ತುಳು ಕಥೆ
ಚೇತನ್ ವರ್ಕಾಡಿ
ಕೆದುತ ಬರೀಟ್ ಅಂಗಿದಾಂತೆ ಬಾಲೆ ಒರಿ ಚಳಿಟ್ ನಡ್ಗೊಂದುಲ್ಲೆ.ಬೆಮ್ಮೆರ್ ಬರೆಯಿ ಔಸ ಇತ್ತ್ಂಡ ಇಸಲ ಅಮೂರ್ತ ಆದ್ ಪಲಿಪು ಪನ್ಪಿನೆಕ್ ಸಂಪತೇ ಸಾಕ್ಷಿ.ಅಂಗಿದಾಂತೆ ಇತ್ತಿನ ಆನನ್ ತೂದು ರಗು ಸುಮತಿನ ಮಗೇಂದೆ ಅಂದಜಿ ಪತ್ಯೆ.ಸೇರ್ದಿನ ಮಾತೆರೆಗ್ಲ ಸಂಪತ್ನ ಕತೆ ತೆರಿದಿಜ್ಜಾಂಡ್,ರಗು ಆಯನ ಇಸಯೊನು ಪಟ್ಟೊನ್ನಗ ಮಾತೆರೆ ಮನಸ್ ಚಂಡಿಯಾಂಡ್.ಅಪ್ಪೆನ ಕೈರ್ದ್ ತತ್ತಿನ ಸಂಪತ್ ಕಾಡ್ಗ್ ಪೊಗ್ಗುನಗ ಅವ್ಲೇ ರಿಸಲ್ ಪಾಡೊಂತಿ ನಾಯಿಲೆ ಬಾಯಿಗ್ ತಿಕ್ಯೆ,ದುಂಬೇ ಬಲಿಪುನಾಯನ್ ತೂಯಿನ ಕಾಟ್ ನಾಯಿಲು ಬೆರಿಪತ್ಯೆರುಂತ್ಯ,ನಾಯಿದ ಬಲಿಪುಗು ಸಂಪತ್ಗ್ ಪಾರ್ಯೆರಾಯಿಜಿ,ಅಡೇಗೆ ಕುತ್ತಿ ತಿಕಲ್ದ್ ಬೂರ್ನ ಸಂಪತ್ನ ಮೇಲ್ಗ್ ನಾಯಿಲು ಬೂರ್ಯ ಅಂಗಿನ್ ಪರ್ತೊಯ್ಪುನಗನೆ,ಜೂವೊದ ಮರ್ಕೊಗು ಅಲ್ಪರ್ದ್ ತಪ್ಪಾಯಿ ಆನ್ ಒಯ್ಟೊಯ್ಟೆನಾ ಪೋದು ಬೂರ್ನೆ ಕಾಡ ಬರೀತ ಸಾದಿಡಿತ್ತಿ ತೋಟದ ಕೆದುಕ್,ಆಯನ್ ಗಿಡತೊಂದು ಬತ್ತಿ ನಾಯಿಲೆಗ್ ತಿಕಿನಿ ರಗುನ ಜಾಲ್.ಕೆದುಕು ಬೂರಿನ ಸಂಪತ್ ರಡ್ಡ್ ಸರಿ ಮುರ್ಕುಲಕ್ಕ್ದಾನಗ ಮಿತ್ತ್ರ್ದ್ ಬತ್ತಿನ ಪಂಪುದ ಒಯರ್ ಆಯನ ಕೈಕ್ ತಿಕ್ಂಡ್.ಸೈಪುನಾಯಗ್ ಪತ್ತೆರೆ ಕುಜಲ್ ತಿಕ್ಂಡಲ ಯಾವುಂಡುಗೆ ಔಸ ಇತ್ತ್ಂಡ ಆಯೆ ಬದ್ಕ್ದೊರಿಪೆಗೆ,ಸಂಪತ್ನ ಕತೆಲ ಅಂಚೆನೆ,ಆಯಗ್ ದೇವೆರ್ ಕೊರಿ ಔಸ ಮುಗಿದಿಜ್ಜಾಂಡ್.ಜೂವದ ಮರ್ಕೊಡು ಒಯರ್ನ್ ಪತೊಂದು ಕುಂಬರೊಂದು,ಪೋಡ್ಯೆಂದುಅರಬಾಯಿ ದೀಯೆ,ಬುಲಿತೆ ಪುಲ್ಯಾನಗ ಆಯನ ಸೊರ ಕೇಂಡಿನಕ್ಲ್ ಊರಸುತ್ತೊರ್ದು ಪಾರ್ ಬತ್ತ್ದ್ ಸಂಪತ್ನ ಜೂವೊನೊರಿತೆರ್.ಜಾತ್ರೆಗ್ ಪೋಯಿ ಅಪ್ಪೆ ಮಗನ ಕತೆ ಒಂಜಿರ್ಲ್ ಕರಿನಗ ಎಂಚೆಂಚಿನನಾ ಆದ್ ಕಡೇಕ್ ಒಂಜಿ ಕೋಡಿಗೆತ್ತ್ಂಡ್.ಅಪ್ಪೆನೇ ಕಲಂಬರೊಂತಿ ಸಂಪತ್ಗ್ ತನ್ನ ಅಪ್ಪೆ ಉಲ್ಲಲ್ ಪನ್ಪಿ ಸತ್ಯ ತೆರಿನಗ,ಬೇನೆದ ನಡುಟ್ಲ ಆ ಬಾಲೆದ ಮೋನೆಡರಲಿ ಕೊಸಿತ ತೆಲಿಕೆಗ್ ಬಿಲೆಕಟ್ಟೆರಾವಂದಿ.ಸತ್ಯಸಂಗತಿ ತೆರಿದ್ ಮಾತ ಆನಗ,ಜನಬಿರಿಂಡ್.ರಗುಗು ಆತ್ನೇಟ ಎತೆದಿಂಜಿದಿತ್ತ್ಂಡ ಇತ್ತೆ ಮನಸ್ಗೆಂಚಿನವೋ ಸಂತೋಸು,ಸುಮತಿನ ಬೇನೆದ ಮೋನೆ ,ಸಂಪತ್ನ್ ತೂಂಡ ಸಂತೋಸುಡು ಅರಲೂಂದ್ ಮನಸ್ಡೇ ಎನ್ನೊಂಡೆ.ಸುರೂಕು ಬಾಲೆನ್ ಅಪ್ಪೆನ ಮಟ್ಟೆಲ್ಗ್ ಪಾಡ್ದ್,ಬೊಕ್ಕ ತಾಗ್ನ ಗೀರ್ ಗಾಯೊಲೆಗ್ ಮರ್ದ್ ಪೂಜೆರೆ ಆಸೊತ್ರೆಗ್ ಕೊನೊಯೀಂದ್ ಎನ್ನಿನಾಯೆ,ಅಲ್ತ್ ಸಂಪತ್ನ್ ಲೆತೊಂದು,ಇಲ್ಲಡೆ ಬತ್ತೆ,ದೂರೊರ್ದೇ ಮಗಕ್ ಅಪ್ಪೆನ್ ತೂಪುನ ಕೊಸಿಯಾಂಡ,ರಗುಗು ಸುಮತಿನ ತೆಲಿಕೆದ ಮೋನೆನ್ ತೂಪಿ ಗೌಜಿ,ಜಾಲ್ಗ್ ಬತ್ತ್ ಎತ್ತ್ಲೆಕಾನೆ,ಜಾನಕಿನೊರ ,ರಡ್ಡ್ಸರಿ ಲೆತ್ತೆ,ಮೂಜಿ ಸರಿ ಲೆತ್ತೆ ,ಇಲ್ಲ್ ಬಾಕಿಲ್ ಪಾಡ್ದ್ಂಡ್,ಜಾನಕಿಲ ಮಿನ್ಕುಲ ಸೊರ ಕೇಂದ್ ಪಿರವುರ್ದ್ ಬರೊಂದುಲ್ಲೆರ್,ಆಂಡ ಸುಮತಿ ಅಕ್ಲೆನೊಟ್ಟುಗಿಜ್ಜಲ್.ಸುಮತಿ ಓಲ್ಲಲ್ಯಾ ಜಾನಕೀಂದ್ ರಗು ಕೇನ್ನಗ,ಆಲ್ನ ಬಾಯೇ ಮಗುರುಜಿ…
ದುಂಬರಿಯುಂಡು
