ಕಟ್ಟ (6)
ಚೇತನ್ ವರ್ಕಾಡಿ
ದಂಕ್‌ದ್ ಬೂರ್ಯೆರಾನಗ ತಿಕ್ಕಿ ಲಾಬೊನು ದಕ್ಕಯೆ ಪನ್ಪಿಲೆಕ ಮೀಸೆ ಮಾದವೆ ಪಾರ್ ಬತ್ತ್‌ದ್‌ಲ, ಬೂರಂದಿಲೆಕ ಪತೊಂಡೆ,ದುಂಬೇ ಉಮಿತುಲಯಿತ್ತಿ ಗೆಂಡದಲ್ಕ ಗುಮುಲೊಂದಿತ್ತಿ ಕಲ್ಯಾಣಿ,ಪತ್ತಿನೆನ್ ತೂದು ಆಯನ ಕೆಬಿತಂಡೆಗ್ ಆಕ್ಯಲ್.ಉಪಕಾರ ಮಲ್ಪೆರೆ ಪೋಯಿನಾಯಗ್ ಉಪದ್ರ ಮಲ್ಪೆರೆ‌ನೇ ಬತ್ತಿ ಅಜನೆ ಮೋಲೆಗ್ ದಾನ್ನ ಗೊತ್ತಾಂಡ ಪನ್ಪಿಲೆಕ ಅಡೇಗೆ ಮನಿಮಂಬು ಇಜ್ಜಾಂದೆ ದಾಲ ಗೊತ್ತಿಜ್ಜಂದಿಲೆಕ ಉಂತೋಂಡೆ.ದಾಯೆಗ್ಯ ಇಡೆ ಬೈದ ನನ ಮೇರೆನ್ ಪಜ್ಜಿ ತಿನ್ಯೆರುಂಡ..?ಅತ್ತ್ ಎನನ್ ತಿನ್ಯೆರುಂಡ, ನಿನ್ನ ಪಗೆಕ್ ಎನ್ನ ಇಲ್ಲದ ಪುಗೆ ತೂಯತಯಾ..? ಬಂಗಾರ್‌ದಂಚಿನ ದನಿಕುಲ್ನ ಮಿತ್ತ್ ಅಪವಾದ ಪಾಡ್ದ್ ಆರೆನ್ ಕರ್ಪಿಲ್ಲ್‌‌ಗ್ ಪಾಡ್ಯ ಅತಯ..?ದೇವೆರ್ ನನಲ ನಿನನ್ ದೀತೆರತಾ..? ನಿನನ್ ದಾಯೆ ನನಲ ಕೊನೊತುಜೆರ್, ತೂ…ಎನ್ನ ಕಂಡನಿಯನ ಪುನತ ಮೋನೆ ತೂಪುನ ಯೋಗ್ಯತೆ‌ಲ ನಿಕ್ಕಿಜ್ಜಿ ಪಂಡ್ದ್ ಪನ್ನಗ,ಮಾದವೆ ಬತ್ತಿ ಸಾದಿಗ್ ಪಲ ಇಜ್ಜಿ ಪನ್ಪಿಲೆಕ ಮೆತ್ತನೆ ಆಯೆ.ಅತ್ತ್ ಕಲ್ಯಾಣಿ ನಿನ್ನ ಕಂಡನಿಯಗ್ ಮಲ್ಪೊಡಾಯಿ ಆಸೊತ್ರೆದ ಬೇಲೆ ಪೂರ ಮುಗಿತ್‌ದ್ ಇಲ್ಲಗ್ ಎತ್ತಾಯಿನೆಕ್ ಎಂಕೇ ಸೆಲ್ಲೇನತ್ತ..? ಗೋಪಾಲನ್ ಗೋಲಿದ ಮರಟ್ ನೇಲಾಯಿ ತ್ಯಾಂಪಣ್ಣೆ ನಿಕ್ಕ್ ದೇವೆರತಯ..? ದಾಲ ಮಲ್ಪಂದಿಲೆಕ ಮಾದವೆ ಸಾದಿ ತಿರ್ಗನಗ,ಇತ್ತೆ ಒಂಜೊಂಜೆಕ್ ಅಂದಜಾವೊಂದುಂಡು ಉಂದು ತ್ಯಾಂಪಣ್ಣನ ಬೇಲೆ ಅತ್ತ್ ಉಂಬ್ಯನವೇಂದ್.ಕಲ್ಯಾಣಿ ಚದಿ ಬುಡ್ಜಲ್,ಮಾದವನ್ ಪುನತ ಕೈತಡೆ ಮೆದ್ಕೆರೆ ಬುಡ್ಜಲ್,ಆಯೆ ಪೋಯಿನೆಟ ಪುನನ್ ದುಂಬು ಕೊನೊಯೆರೆಲ ಬುಡ್ಜಲ್.ಬತ್ತಿ ಸಾದಿಗ್ ಬಿಲೆ ಇಜ್ಜಿ,ಪೊರ್ತು ಕರಿಂಡ ಮರ್ಯಾದಿಲ ಒರಿಪುಜೀಂದ್ ಅಂದಾಜಾನಗ ಅಲ್ತ್ ಸೀದ ಪಿರಮಗುರ್ಯೆ..ಪುನ ಅಲ್ತ್ ದುಂಬು ಪೋಂಡು.
ಕಲ್ಯಾಣಿನ ಅರಬಾಯಿದ ನಡುಟುಲ ಗೋಪಾಲನ್ ಮಾಡರಿಟ್ ಮೀಪಾದ್ ಮದ್ಮಾಯಲೆಕ ದುತ್ತೈತ ಪಾಡ್ಪಾದ್ ಎಡ್ಡೆಂತಿನಾಯೆ ಸೊರ್ಗೊಗೇ ಪೋಲ ಪಂಡ್ದ್ ಮಾತೆರ್ಲ ಕಡೇತ ನೀರ್ ದೊಂಡೆಗ್ ಮೈತ್ ಕಾಟೊಡು ಜೆಪುಡಾದ್ ಕಡಪುಡ್ದು ಕೊರ್ಯೆರ್.ಮಾತೆರ್ ಕೊರಿ ಮೋಕೆದ ಕೋರದ ಕುಂಟುನು ಪೊದೆತೊಂದು ,ಕಡೇತ ನೀರ್‌ನ್ ನಿಂಗೊಂದು ಕುಡ ತಿರ್ಗ್ ತೂವಂದೆ ಬೊನ್ಯ ಆದ್ ಪೋಯೆ. ಮೋಕೆದ ಬೊಡೆದಿನ್ ಬುಡ್ದು ಗೋಪಾಲೆ ಈ ಲೋಕ ಬುಡ್ದು ಪರಲೋಕ ಸಂದ್ಯೆ.ಕಂಡನಿಯನ ನೆಂಪುರ್ದ್ ಜಪ್ಪೆರಾವಂದಿ ಕಲ್ಯಾಣಿ ಕನನೀರ್ಡ್ ಬೊದುಲು ಬೊದುಲ್ದು ಅಸ್ಕ್‌ಯಲ್,ಆಜಿದ್ ಪೋಯಲ್.
ದಿನೊಕುಲು ಕರಿಂಡ್ ಏರ್ ಏತ್ ಪುನೆಂಡಲಾ ಮೀಸೆ ಮಾದವನ ಉಲ್ಟ ಗೊಬ್ಬುಲೆನ ನಡುಟು ತ್ಯಾಂಪಣ್ಣನ್ ಪಿದಯಿ ಕೊನಯೆರೆನೇ ಆಯಿಜಿ.ತಿಕ್ಕಿ ಸಾಕ್ಷಿ ಪೂರ ತ್ಯಾಂಪಣ್ಣಗ್ ಉಲ್ಟ ಆಪಿಲೆಕಾನೆ ಮಾದವೆ ತಯಾರ್ ಮಲ್ತೊಂತೆ.ತ್ಯಾಂಪಣ್ಣಗ್ ಮೂಜಿ ಅರ್ವತ್ತಲ್ಲು ಇತ್ತ್‌ದ್ಲ ಆರೆನ್ ಪಿದಯಿ ಕೊನಯೆರೆ ಏರೆಗ್ಲ ಆಯಿಜತಾ ಪಂಡ್ದ್ ಪಾರ್ವತಿಯಕ್ಕ ದಿನದಿನ ಕನನೀರ್ ಜಪುಡಾಯೆರ್.ಇಂಚಿಡ್ ಗೋಪಾಲನ ಕಿರ್ಯ ಸುದ್ದ ಪೂರ ಮುಗಿದ್ ಬಿನ್ನೆರ್ ಬಿರಿದ್ ನನ ಆ ಇಲ್ಲಡ್ ಕಲ್ಯಾಣಿ ಒರ್ತಿಯೇ ಪನ್ಪಿಲೆಕ ದಿನದೆಪ್ಪುಲೆಕಾಂಡ್.ನೇನೆ ಕಾತೊಂದಿತ್ತಿ ಮಾದವೆ ,ಕಲ್ಯಾಣಿನೊರ ತನ್ನಾಲ್ ಮಲ್ಪೊಡೂಂದ್ ಪನ್ಪಿ ಅಂಗ್‌ಆಸೆನ್ ಗಟ್ಟಿ ಮಲ್ತೊಂಡೆ.ಒಂಜಿ ದಿನ ನಡು ಮದ್ಯಾನದ ಪೊರ್ತು ಅವ್,ಕಲ್ಯಾಣಿ ಪೇಂಟೆಗ್ ಪೋಯಿನಾಲ್ ಅವ್ವೇ ಸಾದಿಯೆ ಬತ್ತ್‌ದ್ ಗೋಲಿದ ಮರತಾಡೆ ಎತ್ತ್‌ದಲಾತೆ,ದೊಂಬುದ ಪೆಟ್ಟ್‌ಗ್ ಆಲೆಗ್ ಅಡೇಗೆ ತರೆತಿರ್ಗ್‌ಲೆಕಾಂಡ್ ಪಂಡ್ದ್,ಕಟ್ಟೆಡ್ ಕುಲ್ಲುದು ಪನೀ ಅಂಚಿ ಎರಗೊಡೂಂದಾಂಡ…?
ದುಂಬರಿಯುಂಡು
