪಿರವುಡೆ ಮಗನ್ ನಾಡೊಂದು ಬೈದಲ್ಯೇಂದ್ ಪಂಡಲ್.ರಗುಗು ದಾನೆ ಮಲ್ಪೊಡೂಂದೆ ಆಯಿಜಿ.ಆಯನ ಇಲ್ಲ್ ಇತ್ತಿನ ಜಾಗ್ ಆತೊಂಜಿ ಸುಕೊತ ಜಾಗತ್ತ್,ಆಯೆನೆ ಜೂವೊನು ಕೈಟ್ ಪತೊಂದು ಬದ್ಕುನಾಯೆ.ಸಾದಿದ ಗುರ್ತನೇ ಇಜ್ಜಾಂದಿನ ಸುಮತಿ ಆ ಕಾಡಬರಿಟ್ ವೊಯ್ಟೆ ಪೋತಲಾ ದಾನ್ನಾಂದ್ ಕುಡ ಎತೆ ಪತ್ಯೆರೆ ಸುರುಮಲ್ತೆ,ಸಂತೋಸುಡು ಬತ್ತಿನ ಸಂಪತ್ನ ಕಣ್ಣ್ಡ್ಲ ನೀರ್ ತೋರೊಡು ಜಪ್ಪೆರುಂತುಂಡು.ಆಯನ ಮೈಟ್ ಆಯಿ ಗಾಯೊರ್ದು ಎಚ್ಚಿಗೆ ಬೇನೆ ಇತ್ತೆ ಅಪ್ಪೆ ತೋಜ್ಜಲ್ ಪನ್ಪಿನ ಬೇನೆನೆ ನೆಗತ್ ನೆಗತ್ ತೋಜಾವೊಂದುಂಡು.ರಗು ಪೋದು ಜಗಲಿಡ್ ಕುಲೋಂಡೆ,ಸಂಪತ್ನ್ಲ ಆಯನೊಟ್ಟು ಕುಲ್ಲಾವೊಂದು ಸಮದಾನ ಮಲ್ತೊಂಡೆ.ಸಂಪತ್ ಅಪ್ಪೆನ್ ತೂವಂದೆ ಸಮದಾನೊಗು ಬಗ್ಗೊಂದಿಜ್ಜೆ.ಮಿನ್ಕು ಬತ್ತ್ದ್ ಅಮ್ಮೆರ್ನ ಜಕ್ಕೆಲ್ಡ್ ಕುಲೋಂದು ಗೊಬ್ಯೆರುಂತ್ಯಲ್.ಎಲ್ಯ ಪ್ರಾಯದ ಬಾಲೆಗ್ ಈತ್ ಮಲ್ಲ ಕತೆತ ಉಲಮದೆತ ಎತೆನೇ ತೆರಿಯಂದ್,ಆಲ್ ಗೊಬ್ಬೊಂದುಪ್ಪುನಗ ಪೋ ಮಗಾಂದ್ ಜೋರು ಮಲ್ತೆ ರಗು,ಏಪಲ ನೆರಂದಿ ಅಮ್ಮೆರ್ನ ದಟಿಪುದ ಪಾತೆರ ಕೇಂಡ್ದ್ ಬಾಲೆ ಅಪ್ಪೆನಡೆ ಪಾರ್ಯಲ್.ಆಯನ ಮಂಡೆನಿಲೀಕೆ ಸುಮತಿ ಓಲ್ಲಲೂಂದ್ ಮುರ್ಕುದಿತ್ತ್ಂಡ್.ರಗು ತರೆಕ್ ಕೈದೀವೊಂದು ನನ ವೋಡೆ ನಾಡ್ಯೆರೆ ಪೋಪುನೇಂದ್ ಅಲಚನೆಡುಪ್ಪುನಗನೆ ಜಾಲಕೋಂಟುಡು ಸುಮತಿ ಮೆಲಾನೆ ನಡತೊಂದು ಬರೊಂದುಲ್ಲಲ್.ರಗುಗು ಅಲೆನ್ ತೂದು ಸಂತೋಸುಡು ದಾಲ ಬಲ್ಲಿ,ತೆರೆಕಂತ ಪಾಡ್ನ ಸಂಪತ್ಗ್ ಅಪ್ಪೆನ್ ತೋಜಾಯೆ,ಅಲೆನ್ ತೂಪಿನೇ ಅರೆಜೂವಡಿತ್ತಿ ಸಂಪತ್ ದಿಡ್ಕ ಲಕ್ಕ್ದ್ಲ ಪಾರೊಂದು ಪೋದು ಅಪ್ಪೆನ್ ಅರಾದ್ ಪತ್ಯೆ,ಒರೋನೆ ಬುಲ್ತೆ.ಆ ರಡ್ಡ್ ಜೂವ ಕುಡ ಒಂಜಾನಗ ತೋಜಿ ಸಂತೋಸು ನು ತೂದು ರಗುನ ಕಣ್ಣ್ ಜಿಂಜಿಂಡ್.ಸುಮತಿಡ ಓಡೆಪೋಯ ದಾನೆಂದ್ ಕೇಂಡ್ದ್ ಕುಡ ಬೇಜಾರ್ ಮಲ್ಪೆರೆ ಆಯಗ್ ಮನಸಿಜ್ಜಾಂಡ್,ಅಪ್ಪೆ ಮಗನ್ ಲೆತೋಂದು ಉಲಯಿ ಪೋಯೆ.ಮಾತೆರೊಟ್ಟುಗು ಸೇರ್ದ್ ಸಂತೋಸುಡು ಬಂಜಿಗಟ್ಟಿ ಮಲ್ತೆರ್.ಐರ್ದ್ ಬೊಕ್ಕ ರಗು ಸಂಪತ್ನ್ ಆಸೊತ್ರೆಗ್ ಲೆತೊಂದು ಪೋದು ಮರ್ದ್ ಕುರ್ದಿದ ಸೇಕ ಕೊರ್ಪಾಯೆ.ರಡ್ಡ್ ದಿನ ಅಪ್ಪೆ ಮಗೆ ಅಲ್ಪನೇ ಇತ್ತೆರ್,ಸೊಂತ ಪಲಯರ್ದ್ ಎಚ್ಚಿಗೆ ಮೋಕೆದ ಗಂತ್ಗೆತ್ತಾಯಿ ರಗುನ ಮೋಕೆಜೋಕೆ ತೂದು, ಈ ಕುಚ್ಚನೆದ ಜನೊಕುಲೆ ನಡುಟು ತನ್ನ ರಚ್ಚನೆಗ್ಲ ಒರಿ ಪಲಯೆ ಉಲ್ಲೆ ಪನ್ಪಿ ಕೊಸಿಟ್,ಆ ಇಲ್ಲಡ್ ಸಂತೋಸುಡು ರಡ್ಡ್ ದಿನ ಕರಿಯಲ್ ಸುಮತಿ.ಅಪಗನೇ ಆಲೊಂಜಿ ನಿಗಂಟ್ ಮಲ್ತಲ್…?
