ಕಟ್ಟ(14)
ಚೇತನ್ ವರ್ಕಾಡಿ
ನೆತ್ತೆರ್ದ ಎರ್ತೆಡ್ ಮಾದವೆ ಬೊದುಲ್ಯೆರೆ ಸುರುವಾಯೆ.ಮಣ್ಣ್‌ಡ್ ಮಡ್ಡಿಯಾದ್ ಪೋತೆ.ದೂರೊಡು ಆಯನ್ ತೂಯಿನ ತ್ಯಾಂಪಣ್ಣೆ ಪಾರ್ಬತ್ತ್‌ದ್,ಬಾಲೆದಲ್ಕ ಜಕ್ಕೆಲ್ಡ್ ಮಾದವನ ತರೆ ದೀವೊಂಡೆರ್.ಮಾದವನ ಕಣ್ಣ್ ಅಡಿಮೆಲಾವೊಂದಿತ್ತ್ಂಡ್,ತ್ಯಾಂಪಣ್ಣೆ ಲೆಪ್ಪುನಗಲ ಮಾದವಗ್ ಅಂದಜಾಯಿಜಿ,ಇತ್ತೆನಾ ಬೊಕ್ಕನ ಪಂಡ್ದ್ ಆಯನ ಸೋಸ ನಲ್ತೊಂತುಂಡು.ಗಲಿಗೆದುಲಯಿ ಜನಸೇರ್ಂಡ್,ಮಾದವನ್ ಆಸೊತ್ರೆಗ್ ಸೇರಾಯೆರ್.ಮರ್ಲೆ ಆಯಿಬೊಕ್ಕ ಆಯನ ಇಲ್ಲದಕ್ಲ್ ಮಾದವನ್ ಮೂಸುತೂಪುನಕ್ಲ್ ಏರ್ಲ ಇಜ್ಜಿ,ನರಮಾನಿ ಪಂಡ ಅಂಚೆನೆ ಸರಿಟಿತ್ತ್‌ಂಡ ಸಾರ ಸಮ್ಮಂದ,ಇಜಿಂಡ ನರಮಾನಿ ಮೂಸುಜೆರ್.ಪಗೆನ್ ಮದತ್‌ದ್ ತ್ಯಾಂಪಣ್ಣೆ ಮಾದವನ್ ತೂಯೆರ್.ತನ್ನ ಜೋಕುಲು ಅರ್ವತ್ತಲ್ಲುಲ ದಾಯೆಗ್ ಈರೆಗ್ ಬಾಕಿದಕ್ಲೆನ್ ತೂಪುನ ಬೇಲೆ ಪಂಡ್ದ್ ,ಪಂಡಲ ತ್ಯಾಂಪಣ್ಣೆ ಐನ್ ಕೆಬಿಕ್ ಪಾಡಂದೆ, ಆಯಗ್ ಸೀಕ್ ಸಂಕಡ ದೂರಾಯೆರೆ ಮರ್ದ್ ಕುರ್ದಿಗ್ ಬೋಡಾಪಿ ಮಾತ ಪಣವುನ್ಲ ವೊಟ್ಟು ಮಲ್ತ್ ಕೊರ್ಯೆರ್.ದಿನೊಕುಲು ಕರಿಂಡ್ ,ಆಸೊತ್ರೆದ ಅದೆಟ್ ಮಾದವೆ ಉಸರಾವೊಂದು ಬತ್ತೆ,ಪೋಯಿಗೇನ ಪಿರಮಗ್‌ರ್ಂಡ್,ಮದತಿ ಸಂಗತಿಲು ಕಣ್ಣ್‌‌ಗ್ ಎಡ್ತ್ಂಡ್.ಆಯಗ್ ಗೇನ ಬನ್ನಗ ಕಣ್ಣೆದುರು ಇತ್ತ್‌ನೆ ತ್ಯಾಂಪಣ್ಣೆ ಒರೀಯೆ.ಇತ್ತೆ ಮಾದವನ ಕಣ್ಣ್‌ಡ್ ಉಡಲ್‌ರ್ದ್ ಕಣ್ಣ್‌ಗೆತ್ತಿ ಕನನೀರ್ ಅರಿಂಡ್.ಇಂಚಿನ ಪುಣ್ಯಾತ್ಮ‌ನ್ ಕರ್ಪಿಲ್ಲ್‌‌ಗ್ ನೂಕ್ಯೆ ಅತಾ ಪಂಡ್ದ್ ಎತೆದೆತ್ತೆ.ಡಾಕ್ಟ್ರ್ ತ್ಯಾಂಪಣ್ಣೆ ಆಸೊತ್ರೆಡ್ ಬತ್ತಿನ ಬಂಙೊನು ಮಾದವಗ್ ತೆರಿಪಾನಗ ಆಯನ ಪಗೆದ ಅರ್ಕಟ್ ಕಡಿದ್ ಪೋಂಡು. ದರ್ಮ‌ರಾಯಲೆಕಂತಿ ತ್ಯಾಂಪಣ್ಣಗ್ ಕೈಮುಗ್ಯೊಂದು ,ಎನ್ನ ತಪ್ಪುಗು ಮಾಪುಕೊರ್ಲೆ ಪಂಡ್ದ್ ನಟ್ಟೊಂಡೆ.ತನ್ನ ಗೇನೊ ಸರಿಜ್ಜಂದಿ ಪೊರ್ತು ಮಾತ ದೂರ ದೀನ ಇಲ್ಲಗ್ ನನ ಕಡತ್ ಕಾರ್‌ದೀವಯೆ ಪಂಡ್ದ್ ಎನ್ನಿನಾಯೆ ತ್ಯಾಂಪಣ್ಣನ ಇಲ್ಲಡೇ ಒಂತೆದಿನ ದಿನ ಕರಿಯೆರೆ ಜಾಗೆ ಕೇನ್ನಗ ಆರ್ ವೊತ್ತೊಂಡೆರ್.ತಾನ್ ಮಲ್ತಿನ ತಪ್ಪುದ ಪಿರವುಡಿತ್ತಿ ಸೂತ್ರದಾರೆ ಏರ್ ಪನ್ಪಿ ಸತ್ಯ ಬುಡ್ಪಬುಡ್ಪಾದ್ ಪಂಡೆ,ಕಲ್ಯಾಣಿಗ್ಲ ಈ ಇಸಯ ತೆರಿಂಡ್.ತನ್ನ ತಪ್ಪುಗು ಶಿಕ್ಷೆ ಆವೊಡೇ ಪಂಡ್ದ್ ನ್ಯಾಯೊದ ಕಟ್ಟೆ ಏರ್ಯೆ,ಕೆರ್ತಿನಿ ಮಾದವನ ಜನೊಕುಲಾಂಡಲ ಐತ ಸೂತ್ರದಾರೆ ತಿಮ್ಮಪ್ಪಣ್ಣೆ ಆಯಿನೆರ್ದಾವರ ಮಾದವನೆರ್ದ್ ಎಚ್ಚಿಗೆ ತಿಮ್ಮಪ್ಪಣ್ಣೆ ಕರ್ಪಿಲ್ಲ್‌‌ಡ್ ಕುಲ್ಲುಲೆಕಾಂಡ್.ಇತ್ತೆ ತಿಮ್ಮಪ್ಪಣ್ಣಗ್ ಕರ್ಪಿಲ್ಲ್‌ದ ಅದೆಟ್ ಕುಲ್ಲುನಗ ತಾನ್ ಮಲ್ತಿ ತಪ್ಪು ತೆರಿಯೊಂದು ಪೋಂಡು.ತನ್ನ ಪಲಯಗೆ ರಡ್ಡ್ ಬಗೆಯೆ ಅತ ಪಂಡ್ದ್ ಕಡೆ ಕಣ್ಣ್‌ಡ್ ಕೊಡಿದುಕ್ಕ ದೆತ್ತೆರ್.ಕಂಡನಿ ಇಂಚ ಆಯೆರೆ ಯಾನೇ ಕಾರಣ ಪಂಡ್ದ್ ಕಸ್ತೂರಿಯಕ್ಕೆಗ್ಲ ಎತೆ ಪತ್ತ್ಂಡ್.ಮಾದವೆ ಒಂತೆ ಸಮಯೊಡೇ ಕರ್ಪಿಲ್ಲ್‌ರ್ದ್ ತನ್ನ ತಪ್ಪು ಮಾಜಿದ್ ಪಿದಯಿ ಬತ್ತೆ.ಇತ್ತೆ ಆಯೆ ಅವ್ವೇ ಮೀಸೆ ಮಾದವೆ…! ಆಂಡ ಲಡಾಯಿ ಮನ್ಪುನ ಪಗೆಮಾನಿ ಅತ್ತ್.ಉಂದುವೇ ತ್ಯಾಂಪಣ್ಣನ ಬಲಗೈ ಬಂಟೆ ಗೋಪಾಲೆ ಎಂಚ ಇತ್ತೆನಾ ಇನಿ ಮಾದವೆ ತ್ಯಾಂಪಣ್ಣಗ್ ಬಲಗೈ ಬಂಟೆ ಆದ್ ಆರೆಗ್ ಜೂವಗ್ ಜೂವ ಕೊರ್ಪಿ ಗಟ್ಟಿದ ಅರ್ಕಟ್ ಆಯೆ..
ಕಡೇದ ಅರ್ಕಟ್ ಎಲ್ಲೆ ಗಿರಿಪುವೆ.…
