✍️ ಚೇತನ್.ವರ್ಕಾಡಿ..
💫 ತುಳು ಕಥೆ
ತಗೆನ ಜಾಗ್ ಕೊರಿ ಮೋಕೆದ ಪಲಯನ ಸಮ್ಮಂದೊದ ಕೊಂಡಿ ಒರಿಯೊಡೂಂದಾಂಡ ಪೊರ್ತು ಬನ್ನಗ ಮಿನ್ಕುನು ತನ್ನಿಲ್ಲದ ಮರ್ಮಲ್ ಮಲ್ತ್ ಅಲೆನ್ ಮಗಲ್ನೆರ್ದ್ ಎಚ್ಚಿಗೆ ಮೋಕೆಡ್ ತೂವೊಂದು ಪಲಯನ ಈ ರುನೊನು ಬೂಟೊಡೂಂದ್ ಎನ್ಯಲ್.ರಡ್ಡ್ ಇಲ್ಲದ ಸಮ್ಮಂದ ಏಪೊಗುಲ ಅಲಿಯಂದೆ ಒರಿಯೊಡನ್ಪಿ ಆಸೆ ಅಲ್ನವಾದಿತ್ತ್ಂಡ್.ರಡ್ಡ್ ದಿನ ಇಲ್ಲಡ್ ಇತ್ತಿನ ಸುಮತಿಡ ಮಿನ್ಕುಗ್ಲ ಎಡ್ಡೆ ಪತ್ತ್ದ್ ಪೋದಿತ್ತ್ಂಡ್.ಬಾಲೆಕೊಂಡಾಟದ ಬಾಯಿಡಾಲ್ ಮಾಮಿ ಮಾಮಿ ಪನ್ನಗನೆ ಸುಮತಿನ ಮನಸ್ ದಿಂಜಿದಿತ್ತ್ಂಡ್.ರಗು ರಡ್ಡ್ ದಿನ ಎಚ್ಚಿಗೆ ಕುಲ್ಲುದು ಪೋವೊಲಿ ಪಂಡಲ,ಸುಮತಿ ಒತ್ತೊಂಜಲ್,ನನ ಬರೋಂದುಪ್ವೆ ಎನ್ನ ಪಲಯನ ಇಲ್ಲಗ್ ಪಂಡ್ದ್ ಅಲ್ತ್ ಪಿದಡ್ನಲೆನ್,ರಗುವೇ ಅರ್ದ ಸಾದಿ ಮುಟ್ಟ ಎತ್ತಾಯೆ.ಸುಮತಿಗ್ ಸಂಪತ್ನ್ ಎಡೇನ ಕಲ್ಪಾವೊಡು ಪನ್ಪಿ ಆಸೆ ಇತ್ತ್ಂಡ್.ಐಕಾದೆ ಎಚ್ಚಿಗೆ ರಜೆ ದೆತ್ತ್ಂಡ ತಾನ್ ಬೆನೊಂತಿ ಬೀಜದ ಕಂಪೆನಿದಕ್ಲ್ ಬೇಲೆರ್ದ್ ದೆತ್ತೆರ್ಂಡ ಮಗನ್ ಕಲ್ಪಾಯೆರೆ ಸಾದಿ ಇಜ್ಜಿ ಪಂಡ್ದೇ ರಗು ವೊತ್ತಾಯ ಮಲ್ತ್ಂಡಲ ಅಲ್ತ್ ಬೇಗನೇ ಪಿದಡ್ಯಲ್.
ದಿನೊಕುಲು ಕರಿಂಡ್ ತಗೆತಂಗಡಿನ ಮೋಕೆದ ಜೋಕೆ ಏರ್ ಎರ್ತೆಡ್ ಏರೊಂದೇ ಇತ್ತ್ಂಡ್.ಮೋಕೆ ಜೋಕೆಡ್ ಪಾರೊಂದೇ ಇತ್ತ್ಂಡ್.ಪೋಪಿ ಬರ್ಪಿ ಸಮ್ಮಂದೊದ ಪುಡಿ ಗಟ್ಟಿಯಾವೊಂದೇ ಪೋಂಡು.ದಿನೊಕೊಲು ಕರಿಂಡ್ ವೊರ್ಸೊಲು ಕರಿಂಡ್,ಸಂಪತ್ ಕಲ್ತ್ದ್ ಎಡ್ಡೆ ಕಂಪೆನಿ ಬೇಲೆಗ್ಲ ಸೇರೊಂಡೆ.ಮಿನ್ಕುಲ ಕೋಲೇಜ್ ಡ್ ಅಕೇರಿದ ವೊರ್ಸ ಕಲ್ತೊಂದುಲ್ಲಲ್.ಸುಮತಿನ ಉಡಲ್ಡ್ ಆನಿ ತೆಗ್ಲ್ನ ಆಸೆ ಇನಿಮುಟ್ಟಲ ಉಡಲ್ಡೇ ದೆಂಗ್ದ್ ಉಂಡು ಅತ್ತಾಂದೆ,ಸಂಪತ್ಗಾವಡ್,ರಗುಗಾವಡ್ ತತ್ತ್ದ್ಲ ಪಂಡಿನಾಲ್ ಆಲತ್ತ್.ಮಗನ ಕಲ್ತ್ದಾದ್ ಆಯೆ ಒಂಜಿ ನಿಲೆ ಎತ್ತಿಬೊಕ್ಕ ಪನೊಡೂಂದ್ ಕಾತೊಂದಿತ್ತಲ್.ಇತ್ತೆ ಮಗೆ ಒಂಜಿ ಎಡ್ಡೆ ಬೇಲೆಗ್ ಎತ್ತ್ದೆ,ತನ್ನ ಕಾರ್ಡ್ ತಾನ್ ಉಂತುದೆ.ಸಂಪತ್ಗ್ ಅಪ್ಪೆ ಪಂಡ ಬಾರಿ ಮೋಕೆ ಏಪಲ ಅಲೆ ಮಟ್ಟೆಲ್ಗ್ ತರೆದೀದ್ ಒಂಜಾತ್ ಪೊರ್ತು ಬಾಲೆದಲ್ಕ ಜೆತೋಂದು ಮೋಕೆಪಟ್ಟುನ ಕಟ್ಟ್ನ್ ಇನಿಕ್ಲ ಒರಿತೊಂದು ಬತ್ತಿನ ಅಲೆನ ಮೋಕೆದ ಬಾಲೆ ಆಯೆ.ಆನಿಲ ಅಪ್ಪೆನ ಮಟ್ಟೆಲ್ಡ್ ತರೆದೀದ್ ಜೆತೋಂದುಪ್ಪುನಗ ಅಪ್ಪೆ ಮಗನ ತರೆಪೂಜಿದ್ ಬಾಲೆಡೊಂಜಿ ಇಸಯ ಪನ್ಪಲ್.ಅಪ್ಪೆನ ಪಾತೆರ ಕೇಂಡಿ ಸಾತ್ಗ್ ಮಟ್ಟೆಲ್ಗ್ ತರೆದೀನಾಯೆ ದಿಡ್ಕ ಲಕ್ಯೆ..
