ಕಟ್ಟ(11)
ಚೇತನ್ ವರ್ಕಾಡಿ
ತ್ಯಾಂಪಣ್ಣೆ‌ಲ ತಿಮ್ಮಪ್ಪಣ್ಣೆಲ ರಡ್ಡ್ ಆನ್ ಜೋಕುಲು ಅಕ್ಲೆ ಅಮ್ಮೆರೆಗ್.ಊರುನೇ ಜೋಕುಲ್ಲೆಕ ತೂವೊಂತಿನ ದರ್ಮೊದ ನಡಕೆ ಆರ್ನವು.ಬಡವೂಂದ್ ಬತ್ತಿನಾಯಗ ಒಂಜಿ ಪುಂಡಿ ಉನ್ಪು,ಕಸ್ಟಾಂದ್ ಬತ್ತಿನಾಯಗ್ ಕೈಟಾಪಿ ಸಾಯೊನು ಮಲ್ತೊಂದು ಬತ್ತಿನಾರ್ ಆರ್.ತ್ಯಾಂಪಣ್ಣನ ಅಮ್ಮೆರ್ಲ ಆ ಊರುಡು ದರ್ಮಾತ್ಮೆ ಆದ್ ಬದ್ಕ್ ಬೆಂದಿನಾರ್ ,ಆರ್ನ ಕಾಲ ಕರಿಬೊಕ್ಕ ಕಡೀರ ಮಗೆ ಆಯಿನ ತ್ಯಾಂಪಣ್ಣಗ್ ನ್ಯಾಯೊದ ಕಟ್ಟೆಡ್ ಕುಲ್ಲುನ ಜಬದಾರಿಕೆದ ಬೇಲೆನ್ ಕೊರ್ದು ಆರ್ ಈ ಲೋಕರ್ದ್ ಮದೆಯಾದಿತ್ತೆರ್.ಅಮ್ಮೆರ್ ಈ ಬೇಲೆನ್ ಪಲಯಗ್ ಕೊರ್ಯೆರ್ ಎಂಕ್ ಕೊರ್ಜೆರತ ಪನ್ಪಿ ಬೆಂಗ್‌ಡ್ ಆನಿರ್ದ್ ತಿಮ್ಮಪ್ಪಣ್ಣೆ,ಪಲಯಡ ಆತೆಕಾತೆಟೆ ಇತ್ತೆರ್.ಎದುಗಾತೆ ಎಡ್ಡೆಡಿತ್ತ್‌ದ್ ಪಿರವುಡು ನಂಜಿ ಕಾರೊಂತೆರ್.ತಿಮ್ಮಪ್ಪಣ್ಣನ ಬೊಡೆದಿ ಕಸ್ತೂರಿ ಅಕ್ಕೆ ಕಂಡನಿಯನ್ ಏಪಲ ಈ ಇಸಯೊಡು ಎಲ್ಯ ಮಲ್ತ್ ಪಾತೆರುನವೇ ಆರೆಗ್ ಪಲಯಡ ಪಗೆ ಎಚ್ಚಿಗೆ ಆಯೆರೆ ಕಾರಣ ಆಂಡ್.ಸೀದೊಡು ಪೋಂಡ ಮೆಗ್ಯೆನೇ ಪಲಯನ್ ಇಂಚ ಮಲ್ತೆ ಅತ ಪಂಡ್ದ್ ಊರೇ ಆರ್ನ ಮೋನೆಗೇ ಉಬ್ಯುಂಡು ಪನ್ಪಿ ,ಇಸಯ ಆರೆಗ್ ತೆರಿದಿತ್ತ್ಂಡ್,ಐಕ್ ಬೋಡಾದೆ ಮೂರ್ತ ದೀದ್ ಕಾತೊಂದಿತ್ತಿ‌ನಾರೆಗ್,ಮಾದವೆ ಮಂಗಲೆಕ ಕಣ್ಣರುಕು ತಿಕ್‌ದ್ ಬೂರ್ಯೆ.ಎಂತೂ ತ್ಯಾಂಪಣ್ಣಡ ದುಂಬೇ ಪಗೆ ಬೂರ್ದಿತ್ತಿ ಮಾದವನ ಇಸಯ ತಿಮ್ಮಪ್ಪಣ್ಣಗ್ ತೆರಿದಿತ್ತ್ಂಡ್,ಕೈಕ್ ತಿಕಿನ ಬಲ್ಲ್‌ನ್ ಆರ್ನಡೆಗೇ ವೊಯ್ತೆರ್. ನೇಕ್ ಆಯೆನೇ ಸಮ ಪಂಡ್ದ್,ಮಾದವನ ಬೆರಿಟುಂತುದು ಮುಲ್ಲೆ ಪೂಜ್ಯೆರ್.ಮೀಸೆ ಮಾದವನ ಮೀಸೆಲ ಮಿತ್ತರ ಪೋಂಡು.ತಿರ್ತ್ ಮಿತ್ತ್ ತೂವಂದೆ ಈ ಬೇಲೆಗ್ ವೊತ್ತೊಂಡೆ ಮಾದವೆ.ಆಂಡ ತಾನೇ ತೋಡುನ ಗುವೆಲ್ಡ್ ಕಡೇಕ್ಲ ಬೂರ್ನೇ ಮಾದವೆನೇ..
ತಿಮ್ಮಪ್ಪಣ್ಣೆ ಸಾದಿಯೇ ನಡತೊಂದು ಪೋವೊಂದುಪ್ಪುನಗ ಮಾದವೆ ಓಲಿತ್ತೆನಾ ಗೊತ್ತಿಜ್ಜಿ,ಪಾರ್ ಬತ್ತ್‌ದ್ ಆರೆನೆದುರು ಉಂತೋಂಡೆ. ಗೋಪಾಲನ್ ಕೆರ್ನಿ ಯಾನ್ ಗೋಪಾಲನ್ ಕೆರ್ನಿ ಯಾನ್ ಪಂಡ್ದ್ ಆರ್ನ ಸುತ್ತ ತಿರ್ಗೆರೆ ಸುರುಮಲ್ತೆ.ಪರಿದಿನ ಬನ್ಯಾನ್ ,ಮೋನೆದಿಂಜಿನ ಗಡ್ಡ,ಪರ್ಕಟೆ ಚಡ್ಡಿಡ್ ಎಂಚನಾ ಇತ್ತಿನ ಗೋಪಾಲೆ ಎಂಚನಾ ಆದ್ ಪಂಡ್ ಕೊರ್ನಾರೆನೆ ಎದುರ್ಡೇ ಮರ್ಲೆ ಆದ್ ಬಿಂಗಿರಿ ಕಟ್ಟೊಂತೆ.ಎಂಚಿ ಸಾವ್‌ಯ ಪೋಯ ಮುಲ್ತು ಪಂಡ್ದ್ ದೆತ್ತ್ ಪುಡ್ತು ನೂಕುನಗ ಮಾದವೆ ಪೋದು ಬರಿಕ್ ಬೂರ್ಯೆ.ಗೋಪಾಲನ್ ಕೆರ್ಪಾಯಿನಿ ಈಯೆ,ಗೋಪಾಲನ್ ಕೆರ್ಪಾಯಿನಿ ಈಯೆ ಪಂಡ್ದ್ ಬೂರ್ನಲ್ತ್ ಪಾತೆರ ತಿರ್ಗಾಯಿನ ಮಾದವನ್ ತೂದು ತಿಮ್ಮಪ್ಪಣ್ಣಗ್ ತಿಗಲೆ ಜೋರ್ ಪುಡಯೆರೆ ಸುರುವಾಂಡ್, ಜೊಲ್ಲೆ ಅರಿತೊಂದು ಗೇನದಾಂತಿನ ಗೇನೊಡ್ಲ ತೆಕ್ಕಂದಿ ಸತ್ಯೊನು ಪನ್ನಗ,ತತ್ತ್‌ದ್ಲ ಏರೆಗಾಂಡಲ ಈ ಇಸಯ ತೆರಿಂಡ ,ಈತೊರ್ಸ ಕಾತೊಂದು ಬತ್ತಿನ ಮರ್ಯಾದಿ ಮಣ್ಣ್‌ದಡಿಕ್ ಬೂರ್ ಪನ್ಪಿ ಪೋಡಿಗೆ ಎಚ್ಚಿಗೆ ಆಂಡ್.ತಿಮ್ಮಪ್ಪಣ್ಣೆ ಎನ್ನಿನ ಒಂಜಾಂಡ ಅಲ್ಪ ಆವೊಂದುಪ್ಪುನ ಕುಡೊಂಜಿ, ಅವ್ವೇ ಪೊರ್ತುಗು ತ್ಯಾಂಪಣ್ಣೆ‌ಲ ಅವ್ವೇ ಸಾದಿಯೇ ಬರೊಡಾ..
ದುಂಬರಿಯುಂಡು…
