ಬೆಂಗಳೂರು: ಕರ್ನಾಟಕದಲ್ಲಿ ಅಕ್ಕಿ ಬೆಲೆ ಮತ್ತೊಮ್ಮೆ ಏರಿಕೆಯಾಗಿದ್ದು, ಗ್ರಾಹಕರಿಗೆ ಹೆಚ್ಚುವರಿ ಹೊರೆ ಎದುರಾಗಿದೆ. ಸೆಪ್ಟೆಂಬರ್ನಲ್ಲಿ ಎರಡನೇ ಬಾರಿಗೆ ದರ ಹೆಚ್ಚಳವಾಗಿದ್ದು, ಕಳೆದ ಒಂದು ವಾರದಿಂದ ಬೆಲೆ ಏರಿಕೆ ಮುಂದುವರಿದಿದೆ.
ಕೋಲಂ ಅಕ್ಕಿ ಕೆಜಿಗೆ ₹ 75ರಿಂದ ₹ 100ಕ್ಕೆ ಏರಿಕೆಯಾಗಿದೆ. ಸೋನಾಮಸೂರಿ ಅಕ್ಕಿ ₹ 68ರಿಂದ ₹ 82ಕ್ಕೆ ಹೆಚ್ಚಳವಾಗಿದ್ದು, ಇತರ ಹಲವು ವಿಧದ ಅಕ್ಕಿಗಳ ದರದಲ್ಲೂ ಏರಿಕೆ ಕಂಡುಬಂದಿದೆ.
ಅಕ್ಕಿ ಇಳುವರಿ ನಿರೀಕ್ಷಿತ ಮಟ್ಟದಲ್ಲಿ ಇಲ್ಲದಿರುವುದೇ ಬೆಲೆ ಏರಿಕೆಗೆ ಪ್ರಮುಖ ಕಾರಣ ಎಂದು ವರ್ತಕರು ತಿಳಿಸಿದ್ದಾರೆ. ಸೆ.15ರಂದು ಕೂಡ ಸಾಮಾನ್ಯ ಅಕ್ಕಿ ಕೆಜಿಗೆ ₹ 5ರಿಂದ ₹ 10 ಹಾಗೂ ಗುಣಮಟ್ಟದ ಅಕ್ಕಿಗೆ ₹ 10ರಿಂದ ₹ 20ರಷ್ಟು ದರ ಹೆಚ್ಚಳವಾಗಿತ್ತು.
ಮಳೆ ಕೊರತೆ ಹಾಗೂ ನೀರಿನ ಅಭಾವದಿಂದ ಬೆಳೆಗಳು ಸಮರ್ಪಕವಾಗಿ ಕಟಾವಿಗೆ ಬಾರದಿರುವುದು ದರ ಏರಿಕೆಗೆ ಕಾರಣವಾಗಿದೆ. ಮುಂದಿನ ದಿನಗಳಲ್ಲಿ ಅಕ್ಕಿ ಬೆಲೆ ಮತ್ತಷ್ಟು ಹೆಚ್ಚಾಗುವ ಆತಂಕವೂ ವ್ಯಕ್ತವಾಗಿದೆ.
ಪ್ರಮುಖ ದರಗಳು:
ಕೋಲಂ: ₹ 75 → ₹ 100
ಸೋನಾಮಸೂರಿ: ₹ 68 → ₹ 82
ಜೀರಾ ಸಾಂಬ: ₹ 180 → ₹ 200
ಸ್ಟೀಮ್ ಅಕ್ಕಿ: ₹ 68 → ₹ 75
