ಬರವು: ✒️ ಚೇತನ್. ವರ್ಕಾಡಿ..
ಬಾನೊಡು ಮೂಡಾಯಿದ ಬಾಕಿಲ್ ದೆತ್ತ್‌ದ್ ನೇಸರದೇಬೆರ್ ನಿಲ್ಕೊಂದುಲ್ಲೆರ್,ತೆಲಿಕೆದ ಪೂನೀರ್ ಬೂಮ್ಯಪ್ಪೆ ಜಾಲ್‌ಗ್ ಪಾರಾವೊಂದುಲ್ಲೆರ್.ಆರ್ ನಿಲ್ಕಿನ ಸಾತ್‌ಗ್ ತ್ಯಾಂಪಣ್ಣನ ಜಾಲ್‌ಡಿತ್ತಿ ಕುಪುಲೆ ಮುಲ್ಲೆನ್ ಅರಲ್ತ್‌ದ್ ತಾನೇ ಬೊಲ್ಪುಮಲ್ತಿಲೆಕ ಕೋಂಕನಾಲಿನ್ ಬಾನೊಗೇರ್ತ್‌ದ್ ಕೆಲೆಪೆರೆ ಸುರುಪತ್ಯೆ.ಉಂದು ಬೊಲ್ಪಾಂಡ್ ಪನ್ಪಿನೆಕ್ ನಿಚ್ಚೊದ ಮೂರ್ತದೀಲೆಕ.ಇರ್ಲ್‌ದ‌ಡಿ ಅರ್ಕ್‌ದ್ ಬೊಲ್ಪುದಿಡೆ ಮೆನ್ಕಿ ಗಲಿಗೆ.
ಅವ್ ಜೋಕುಲೆಗ್ ಸಾಲೆ ಮುಗಿದ್ ರಜೆ ತಿಕ್ಕಿ ಪೊರ್ತು. ತ್ಯಾಂಪಣ್ಣನ ಪುಲ್ಯಲ್ಲು ಮಾತ ಅಜ್ಜೆರ್‌ನಡೆ ಬಿನ್ನೆರ್ ಕಟ್ಟೊಂದು ಬೈದಿನ ಗೌಜಿ.ದುಂಬುದ ಕಾಲ ಪಂಡ ಅಂಚೆನೆ, ಅಜ್ಜಿಲ್ಲ್ ಪನ್ಪಿನ ಗಟ್ಟಿ‌ದ ಕುಬಲ್ಗ್ ಐತವೇ ಆಯಿನ ಗಿಡ್ಪು ಇತ್ತ್ಂಡ್.ರಜೆ ತಿಕ್ಕೆರೆ ಪುರ್ಸೋತಿಜ್ಜಿ ಅಜ್ಜಿಲ್ಲಡ್ ಪೋದು ಗೊಬ್ಬುಕುಸಾಲ್ ಕರಿತಿನ ದಿನೊಕುಲೇತಾ.ಆನಿದ ಆ ಪೊರ್ಲುನು ಇನಿಕ್ಲ ತ್ಯಾಂಪಣ್ಣನ ಇಲ್ಲಡ್ ತೂವೊಲಿ.ಅಜ್ಜೆರ್ನೊಟ್ಟುಗು ಬೋಂಟೆದ ಕತೆ ಕೇನೊಂದು,ದೊಡ್ಡನೊಟ್ಟುಗು ಬೆನ್ನಿಸಾಗೋಲಿದ ಕತೆ ಕೇನುನವೇ ಈ ಜೋಕುಲೆಗೊಂಜಿ ಪರ್ಬ.ತ್ಯಾಂಪಣ್ಣಗ್ ಮೂಜಿಲ ಪೊಣ್ಣು ಜೋಕುಲೆ ಆಯಿನೆರ್ದಾವರ ಈ ಗೌಜಿ ಅಕ್ಲೆಗ್ ವೊರ್ಸೊಗೊರ ಮಾತ್ರ ತಿಕುನೆ.ಮೂಜಿ ಪೊಣ್ಣುಲೆಡ್ ಕಡೀರ್ದಾಲ್ ಸುಶೀಲಾ,ನಡುವನ್ದಿ ಸುಗುಣ ಬೊಕ್ಕ ಅಕೇರಿದಾಲ್ ಸುಜಾತ.ಮೂವೆರ್ ಜೋಕುಲ್ನೆಟ್ ಸುಗುಣ ಬೊಕ್ಕ ಸುಜಾತ ತನ್ನ ಕಂಡನಿಯನೊಟ್ಟು ಬೊಂಬಾಯಿಡ್ ಬದ್ಕ್‌ದ ಕಾರಿ ಕಟ್ಟೊಂಡೆರ್ಂಡ,ಕಡೀರ್ದಾಲ್ ಸುಶೀಲನ್ ತನ್ನ ತಂಗಡಿ ಮಗೆ ರಘುರಾಮಗೆ ಮದ್ಮೆ ಮಲ್ತ್ ಕೊರ್ನೆರ್ದಾವರ ಲೆಪ್ಪುಲ್ಪುಗ್ ಒರ್ತಿ ಮಗಲ್ ಕೈತಲ್ದ ಊರುಡೇ ಉಲ್ಲಲ್.ತ್ಯಾಂಪಣ್ಣನ ಕೈದಾರೆದ ಬೊಡೆದಿ ಪಾರ್ವತಿಯಕ್ಕ,ವೊರ್ಸ ಇಡೀ ಪುಲ್ಯಲ್ಲೆಗ್ ಏಪ ರಜೆ ತಿಕುನೇಂದೆ ಎಕ್ಕಲೆಕ್ಕಲ್ದ್ ಕಾತೊಂದುಪ್ಪುವೆರ್.ಇಜಿಂಡ ಆತ್ ಮಲ್ಲ ಇಲ್ಲಡ್ ಬೇಲೆದಕ್ಲ್ ಬುಡ್ಂಡ ಅಕ್ಲ್ ಇರ್ವೆರೇ ಉಪ್ಪುನೆ.ಇತ್ತೆ ಬೊಂಬಾಯಿರ್ದ್ ,ಬೊಕ್ಕ ಊರುರ್ದು ಮಾತ ಪುಲ್ಯಲ್ಲು ಬತ್ತ್‌ದ್ ಪಾರ್ವತಿಯಕ್ಕ‌ನ ಇಲ್ಲ್ ಒಕ್ಕೆಲಾತ್ಂಡ್,ಏಪಲದಲ್ಕನೇ ನೇಸರ ದೇಬೆರ್ ನಿಲ್ಕ್‌ನಗ ಆ ಸಾದಿಯೇ ಬರೊಂದಿತ್ತಿ ಬರಿತಿಲ್ಲದ ಕಲ್ಯಾಣಿನ ಕಂಡನಿ ಗೋಪಾಲೆ ಆನಿ ಬರ್ಪುನನೇ ತೋಜ್ಜಿ.ಪಾರ್ವತಿಯಕ್ಕ ಕೂಲಿಮೋನೆದೆಕ್ಕ್‌ದ್ ಜಾಲಕೋಂಟುನೊರ ಎಕ್ಕಲ್ತ್ ತೂಪೆರ್ ಆರೆಗೇ ಆಚಿರ…ಉಂದು ದಾದ ಕತೆಪ್ಪಾಂದ್…?
ಗೋಪಾಲನ ಬದಲ್ ಆಯನ ಬೊಡೆದಿ ಕಲ್ಯಾಣಿ,ಅರೆ ಕಣ್ಣ್‌ಗಾಂಜ್ಯಲ್.ಕಂಡನಿ ಲೆತ್ತ್ಂಡಲ ತತ್ತ್‌ದ್ಲ ಪಿದಯಿದ ಬೇಲೆಗ್ ಬರಂದಿ ಕಲ್ಯಾಣಿನ್ ತೂದು ಆರೆಗೇ ಆಚಿರ..? ಉಂದೆಯೆ ವೋಲ್ಲರ್ ವೊರ ಪಿದಯಿ ಬಲೆಗೆ ಪಂಡ್ದ್ ಬೊಡೆದಿ ಲೆಪ್ಪುನ ಕೇಂದ್ ಪಿದಯಿ ಬತ್ತಿನ ತ್ಯಾಂಪಣ್ಣೆ ಕನ್ನಡಕೊನು ವೊಚ್ಚಿದ್ ,ಅಂಚಿಗೇ ತೂಯೆರ್.ಎಲಕತೆನೇ ಉಂದೆಂಚಿನ ಕತೆಯ ಪಾರ್ವತಿ..? ಈತ್ ಪನೊಡಾಂಡ ಪುಲ್ಯಲ್ಲು ಪೂರ ದುರ್ಬಿನಿ ದೀಲೆಕ ಅಜ್ಜೆರ್ ತೂಪಿ ಸಾದಿಯೇ ತೂವೊಂದುಲ್ಲೆರ್.ಕಲ್ಯಾಣಿನ ಪುಲ್ಯದ ಬಿರ್ಸ್‌ದ ನಡಕೆ ಸಾರ ಪ್ರಸ್ನೆಗ್ ವೀಲ್ಯ ಕೊರ್ಲೆಕ ಇತ್ತ್ಂಡ್..
ದುಂಬರಿಯುಂಡು
