ಕಟ್ಟ(13)
ಚೇತನ್ ವರ್ಕಾಡಿ
ಅವ್ ಬೇತೆ ಏರ್ಲ ಅತ್ತ್,ಆರೆ ಬೊಡೆದಿ ಕಸ್ತೂರಿ ಅಕ್ಕೆ.ಏಪ ತೂನಗಲ ಬೊಡೆದಿ ಎಲ್ಯ ಮಲ್ಪುನ ಪಾತೆರೊ ಕೇಂದ್ ಕೇಂದ್ ಬೊಡಿನಾರೆಗ್,ನನಲ ಬೊಡೆದಿನ ಎದುರು ಎಲ್ಯ ಆಯೆರೆ ಆಯ್ಜಿ,ಮೀಸೆಗ್ಲ ಮರ್ಯಾದಿಜ್ಜೀಂದ್ ಆರಾದೆ ಬದಲಾಯೆರೆ ಸುರುವಾಯೆರ್.ನೇನೆ ಕಾತೊಂದಿತ್ತಿ ಕಸ್ತೂರಿ ಅಕ್ಕೆ,ಕಂಡನಿಯನ ಮಂಡೆಡ್ ಎಂಚೆಂಚಿನ ಪೂರ ದಿಂಜಾದ್ ಬುಡ್ಯೆರ್,ಆರೆಗ್ ಬೋಡಾಪಿಲೆಕ ಪುರಿ ಬುಡ್ಯೆರ್.ಕಸ್ತೂರಿ ಅಕ್ಕೆನ ಪಾತೆರೊನೇ ಸರಿ ಎನ್ನಿನ ತಿಮ್ಮಪ್ಪಣ್ಣೆ ಈತ್ ಮಾತ ಮಲ್ತ್ ಪಾಡೆರೆ ಕಾರಣ ಆದ್ ಪೋಯೆರ್.ನೇತ ಉಲಮರ್ಮ ತ್ಯಾಂಪಣ್ಣಗ್ ತೆರಿಜಿ.ತನ್ನ ಮೆಗ್ಯೆ ಎಡ್ಡೆಂತಿನಾಯೆ ಪಂಡ್ದೇ ತರೆಟ್ ತುಂಬಿನಾರೆಗ್,ತಿಮ್ಮಪ್ಪಣ್ಣೆನೆ ಕರ್ಪಿಲ್ಲ್‌ದ ಅದೆಟ್ ಪಲಯನ್ ಕುಲ್ಲಾಯೆರೆ ಮದೆಟ್ ಉಂತುದು ನೆಯ್ತಿ ಉರ್ಲು ತೋಜಂದೆನೇ ಪೋಂಡು..
ದಿನೊಕುಲು ಕರಿಂಡ್ ಮಾದವನ ಮರ್ಲ್ ಜೋರಾವೊಂದೇ ಪೋಂಡು,ತಿಕ್ಕಿನಕ್ಲೆಗ್ ಪೂರ ತುಚ್ಚುನೆ ಬೆರಿಪತ್ತ್ ಗಿಡಪುನೆ ಇಂಚ ಸಾದಿ ನಡಪಂದಿಲೆಕ ನಡುಸಾದಿಡ್ ಉಪದ್ರ ಕೊರ್ಯೆರೆ ಸುರುಮಲ್ತೆ.ಉಪದ್ರ ತಡೆಯೆರೆ ತೀರಂದಿನಕ್ಲ್ ಕಲ್ಲ್ ದಕ್ಯೆರೆ ಪಿದಡ್ಯೆರ್,ಪೊಲಿ ಪಾಡ್ಯೆರೆ ಸುರು ಮಲ್ತೆರ್.ಏತೋ ಜನೊತ ಕಲ್ಲ್‌ದ ಪೆಟ್ಟ್‌ಗ್ ಮಾದವನ ಮೈ ಕನಿದ್,ಗರಿದ್ ಕುರಿಯಾದ್ ಪೋತುಂಡು,ಏತೋ ಜನೊತ ಬಡುತ ಪೆಟ್ಟ್‌ಡ್ ಜಡಿಕೆದ ಅಚ್ಚಿಲು ಮಾಜಂದೆ ಒರಿದ್ಂಡ್.ತಾನ್ ಮಲ್ತಿನ ತಪ್ಪುಗು ಆಯಗ್ ದೇಬೆರೆ ಬೋಡಾಯಿನಾತ್ ಶಿಕ್ಷೆ ಕೊರ್ಯೆರ್.ಐಕೆನಾ ದಾನ್ನ ತೆರಿದಿನಕ್ಲ್ ಪಂತಿನಿ ನರಮಾನಿ ಪೆಟ್ಟ್‌ನಾಂಡಲ ತಾಂಗೊಲಿ ಆಂಡ ದೇಬೆರ್ ಕೊರಿ ಪೆಟ್ಟ್‌ನ್ ತಾಂಗೆರೆ ಬಲ್ಲೀಂದ್.ಇಂಚೆನೇ ದಿನೊಕುಲು ಪೋವೊಂದಿತ್ತ್ಂಡ್.ಒಂಜಿ ದಿನ ಮಾದವೆ ಸಾದಿಯೆ ಪೋನಗ ಜೋಕುಲೆನ ಪುಂಡು ಎದುರು ಬತ್ತ್ಂಡ್,ದೊಲ್ಲೆ ಅರಿಪಾವೊಂದು ಬತ್ತಿನ ಮಾದವನ್ ತೂಯಿನ್ನೇ ಜೋಕುಲು ಪೂರ ಸೇರ್ದ್ ಮರ್ಲೆ ಬತ್ತೆ ಮರ್ಲೆ ಬತ್ತೆ ಪನೊಂದು ಕೈಕ್ ತಿಕ್ಕಿ ಕಲ್ಲ್‌ಲೆನ್ ಪಟಪಟಾಂದ್ ದಕ್ಯೆರ್.ಈಡ್ ದೀವಂದೆ ಒಟ್ಟಾರೆ ದಕ್ಕಿನ ಕಲ್ಲ್ ಮಾತಲ ಮಾದವನ ಒಂಜೊಂಜಿ ಮೈಕ್ ಬೂರ್ದ್ ನೆತ್ತೆರ್ ಕನಿಂಡ್,ಗೇನೊದಾಂತಿನಾಯಗ್ ಕಲ್ಲ್‌ದ ಪೆಟ್ಟ್ ಆಕ್‌ ಆಕ್‌ದ್ ಜೂವನೇ ಬಲದಾಂತೆ ಮರಕಟ್ಟ್‌ದ್ ಪೋತುಂಡು.ಕಡೆಕೊರಿ ದಕ್ಕಿನ ಕಲ್ಲ್ ಸೀದ ಕೆನ್ನಿಗ್ ಆಕ್‌ದ್ ಮಾದವೆ ಆಡೇಗೆ ಪಲಯಡ್ಡ ಬೂರ್ಯೆ,ನೆತ್ತೆರ್ ಬೊಂಡೊದ ನೀರ್ ರಟ್ಟ್‌ಲೆಕ ರಟ್ಟೊಂತುಂಡು.ಆಯೆ ಬೂರುನೆಲ ಆಮೈಟ್ ಸನಿತಲ್ಕ ತ್ಯಾಂಪಣ್ಣೆ ಬರ್ಪುನೆಲ ಸರಿಯಾತ್ಂಡ್…
ದುಂಬರಿಯುಂಡು
