ತುಳು ಕಥೆ
ಚೇತನ್ ವರ್ಕಾಡಿ
ಅಲೆ ಪುದರ್ ಸುಮತಿ,ಬೀಜದ ಕಂಪೆನಿಗ್ ಬೇಲೆಗ್ ಪೋದ್ ತಾನ್ ತನ್ನೊರಿ ಮಗನೊಟ್ಟು ಬದ್ಕೊಂದುಲ್ಲಲ್.ಅಲೆ ಕಂಡನಿ ವಾಸು ಕೈಕೊಂಜಿ ಮಗನ್ ಕೊರ್ದ್ ಬೇತೆ ಪೊಣ್ಣನೊಟ್ಟು ಪಾರ್ ಪೋದು ಸುಮತಿನ್ ನಡು ಸಾದಿಡ್ ಪಾಡ್ದ್ ಪೋತೆ.ಇತ್ತೆ ಸುಮತಿಗ್ ಮಗೆನೇ ಮಾತಲ,ಆಯಗಾದೆ ಬದ್ಕೊಂದುಲ್ಲಲ್,ಬೆನೊಂದುಲ್ಲಲ್,ಕನಕಟ್ಟೊಂದುಲ್ಲಲ್.ಆನಿ ಕಂಪೆನಿರ್ದ್ ಬೇಗ ಬತ್ತ್ನ ಸುಮತಿ ತನ್ನ ಮಗನ್ ಲೆತೊಂದು ಊರ ಜಾತ್ರೆಗ್ ಪೋಯಿನಾಲ್,ಮಗನೊಟ್ಟು ತೊಟ್ಟಿಲ್,ಸಂತೇಂದ್ ತಿರ್ಗ್ದ್ ಬನ್ನಗೊಂತೆ ಕಡೆಸ್ಂಡ್ ಪಿರಬರ್ಯೆರೆ ಆನಗ ಗರ್ಗಂಡ ಕತ್ತಲೆ ಆದಿತ್ತ್ಂಡ್,ಅರೆದೈರದಾಲ್ ಮಗನ್ ಲೆತೊಂದು ಬೀಸ ಬೀಸ ಬತ್ತಿನಾಲೆನ್ ಅರ್ದ ಸಾದಿಗೆತ್ತ್ನಗ ನಾಲ್ ಜನ ಅಡ್ಡ ಪಾಡ್ಯೆರ್,ಅಕ್ಲೆ ಕೈರ್ದ್ ತಪ್ಪಾಯೆರೆ ಸುಮತಿ ಮಗನ್ ಸಂಪತ್ನ್ ಪತೊಂದು ಪಾರ್ಯಲ್ ಪಾರ್ಯಲ್ ಕಡೇಕ್ ಸಾದಿ ಬುಡ್ದು ಕಾಡಸಾದಿಗಾನಗ ಸಂಪತ್ ಅಲೆ ಕೈರ್ದ್ ತತ್ತ್ ಪೋಯೆ,ಅಂಚಿಡ್ ಮಗನ್ ನಾಡೆರ್ಲ ಅತ್ತ್ ಇಂಚಿಡ್ ಮುಕ್ಲೆ ಕೈಕ್ ತಿಕ್ಕೆರ್ಲ ಅತ್ತ್,ಅರಬಾಯಿ ದೀವೊಂದು ಅಂಚ ಪಾರ್ ಬತ್ತಿನ ಸುಮತಿ ಕಡೆಕೊಂಜಿ ಕೋಡಿ ಎತ್ತ್ನೆ ರಗುನ ಇಲ್ಲದ ಜಾಲ್ಗ್.ಅಲೆ ಬದ್ಕ್ದ ಬೊಲ್ಪೂಂದ್ ಇತ್ತಿನೆ ಒರಿ ಮಗೆ ಸಂಪತ್,ಆಂಡ ನಟ್ಟ ನಡಿರ್ಲ್ ಕಾಡಬಾಕಿಲ್ಡ್ ಓಡೆ ಪೋದು ಎತ್ತ್ದೆನಾ ಪನ್ಪಿನವೇ ಅಪ್ಪೆಗ್ ತೆರಿಯಂದ್.ಲತ್ತ್ ಪ್ರಾಯೊದ ಬಾಲೆಗ್ ಕಾಡ್ದ ಕತೆ ತೆರಿಯಂದ್,ಸಾದಿದ ಗುರ್ತ ತೆರಿಯಂದ್.ಪೆದ್ದಿ ಕರ್ಲ್ ಎನ್ನಿಎನ್ನಿದ್ ಕುಡ್ತು ಕುಡ್ತು ತನ್ನ ಬೇನೆನ್ ಪಿದಯಿ ಪಾಡ್ನಗ ರಗುನ ಕಣ್ಣರುಲ ಚಂಡಿಯಾಂಡ್.ಜಾನಕಿನ ಕಣ್ಣ್ಡ್ಲ ನೀರಪಸೆ ದಿಂಜಿಂಡ್.ಸುಮತಿನ್ ತಂಗಡಿಲೆಕ ಮಾನಾದ್ ಇಲ್ಲ ಉಲಯಿ ಎದ್ಕೊಂಡೆ,ಆಂಡ ಸುಮತಿನ ಕಣ್ಣ್ ಕೆಬಿ ಸಂಪತ್ನ ಸೊರ ಕೇನುಂಡಾಂದ್ ನಾಡೊಂತುಂಡು.ಆ ಪೊರ್ತು ಆಯೆ ಓಲ್ ತತ್ತ್ ಪೋತೆನಾ,ತತ್ತ್ ಪೋಯಿನಾಯನ್ ನಾಡ್ಗ ಪನ್ನಗ ನಾಡುನಾಯೆ ಪಿರತಿರ್ಗ್ದ್ ಬರ್ವೆನಾ ಪನ್ಪಿನ ನಂಬಿಕೆಲ ದಾಂತಿ ಪೊರ್ತವು.ಪೆದ್ದಿ ಜೂವೊನು ಸಮದಾನ ಮಲ್ತ್ಂಡಲ,ಅಲೆ ಎಕ್ಕಂದೆಲ್ ಕಮ್ಮಿ ಆವೊಡಾಂಡ ಮಗನ್ ಕಣ್ಣನಿಲಿಕೆ ತೂದಾವೊಡಾತೆ.ಸುಮತಿ ಗಡಿಗಡಿ ಪಿದಯಿ ಬತ್ತ್ ಎಕ್ಕಲ್ವಲ್,ಅಲೆ ಪಿರವುಡು ರಗು ಬತ್ತ್ ಸಮದಾನ ಮಲ್ಪುವೆ.ಕಾಡಬರಿಟ್ ಸಂಪತ್ ಸಾದಿತತ್ತ್ದ್ ಕಾಡನಡುಕು ಪೊಗ್ಗುದಿತ್ತೆಂಡ,ಕಾಡಮುರ್ಗೊಲು ಆಯನ್ ದೀವಂದ್ ಪನ್ಪಿ ಪೋಡಿಗೆಲ ರಗುನ ತಿಗಲೆಡ್ ಎಡ್ತೊಂದುಂಡು,ಆಂಡಲ ಸುಮತಿಗ್ ದೈರದಿಂಜಾವುನ ಬೇಲೆನ್ ಇರ್ಲಿಡೀ ಮಲ್ತೊಂದುಲ್ಲೆ.ಸುಮತಿಗ್ ಮಗನ್ ತೂವಂದೆ ದಾಲ ತೋಜೊಂದಿಜ್ಜಿ,ಆಂಡ ರಗುಗು ಆ ಪೊರ್ತು ದಾಲ ಮಲ್ಪೆರೆಗಾವೊಂದಿಜ್ಜಿ,ಔಸ ಇತ್ತ್ಂಡ ಬಾಲೆ ಒರಿವೆ ಬೊಲ್ಪಾಯಿಲೆಕನೆ ನಾಡುನೇಂದ್ ಮನಸ್ಡೇ ಎನ್ಯೊಂತೇ.ಆ ಪೊರ್ತು ಆಯೆ ಎನ್ನುನೆಲಾ ಆಯನ ಜಾಲ್ಡ್ ಎನ್ಯೆರಾವಂದಿ ಸತ್ಯ ಕಣ್ಣೆರುಕು ತೋಜುನೆಲಾ ಸರಿಯಾಂಡ್..
