💢 ಕಟ್ಟ (12)
✍️ ಚೇತನ್ ವರ್ಕಾಡಿ
ದೂರೊಡೇ ಬರ್ಪಿನ ಪಲಯನ್ ತಿಮ್ಮಪ್ಪಣ್ಣೆ ತೂಯೆರ್,ವೊರೊಗು ಆರ್ನ ಪಿರಿಜೂವ ಪಾರ್ಲೆಕಾಂಡ್.ಒರೋನೆ ಅರೆಗ್ ಕೈಕಾರ್ ಉಂತುಲೆಕಾಂಡ್,ಮಾದವೆ ಕೈ ತೋಜ ತೋಜಾದ್ ಗೋಪಾಲನ್ ಕೆರ್ತಿನಿ ಈಯೆ ಈಯೆ ಪಂಡ್ದ್ ತಾಟಿ ಬೊಟ್ಟೊಂದು ಬೊಟ್ಟೊಂದು ಬೊಬ್ಬೆ ದೀಪಿನೆನ್ ತೂಯಿನಾಯೆ ,ನನ ಅಣ್ಣಗ್ ಈ ಸಂಗತಿ ತೆರಿಂಡ ಮೂಲೆ ಕುತ್ತ ಕೌಂಪೇಂದ್ ಎನ್ನಿನಾರ್,ಪೋದುಲ ಆಯಿನ ಬಾಯಿಗ್ ಕೈ ಪತ್ಯೆರ್.ತ್ಯಾಂಪಣ್ಣೆ ಸಾದಿಯೆ ಬತ್ತಿನಾರ್ ಮೆಗ್ಯನ್ ತೂದು ಮಾದವನ ಬಾಯಿಗ್ ಕೈದಾಯೆ ಪತೋಂದಯ ಪನ್ಪಿ ಪ್ರಸ್ನೆ ಪಾಡುನೆಕ್ ದುಂಬೇ,ಮೆಗ್ಯೆ ಪಲಯನ ಸಾದಿ ಬದಲ್ಪೆರೆ ಪಿದಡ್ಯೆರ್.ಅಣ್ಣೆ ದೂರ ಪಿದಡ್ನೆಯ ಅವ್ಲ ನಡತೊಂದು ಪಂಡ್ದ್ ಕೇನ್ನಗ,ಅವ್ ರತ್ನಾಕರ‌ನ್ ನಾಡೊಂದು ಇಲ್ಲಗ್ ಪಿದಡ್ನೆಂಬೆ,ಆಯಡ ಕೆಲವ್ ಸರಿ ಪಂಡೆ ಆ ತೋಡಬರಿತ ತಾರಾಯಿನೊಂಜಿ ದೆತ್ತ್ ಕೊರು ಬರ್ಸ ಬತ್ತ್ಂಡ ಬೊಲ್ಲಗ್ ಪೋಪುಂಡೂಂದ್,ಇನಿ ಬರ್ಪೆ ಎಲ್ಲೆ ಬರ್ಪೇಂದ್ ಪಂಡ್ ಪಂಡ್ದ್ ಗೊಬ್ಬಾಯಿನೆನೆ ಅತ್ತಂದೆ ಬರ್ಪುನ ತೋಜ್ಜಿ.ಇತ್ತ್‌ನ ಪೂರ ತಾಲ್ದೇ ಪೋಂಡು.ನನ ಇಲ್ಲಡ್ ಮಿನಿ ಉಲ್ಲೆನ ತೂಕಾಂದ್ ನಾಡೊಂದು ಪೋಪುನೆ,ಅವ್ವಂದ್ ಮಾರಯ ಈ ಆಯನ ಬಾಯಿಗ್ ಎಂಚಿನೆಕ್ ಕೈ ಪತ್ತಿಯಿನೆ,ಆಯೆ ಎಂಚಿನನ ಪನ್ಯೆರೆ ಪಿದಡ್ದೆ ಅತ ಪನ್ನಗ,ಆಯಗ್ ಮರ್ಲ್‌ಯ ಅಣ್ಣ ಆಯೆ ಗಲಿಗೆಗೊರ ಗೋಪಾಲನ್ ಆಯೆ ಕೆರ್ನೆ ಗೋಪಾಲನ್ ಉಂಬ್ಯೆ ಕೆರ್ನೇಂದ್ ಪನ್ಪೆ ,ಯಾನ್ ನೇಟೆ ಬರೋಂದುಪ್ಪುನಗ ಸಡನ್ನ್ ಗೋಪಾಲನ್ ತ್ಯಾಂಪಣ್ಣೆ ಕೆರ್ನೆ ಗೋಪಾಲನ್ ತ್ಯಾಂಪಣ್ಣೆ ಕೆರ್ನೆ ಪಂಡ್ದ್ ಗೊಬ್ಬೆ ದೀಯೆರೆ ಸುರುಪತ್ಯೆ,ಎಂಕ್ ಪಿಸ್ರ್‌ಡ್ ದಾಲ ಬಲ್ಲಿ,ಒಂಜಿ ಕೆಬಿತಂಡೆಗ್ ಕೊರ್ಯೆ,ನಿಕ್ಕ್ ಎನ್ನ ಪಲಯನ ಬಗ್ಗೆ ದಾನೆ ಗೊತ್ತುಯ ಎನ್ನಣ್ಣೆ ಧರ್ಮರಾಯಲೆಕ ಏರೆಗ್ಲ ಬೇನೆ ಮಲ್ಪಯೆ,ಈಯೆ ಕೆರ್ದ್ ಎನ್ನ ಅಣ್ಣಗ್ ಬಿರೆಲ್ ತೋಜಾವನಾಂದ್ ಆತೇ ಪನ್ತಿನಿಯ,ಆಯೆ ಬಿರೆಲ್ ತಿರ್ಗಾದ್ ಎನನ್ ತೋಜಾಯೆರೆ ಪಿದಡ್ಯೆ, ನನ ಸಾದಿಡ್ ಪೋಪಿಬರ್ಪಿನಕ್ಲ್ ನಮ್ಮ ಮೆಗ್ಯೆ ಪಲಯನ ಸಮ್ಮಂಡ್ ಕಲಂಕ್ ನಾಡುನ ಬೊರ್ಚಿ ಪಂಡ್ದ್ ಉಂದ ಇಂಚ ಪತೊಂದೆ ಪಂಡ್ದ್, ಸತ್ಯೊನು ಅಡೇಗೆ ತಿರ್ಗಾಸ್‌ಗ್ ಪಾಡ್ಯೆ.ಅವ್ ಸಯ್ಯಡ್ ಆಯೆ ಗಲಿಗೆಗೊಂಜಿ ಪಾತೆರ್ನೆ ಗೇನ ಕಲೆವೊಂದು ಅತ ಬಾಯಿ ಬುಡು ಪನ್ನಗ ತಿಮ್ಮಪ್ಪಣ್ಣೆ ಬಾಯಿ ಬುಡ್ಯೆರ್.ಬಾಯಿ ಸಡಿಲಾಯಿ ಸಾತ್‌ಗ್ ಮಾದವೆ ಗೋಪಾಲನ್ ಈ ಕೆರ್ನಿ ಪಂಡ್ದ್ ಕೈ ನೀರ್ದ್ ಕುಡ ತಾಟಿ ಬೊಟ್ಟೆರುಂತ್ಯೆ.ತಿಮ್ಮಪ್ಪಣ್ಣೆ ದುಂಬೇ ಮರ್ದ್ ಅರೆದ್ ಪೂಜಿನೆಟ್, ತ್ಯಾಂಪಣ್ಣಗ್ ಮಾದವೆ ಪನ್ಪಿನ ಸತ್ಯ ಸಂಗತಿ ಪಂಡ್ದ್ ಅಂದಾಜೆ ಆಯಿಜಿ.ಆಯೆ ಮರ್ಲೆ ಪನ್ಪಿ ಮರಪು ಸೀಕ್‌ದ ವೊರೆಂಕುನ ಅದೆಕ್ ಬೂರ್ದ್ ಆತ್ಂಡ್,ನನ ಆಯನ್ ಪೊರ್ಲಿತ್ತ್‌ನಾಯೆ ಪಂಡ್ದ್ ವೊತ್ತೊನುನಕ್ಲ್ ಏರ್ಲ ಇಜ್ಜೆರ್.ಎಂಚಲ ಪಲಯಗ್ ಗೊತ್ತಾವಂದಿಲೆಕ ಆರೆನ್ ಕಡಪುಡ್ದು ಕೊರ್ನಾರ್,ಅಲ್ಪರ್ದ್ ಸೀದ ಆರ್ನ ಇಲ್ಲದ ಸಾದಿ ಪತ್ಯೆರ್.ಮಾದವೆ ಅವ್ವೇ ಮಣ್ಣ್‌ಡ್ ವೊರೆಂಕೊಂದು ನೆಗರೊಂದು,ಸತ್ಯೊನು ಬಾಯಿಡ್ ಬಚ್ಚಿರೆ ಅಗ್ಗಿಲೆಕ ಅಗ್ಗಿಂಡಲ ಆಯನ ಪಾತೆರ ನಂಬುನಕ್ಲ್ ಏರ್ಲ ಇಜ್ಜಾಂಡ್. ಒಂಜಿ ಪೊರ್ತುಡು ಅವ್ವೇ ಸಾದಿಡೆ ಪಿಲಿತೆಲ್ಕ ಪೋವೊಂತಿ ಮಾದವೆ ಇನಿ ಪಂಜಿ ಕೆರೆಡ್‌ಲೆಕ ಕೆರೆಡೊಂದುಲ್ಲೆ,ಗೇನೊದ ಕುಡೆಕ್ ಉದಲ್ ಪತ್ತ್‌ದ್ ನೆಂಪುದ ಅದೆ ಮದೆಯಾವೊಂದು ಪೋವೊಂದುಂಡು.ಇಲ್ಲರ್ದ್ ಪಿದಯಿ ದೀತೆರ್,ಸಮ್ಮಂದೊರ್ದು ಪಿದಯಿ ದೀತೆರ್,ತಿಕ್ಕಿ ಸಾದಿ ಬರಿತ ಅಂಗಡಿಲೇ ನಿದೆರ್ಯೆರೆ ಇಲ್ಲಾತ್ಂಡ್,ಕೈನೀರ್ನಗ ಏರಾಂಡಲ ಕೊರಿ ಪಣವು ಬಂಜಿನ್ ದಿಂಜಾವುಂಡು ಎಂಚಿನನಾ ಮಲ್ಪೆರೆ ಪೋಯಿನಾಯಗ್ ದೇವೆರ್ ಕೊರಿ ಪೆಟ್ಟ್‌ನ್ ತಾಂಗೆರೆ ಆಯಿಜಿ.ಮಾದವನ ಪಿರವುದ ಸಗ್ತಿ,ತಿಮ್ಮಪ್ಪಣ್ಣೆ ಆದಿತ್ತೆರ್,ಆಂಡ ತಿಮ್ಮಪ್ಪಣ್ಣನ್ ಇಂಚ ಪೂರ ಗೊಬ್ಬಾವೊಂತಿನ ಸಗ್ತಿ ಆರೆ ಪಿರವುಡೊಂಜಿ ಇತ್ತ್ಂಡ್..
ದುಂಬರಿವುಂಡು
