ಕಟ್ಟ(5)
ಚೇತನ್ ವರ್ಕಾಡಿ
ದಾಯೆ ಅಮ್ಮ ಇಂಚ ಪೂರ ಪಾತೆರ್ವರ್,ಈರೆ ಇಂಚ ಪಾತೆರ್ಯರ್ಂಡ ಎಂಕ್ಲ್ ಎಂಚಿನ ಮಲ್ಪೊಡು ಈರೆ ಪನೊಡು.ದಾದೆ ಅಂಚಿನ ಆಸೆ ಇರೆಗ್…?ಪನ್ಲೆಮ್ಮಾ ಎಂಕ್ಲೆಡ, ಅಪ್ಪೆನ ಕೈನ್ ಮೂಜಿ ಜೋಕುಲ್ಲ ಗಟ್ಟಿ ಪತೊಂದು ಕೇನ್ವೆರ್.ಅಪಗ ಪಾರ್ವತಿಯಕ್ಕ ಉಡಲ ಪಾತೆರೊಗು ದುಂಬಾಯೆರ್.ಜತ್ತೊಂದಿತ್ತಿ ಕನನೀರ್‌ನ್ ಒರ ಸೆರಂಗ್‌ಡೊಚ್ಚೊಂಡೆರ್.ಪನ್ಪೆ ಮಗಾ ಕೇನ್ಲೆ,ಈ ಇಲ್ಲ್‌ನ್ ಬುಡ್ದು ನಿಕ್ಲೆನ ಪೊಪ್ಪ ಒಂಜಿ ದಿನಲ ಪಿದಯಿ ಕುಲ್ಲಿನಾರ್ ಅತ್ತ್,ನಿಕ್ಲ್ ಪುರುಬಾಲೆರ್ದ್ ಇಡೆಮುಟ್ಟಲ ಆರ್ ಓಡೆನೇ ಪೋವಡ್,ಪೊರ್ತುಕಂತುನೆಕ್ ದುಂಬು ಈ ಮಾಡರಿಕ್ ಎತ್ತೊಂದಿತ್ತಿನಾರೆನ್,ಇನಿ ಇಲ್ಲಗ್ ಬರಂದಿಲೆಕ ಮಲ್ತೆರತ, ಪಗೆಮಾನಿಗ್ಲ ಎಡ್ಡೆ ಆವೊಡೂಂದೆ ಬಯಕಿನ ನಿಕ್ಲೆ ಪೊಪ್ಪ ಇಂಚಿನ ಬೊರ್ಚಾಂದಿ ಬೇಲೆ ಮಲ್ಪೆರ ಜೋಕ್ಲೆ..?ನಿಕ್ಲ್ ನೇನ್ ನಂಬುವರಾ..ಎಂಕ್ ಆರ್ ಬೋಡು ಆ ಕರ್ಪಿಲ್ಲ್‌ದ ಅದೆಟ್ ಆರ್ ಏತ್ ಬೇನೆ ತಿನೊಂದುಲ್ಲೆರಾ ದಾನ್ನ,ಎಂಕ್ ಐನ್ ಎನ್ಯೆರೆನೆ ಆವೊಂದಿಜ್ಜಿಯ,ಆರೆನ್ ಎಂಚಾಂಡಲ ಲೆತೊಂದು ಬರ್ವರಾ ಪನ್ನಗ ,ಜೋಕ್ಲೆನ ಕಣ್ಣ್‌ಡ್‌ಲ ಕನನೀರ್ ಎರ್ಕ್‌ದ್ ಜತ್ತ್ಂಡ್,ಪೊಪ್ಪ ಎಂಚಾಂದ್,ಈರ್ ದಾಯೆ ಪನೊಡಮ್ಮ ,ಊರೇ ಕೊಂಡಾಡಿನ ದರ್ಮಾತ್ಮೆ ಆರ್.ಇನಿ ಏರ್ನನಾ ಪಗೆನ್,ಆರ್ನ ತರೆಕ್ ಕಟ್ಟ್‌ದ್ ಬುಡ್ನಕ್ಲೆನ್ ನಮನಂಬಿ ಸತ್ಯೊಲೆ ಮುನಿವೆರಮ್ಮ,ಕಾನೂನುದ ಕಣ್ಣ್‌ಡ್ ಇತ್ತೆ ಪೊಪ್ಪ ಅಪರಾದಿಲೆಕ ತೋಜೆರ್,ಆಂಡ ಸತ್ಯ ಒಂಜತ್ತ್ ಒಂಜಿ ದಿನ ಗೆಂದುಂಡೆ ಅತೆ.ಇತ್ತೆ ಈರ್ ದೈರ ದೆತೊನೊಡಮ್ಮ ಪೊಪ್ಪನ್ ಕರ್ಪಿಲ್ಲ್‌ರ್ದ್ ಪಿದಯಿ ಕನಪಿನ ಬೇಲೆ ಎಂಕ್ಲೆನ,ಮೂಜಿ ಜೋಕ್ಲೆನ ದೇರೊದ ಪಾತೆರ ಕೇನ್ನಗ ಪಾರ್ವತಿಯಕ್ಕ‌ನ ಮನಸ್‌ಗೊಂತೆ ಸಲ್ಮಂತ ಆಂಡ್..
ಕರ್ಪಿಲ್ಲ್‌ದ ಅದೆಟ್ ತುಂಬೆರಾವಂದಿ ಪುದೆನ್ ತುಂಬೊಂದು ತ್ಯಾಂಪಣ್ಣೆ ಕನನೀರ್ ಜಪುಡಾವೊಂದುಲ್ಲೆ‌ರ್.ಪುಣ್ಣಮೆದಲ್ಕ ಮೆನ್ಕೊಂದಿತ್ತಿ ಆರ್ನ ಬದ್ಕ್‌ದ ಸಾದಿ ಅಮಾಸೆದ ಕರಿಬೊಲ್ಲೊಡು ಮುರ್ಕುಲೆಕಾತ್ಂಡ್.ದರ್ಮರಾಯಲೆಕಂತಿನ ತ್ಯಾಂಪಣ್ಣನ ನಡಕೆಡ್ ಒಂಜೇ ಒಂಜಿ ವೊಡಕ್ ಇಜ್ಜಾಂಡ್ ,ಆಂಡ ಇನಿಕಾನಗ ಊರಜನೊಕುಲೆಗ್ ವೊಡಕ್ ತೋಜುಲೆಕಾಂಡ್.ಊರ ಪೊಣ್ಣುಲೆನ್ ತನ್ನ ತಂಗಡಿ ಜೋಕುಲ್ಲೆಕ ತೂವೊಂತಿ ತ್ಯಾಂಪಣ್ಣನೇ ಮೀಸೆ ಮಾದವೆ ಪೊಣ್ಣಮರ್ಲೆ ಪಂಡ್ದ್ ಕತೆಕಟ್ಟ್‌ದ್ ಬುಡ್ಯೆ.ಆ ಕತೆನ್ ಮಾತೆರೆ ಉಡಲ್ ಮುಟ್ಟುಲೆಕ ಬರೆಯೆರೆಲ ಬರೆದಿತ್ತೆ.ಬಡುತ ಅಚ್ಚಿ ಆಂಡಲ ಮಾಜುಂಡುಗೆ, ಕೆಲವೊರ ನರಮಾನಿ ಕೊಡಪುನ ಪಾತೆರೊದ ಅಚ್ಚಿ ಮಾಜುಜಿಗೆ,ತ್ಯಾಂಪಣ್ಣಗ್ ಇರ್ಲ್ ಪೂರ ನಡತಿನವೇ ಕಣ್ಣ್‌ದ ನಡುಕು ಬರ್ಯೆರೆ ಸುರುವಾಂಡ್, ಮರ್ಯಾದಿದ ಜಾಲ್‌ಡ್ ಗುರ್ಕಾರಲೆಕ ಗತ್ತ್‌ಡ್ ಪಜ್ಜೆ ದೀಯಿ ಕಾರ್‌ನ್ ನನ ಎಂಚ ದುಂಬು ಕೊನವಡ್ ಪನ್ಪಿ ಬೇನೆ ಆರೆ ಉಡಲ್ಡ್ ಕತ್ತೆರಿಪಾಡ್ಲೆಕ ಕುತ್ತುದೆಪ್ಪೆರೆ ಸುರುಮಲ್ತ್ಂಡ್.ಒಂಜಿ ಕಡೆಟ್ ಗೋಪಾಲನಂಚಿನ ಬಾಲೆಮನಸ್‌ದ ಬೇಲೆದಾಯನ್ ಕಲೆವೊಂಡೆ ಅತ ಪನ್ಪಿ ಬೇನೆ ಆರೆನ್ ಅರ್ಕಟ್ ಪಾಡ್ಂಡ,ಕುಡೊಂಜಿ ಕಡೆಟ್ ಕಲ್ಯಾಣಿನಂಚಿನ ಗುಣವಂತೆದಿ ಪೊಣ್ಣನ್ ಎಂಕ್ ಕಟ್ಟ್‌ಕೊರ್ಯೆತಾ ಆಯನ್ ದೀಯೆರೆಬಲ್ಲಿ ಪನ್ಪಿ ಪಗೆತಗ್ಗಿ ಕೊದ್ಯೊಂತುಂಡು.ನೇತ ಮಾತೆತ ನಡೂಟು ಕರ್ಪಿಲ್ಲ್‌ದ ಅದೆತುಲಯಿ ಇರ್ಲ್‌ನೆಂಚಲ ಬೊಲ್ಪು ಮಲ್ತೊಂಡೆರ್..
ಗೋಪಾಲನ ಪುನ ಆಸೊತ್ರೆರ್ದ್ ಆಯನ ಇಲ್ಲಗ್ ಬರೊಂದುಂಡು,ಗೋಪಾಲನೆರ್ದ್ ದುಂಬುಡು ಮಾದವನ ಗಾಡಿಲ ಉಂಡು.ಗಾಡಿ ಬತ್ತ್ ಬತ್ತ್‌ದ್ ಗೋಪಾಲನ ಇಲ್ಲಗೆತ್ತ್ಂಡ್,ಏಪಲ ನಡತೊಂದು ಬರ್ಪಿನಾಯನ್ ಇನಿ ನಾಲ್ ಜನ ತುಂಬೊಂದು ಬರೊಂದುಲ್ಲೆ‌ರ್,ಏಪಲ ಬನ್ನಗ ಬೊಡೆದಿಗ್ ಕಡ್ಲೆ ಕೊನವೊಂದು ಬರ್ಪಿನಾಯೆ ಇನಿ ಕಾಲಿ ಕೈಟ್ ಬೈದೆ.ಅಂಚೆನೆ ಬೊಲ್ದು ಕುಂಟೊಂಜಿ ಬುಡ್ದು ಕಾಲಿ ಮೈಟ್ ಬೈದೆ.ದೂರೊರ್ದು ಬರ್ಪಿ ಕಂಡನಿಯನ್ ತೂದು ಕಲ್ಯಾಣಿ ಎದ್ಕೊನಿಯೆರೆ ಪಾರೊಂದು ಬರೊಂದುಲ್ಲಲ್,ಆಲ್ ಬರ್ಪುನ ಬಿರ್ಸ್‌ಗ್…. ?
