ಕಾಸ್ರೋಡು ಜಿಲ್ಲೆದ ಮಂಜೇಶ್ವರ ತಾಲೂಕುದ ವರ್ಕಾಡಿ ಗ್ರಾಮೊದ ಪಾವುಲಡ್ ಕರಿನ ಮುಪ್ಪತ್ತೈನ್ ವೊರ್ಸೊರ್ದಿಂಚಿ ಸಾಮಾಜಿಕ ಬೆನ್ಪುಡು ಬೆಗರ್ ಜಪುಡಾವೊಂದು ಇನಿಕಾನಗ ಹಿರಿಯ ಕಿರಿಯ ಪದುಕೆರ್ನ ನಿರೆಲ್ ನಡಕೆದ ಬಲಕೆಡ್ ಬುಲೆಯಿನ ಸಂತೋಷ್ ಫ್ರೆಂಡ್ಸ್ ಕ್ಲಬ್ ಇನಿಕಾನಗ ಜಿಲ್ಲಾರಾಜ್ಯೋತ್ಸವ ಮಾನಾದಿಗೆದ ಮಣೆಕೆತ್ತ್ಂಡ್ ಪನ್ಪಿನವು ಮಲ್ಲ ಕೊಸಿತ ಸಂಗತಿ.ಕರಿನ ಮುಪ್ಪತ್ತೈನ್ ವೊರ್ಸೊರ್ದು ಹಿರಿಯ ಸದಸ್ಯೆರ್ನ ಬೆಗರ್ದ ಬೆನ್ಪುಡು ಉಂಡಾಯಿನ ಈ ಸಂಸ್ಥೆ ಇನಿಕಾನಗ ಸಾಮಾಜಿಕ, ಸಾಂಸ್ಕೃತಿಕ,ಸಾಹಿತ್ಯಿಕ,ಕ್ರೀಡೆ,ಇಂಚ ಮಾತ ಕ್ಷೇತ್ರೊಗುಲ ಪಜ್ಜೆ ದೀವೊಂದು,ಗ್ರಾಮೀಣ ಪ್ರದೇಶೊಡೊಜೊಂಜಿ ಪೊಸ ಕ್ರಾಂತಿ ಮಲ್ತ್ ಜನೊಕುಲೆನ ಉಡಲ್ಗ್ ಕೈತಲಾಯಿನ ಸಂಘಟನೆ.ಸಂತೋಷ್ ಫ್ರೆಂಡ್ಸ್ ಕ್ಲಬ್‌ದ ನಿರೆಲಡಿಟ್ ಸಂತೋಷ್ ಫ್ರೆಂಡ್ಸ್ ಕ್ಲಬ್ ಲೈಬ್ರೆರಿ, ಪ್ರೀತಿ ಮಹಿಳಾ ಸಮಾಜ,ಸಂಪ್ರೀತಿ ಡ್ಯಾನ್ಸ್ ಟ್ರೂಪ್, ಸಂತೋಷ್ ಕಲಾವಿದೆರ್ ಪಾವಳ,ಇಂಚ ಒಂಜಾತ್ ಪಿಲ್ಲೆಲು ಪುಟ್ಟೊಂದಿನಿ ಅಪ್ಪೆಬೇರ್‌ದೊಟ್ಟುಗೊಂಜಾದ್ ಊರುಡೊಂಜಿ ಗಟ್ಟಿದ ಗೋಲಿದ ಮರ ಆದ್ ಬುಲೆದುಂತುದುಂಡು.ಸಂತೋಷ್ ಫ್ರೆಂಡ್ಸ್ ಕ್ಲಬ್‌ದ ನಿರೆಲ್ಡ್ ಬತ್ತಿನ ಏತೋ ಪ್ರತಿಭೆಲು ಇನಿಕಾನಗ ಜಿಲ್ಲೆ,ರಾಜ್ಯ ಮಟ್ಟೊಡು ಅವ್ವೇತೊ ಸಾಧನೆ ಮಲ್ತ್‌ದ್ ಪುದರ್ ಕೊನತಿನಕ್ಲ್ ,ಕೊನವೊಂದುಪ್ಪುನಕ್ಲ್ ಈ ಸಂಸ್ಥೆಡುಲ್ಲೆರ್.ಶ್ರಮದಾನ,ರಕ್ತದಾನ, ಕಸ್ಟೊದ ಕೈಕ್ ಸಹಾಯ ಹಸ್ತ, ಸಾಂಸ್ಕೃತಿಕ ಕಾರ್ಯಕ್ರಮ,ಕ್ರೀಡಾ ಪಂತೊಲು,ನಾಟಕ, ನೃತ್ಯ, ಗ್ರಂಥಾಲಯದ ಕಾರ್ಯಕ್ರಮ ಇಂಚ ಮಾತ ಕಾರ್ಯಕಜ್ಜೊಲೆನ್ ನಡಪಾವೊಂದು ಊರುಗೊಂಜಿ ಪೇರಬೊಲ್ಪುನು ಕೊರ್ತಿನ ನಾಡ್‌ಕೊಂಡಾಡಿನ ಪುಗಾರ್ತೆದ ಸಂಸ್ಥೆ. ರಾಜಕೀಯ ರಹಿತವಾದ್ ಸರ್ವೆರೆನ್ಲ ಮೋಕೆಡೆದ್ಕೊಂದು ಸೌಹಾರ್ದತೆದ ನಿರೆಲ್ಡ್ ನೆಗತೊಂದು ಊರು ಪರವೂರುದಕ್ಲೆನ ಮೋಕೆ ಅಭಿಮಾನ ಪಡೆತಿನ ಸಂಸ್ಥೆ ಸಂತೋಷ್ ಫ್ರೆಂಡ್ಸ್ ಕ್ಲಬ್.ತನ್ನ ಸಾಧನೆದ ಬಲಕೆಗ್ ಒಂಜಾತ್ ಮಾನಾದಿಗೆ ಪಡೆವೊಂದು ಬೈದಿನ ಕೂಟೊಗಿತ್ತೆ ಜಿಲ್ಲಾ ರಾಜ್ಯೋತ್ಸವದ ಮಾನಾದಿಗೆಲ ವೊಲಿದ್ ಬತ್ತಿನವು ಸಂಘಟನೆದ ಬೆನ್ಪುದ ಚಾಕಿರಿಗ್ ತಿಕ್ಕಿನ ಬೊಲ್ಕಿರಿದ ಬೊಟ್ಟು….
