ನವದೆಹಲಿ: ತನ್ನ ಮೇಲೆ ಲೈಂಗಿಕ ದೌರ್ಜನ್ಯ ನಡೆಸಿದ ವ್ಯಕ್ತಿ ಜೀವನಪೂರ್ತಿ ಜೈಲಿನಲ್ಲೇ ಇರಬೇಕು ಎಂದು 10 ವರ್ಷದ ಬಾಲಕಿ ನೀಡಿದ್ದ ಮನವಿಗೆ ದೆಹಲಿ ನ್ಯಾಯಾಲಯ ಸ್ಪಂದಿಸಿದೆ. ರೋಹಿಣಿಯ ಪೊಕ್ಸೊ ವಿಶೇಷ ನ್ಯಾಯಾಲಯದ ಹೆಚ್ಚುವರಿ ಸೆಷನ್ಸ್ ನ್ಯಾಯಾಧೀಶೆ ರಾಜನಿ ರಂಗಾ ಅವರು ತೀರ್ಪಿನ ಕೊನೆಯಲ್ಲಿ ಬಾಲಕಿಯನ್ನು ನೇರವಾಗಿ ಉದ್ದೇಶಿಸಿ ಭಾವುಕ ಸಂದೇಶ ಬರೆದಿದ್ದಾರೆ.
‘ಅಂಕಲ್ ವಯಸ್ಸಾಗುವವರೆಗೂ ಜೈಲಿನಲ್ಲೇ ಇರಲಿ’ ಎಂದು ಬಾಲಕಿ ನ್ಯಾಯಾಲಯದಲ್ಲಿ ಹೇಳಿದ್ದಳು. ಇದಕ್ಕೆ ಪ್ರತಿಕ್ರಿಯಿಸಿದ ನ್ಯಾಯಾಧೀಶೆ, ಆಕೆಯ ಮಾತನ್ನು ನ್ಯಾಯಾಲಯ ಆಲಿಸಿದೆ ಮತ್ತು ಆರೋಪಿ ತನ್ನ ಉಳಿದ ಜೀವನವನ್ನು ಜೈಲಿನಲ್ಲೇ ಕಳೆಯಲಿದ್ದಾನೆ ಎಂದು ತಿಳಿಸಿದ್ದಾರೆ.
ಬಾಲಕಿಯ ಧೈರ್ಯವನ್ನು ಶ್ಲಾಘಿಸಿದ ನ್ಯಾಯಾಧೀಶೆ, ಆಕೆ ಸತ್ಯವನ್ನು ಹೇಳುವ ಮೂಲಕ ಮತ್ತೊಬ್ಬ ಮಗುವಿಗೆ ಹಾನಿಯಾಗುವುದನ್ನು ತಡೆದಿದ್ದಾಳೆ ಎಂದು ಸಂದೇಶದಲ್ಲಿ ಹೇಳಿದ್ದಾರೆ. ‘ಈಗ ನೀನು ನಿನ್ನ ಜೀವನವನ್ನು ನಡೆಸು, ಶಾಲೆಗೆ ಹೋಗು, ಸ್ನೇಹಿತರನ್ನು ಮಾಡಿಕೋ, ನಗು, ಆಡು ಮತ್ತು ಕನಸು ಕಾಣು’ ಎಂದು ಹುರಿದುಂಬಿಸಿದ್ದಾರೆ.
ಈ ಸಂದೇಶವನ್ನು ‘ಧೈರ್ಯದ ಸಂದೇಶ’ ಎಂದು ದೆಹಲಿ ಹೈಕೋರ್ಟ್ ಬಣ್ಣಿಸಿದೆ. ಸೆ. 22ರಂದು ಪ್ರಕರಣದ ವಿಚಾರಣೆ ನಡೆಸಿದ ನ್ಯಾಯಮೂರ್ತಿಗಳಾದ ಪ್ರತಿಬಾ ಎಂ. ಸಿಂಗ್ ಮತ್ತು ದಿನೇಶ್ ಭಟ್ ಅವರ ಪೀಠ, ಎರಡು ವಾರಗಳೊಳಗೆ ಸಂದೇಶವನ್ನು ಬಾಲಕಿ ಅಥವಾ ಆಕೆಯ ಕುಟುಂಬಕ್ಕೆ ತಲುಪಿಸುವಂತೆ ಉತ್ತರ-ಪಶ್ಚಿಮ ದೆಹಲಿ DLSAಗೆ ಸೂಚಿಸಿದೆ.
2023ರ ಜುಲೈ 23ರಂದು ಘಟನೆ ನಡೆದಾಗ ಬಾಲಕಿಗೆ ಏಳು ವರ್ಷ ವಯಸ್ಸಾಗಿತ್ತು. ಪ್ರಕರಣದಲ್ಲಿ ಸುಮಿತ್ ಶಾಕ್ಯನನ್ನು ದೋಷಿ ಎಂದು ಘೋಷಿಸಲಾಗಿದ್ದು, ಪೊಕ್ಸೋ ಕಾಯ್ದೆಯಡಿ ಆತನಿಗೆ ಜೀವಾವಧಿ ಕಠಿಣ ಜೈಲು ಶಿಕ್ಷೆ ಹಾಗೂ ₹1 ಲಕ್ಷ ದಂಡ ವಿಧಿಸಲಾಗಿದೆ. ಕ್ರಿಮಿನಲ್ ಬೆದರಿಕೆ ಆರೋಪಕ್ಕೆ ಐದು ವರ್ಷಗಳ ಜೈಲು ಶಿಕ್ಷೆ ಮತ್ತು ₹20,000 ದಂಡ ವಿಧಿಸಲಾಗಿದೆ.
ಬಾಲಕಿ ಹಾಗೂ ಕುಟುಂಬ ಅನುಭವಿಸಿದ ಸಂಕಷ್ಟವನ್ನು ಪರಿಗಣಿಸಿ ವಿಚಾರಣಾ ನ್ಯಾಯಾಲಯ ₹10.50 ಲಕ್ಷ ಪರಿಹಾರ ನಿಗದಿಪಡಿಸಿದೆ. ಪರಿಹಾರದ ಪಾವತಿ ಕುರಿತು ವರದಿ ಸಲ್ಲಿಸುವಂತೆ ಹೈಕೋರ್ಟ್ DLSAಗೆ ಸೂಚಿಸಿದೆ.
ಶಿಕ್ಷೆ ಅಮಾನತುಗೊಳಿಸಿ ಜಾಮೀನು ನೀಡುವಂತೆ ಆರೋಪಿ ಸಲ್ಲಿಸಿದ್ದ ಮನವಿಗೆ ಹೈಕೋರ್ಟ್ ಸದ್ಯ ಯಾವುದೇ ಪರಿಹಾರ ನೀಡಿಲ್ಲ. ಪ್ರಕರಣದ ಮುಂದಿನ DLSA ವಿಚಾರಣೆ ನವೆಂಬರ್ 4, 2026ರಂದು ಹಾಗೂ ಮೇಲ್ಮನವಿ ವಿಚಾರಣೆ ಜನವರಿ 20, 2027ರಂದು ನಡೆಯಲಿದೆ.
