ಬರವು: ಚೇತನ್ ಅಮೀನ್
ಲೋಕೊಡು ಪೂರೆರೆಗ್ಲ ಅಮ್ಮೆರ್ ಉಲ್ಲೆರ್ಂದ್ ಎಂಕ್ಲ ಒಂಜಿ ಅಮ್ಮೆರ್…
ಜಗತ್ತ್ ಡ್ ವಾ ಮೂಲೆಗ್ ಪೋಂಡಲ ಎನ್ನ ಅಮ್ಮೆರ್ನಂಚಿನ ಜನ ತಿಕ್ಕಂದ್. ಪರ್ಪೆಲೆರೆನ ಅಧ್ಯಕ್ಷೆ ರಣ ಕುಡಿ ಪುರುಷೆ, ಪರಿಯೆರೆ ಸುರು ಮಲ್ತ್ಂಡ ಕೊಡಪನ ಕೊಡಪನ ಗಂಗರ ಜಿಂಜವುನ ಜನ. ಕೆಲವು ಸಲ ಅಮ್ಮೆರೆನ್ OLX ಡ್ ಸೇಲ್ ಮಲ್ಪುಗಂದ್ ಆವೊಂದಿತ್ತ್ಂಡ್ ಆ ನಮೂನೆದ ಲೂಟಿದ ಅಮ್ಮೆರ್….!ಈ ಆಟಿದ ಅಮವಾಸ್ಯೆ ಬನ್ನಗ ಎನ್ನ ಲೂಟಿದ ಅಮ್ಮೆರೆನ ಬಾರೀ ದುಂಬುದ ಒಂಜಿ ಕಥೆ ನೆನಪಾಪುಂಡು.
ಎಂಕಪಗ ಪತ್ತ್ ಪದ್ರಾಡ್ ವರ್ಷ ಅದುಪ್ಪು, ಆಟಿದ ಅಮವಾಸ್ಯೆದ ದುಂಬುನಾನಿ ರಾತ್ರೆ ಮೂಂಕು ಮುಟ್ಟ ಪರ್ದ್ ಮುಗಲಾದ್ ಕುಮೆದ್ ಕದೆಲ್ದಿತ್ತಿನ ಅಮ್ಮೆರ್ ಎನನ್ ಲೆತ್ತ್ ದ್ “ಎಲ್ಲೆ ಪುಲ್ಯಕಾಂಡೆ ಪಾಳೆದ ಕೆತ್ತೆ ಪತ್ತೊಂದು ಬರಿಯೆರೆ ಗುಡ್ಡೆಗ್ ಪೋಯೆರುಂಡು ಲಕ್ಕನಗ ಬೇಗ ಲಕ್ಕೊಡು ಇಜ್ಜಿಂಡ ಬೆರಿತ ಚೋಲಿ ಜಾರಾವೆಂದ್” ಉಗ್ರಡ್ ಪಂಡೆರ್, ಆ ಜನಕ್ ಸುರುಕೆ ಎನನ್ ತೂಂಡ ಅಪುಜಿ, ಅಮ್ಮೆರೆನ ಒಟ್ಟಿಗೆ ಓಡೆ ಪೊಯೆರೆಲ ಮನಸ್ ಇಜ್ಜಿಂಡಲ ಪೆಟ್ಟ್ ದ ಪೋಡಿಗೆಗ್ ಲೆತ್ತಿನಡೆ ದಾನೆ ದಾದಂದ್ ಕೇನಂದೆ ಪೋವೊಂದಿತ್ತೆ….!
ಅಮ್ಮೆರೆಗ್ ಈ ಪಾಳೆದ ಕೆತ್ತೆದ ವ್ಯಥೆಟ್ ರಾತ್ರೆ ನಿದ್ರೆನೆ ಬೈದಿಜಿಂಡ್ ತೋಜೊಡು ಮನದನಿ ಬೊಲ್ಪು ಅಪಿನೆರ್ದ್ ದುಂಬೆ ಎನನ್ ಕಾರ್ ಡ್ ಕುಟ್ಟುದು ಲಕ್ಕಯೆರ್ “ಲಕ್ಕ್ ಲಕ್ಕ್ ಪೋಯಿ ಪೋಯಿ ಚೀಲ ಪತೊನುಂದ್” ಪಂಡೆರ್, ಅಮಸರಮಸರೊಡು ಲಕ್ ದ್ ಮೋನೆಗ್ ನೀರ್ ಪಾಡ್ ದ್ ಸಂಗಿಸ್ ದ ಚೀಲ ಪತ್ತೊಂದು ನಿದ್ರೆದ ಕಣ್ಣ್ ಡ್ ಅರ್ನ ಪಿರವುಡೆ ಪೋಯೆ. ಅಮ್ಮೆರೆಗ್ ಒರಿ ಅರ್ನ ಗುಣತನೆ ಮಲ್ಲ ಗಡಂಗ್ ಚಡ್ಡಿ ದೋಸ್ತಿ ಇತ್ತೆರ್, ಅರ್ನ ಪುದರ್ ಗಿರ್ಗೋಲ್ ಪೊರ್ಬುಲುಂದು ಓಡೆ ಪೋನಗಲ ಒಟ್ಟಿಗೆ, ಅಂಚ ಸುರುಕು ಆ ಜನತ ಇಲ್ಲಗ್ ಪೋದು ಬೊಬ್ಬೆ ಪಾಡ್ ದ್ ಲಕ್ಕಯೆರ್, ದುಂಬುನಾನಿ ಮುಗಲಾದ್ ಜೈದಿನ ಗಿರ್ಗೋಲು ಪೊರ್ಬುಲು ಅಮ್ಮೆರೆನ ಬೊಬ್ಬೆ ಕೇಂದ್ ಬರೆ ಲಾಗಿದ್ ಕೈಟ್ ಟಾರ್ಚ್ ಪತ್ತೊಂದು ಪಿದಡಿಯೆರ್…!
ಈ ಮೂಂಕು ಮುಟ್ಟ ಟೈಟ್ ಮ್ಯಾನ್ ಲು ಟಾರ್ಚ್ ಪತ್ತೊಂದು ಎದುರೆದುರು ಪೋನಗ ಯಾನ್ ಸಂಗಿಸ್ ದ ಚೀಲ ಪತ್ತೊಂದು ಕತ್ತಲೆಗ್ ಅಕ್ಲೆನ ಪಿರವುಡೆ ಪೋವೊಂದಿತ್ತೆ. ಆ ಗುಡ್ಡೆ ಎಲ್ಯ ಗುಡ್ಡೆ ಅತ್ತ್ ಮಲ್ಲ ಕಾಡ್ದಂಚಿನ ಜಾಗೆ, ಈ ಮುಗಲ್ ಮುದರನಕುಲು ದುಂಬಿನಾನಿ ಗುರ್ತ ಪಾಡ್ ದ್ ಬೈದಿನ ಪಾಳೆದ ಮರ ಟಾರ್ಚ್ ಪತ್ತ್ ದ್ ಏತ್ ನಾಡ್ಂಡಲ ತಿಕ್ಕೊಂದಿಜ್ಜಿ, ಈ ರಣ ಕುಡಿಕುಲು ಅಕಲ್ ಉಪ್ಪುನಗ ತೂತಿನ ಮರ ಅಮಲ್ ಡುಪ್ಪುನಗ ತಿಕ್ಕೊಡೆ, ಕತ್ತಲೆಗ್ ನಾಡ್ ನಾಡ್ ದ್ ಸಾಕಾದ್ ಪೋಂಡು…..!
ಗುಡ್ಡೆ ಕಾಡ್ ಡ್ ಬೂರೊಂದು ಲಕ್ಕೊಂದು ಲಾಗ್ಯೊಂದು ಪರಡೊಂದು ಪೊಪಿನ ಎನನ್ ಒಂಜಿ ಮಲ್ಲ ಮರತ ಮುದೆಲ್ಡ್ ಕುಲ್ಲದ್ ರಡ್ಡ್ ಜನಲ ಸೊಂಟಡ್ ತಿಕ್ಕದಿನ ಕುಪ್ಪಿ ಗಂಗರನ್ ಚಿಯರ್ಸ್ ಮಲ್ತ್ ಪರ್ದ್ “ಈ ಮುಲ್ಪನೆ ಕುಲ್ಲು ಇತ್ತೆ ಬರ್ಪಂದ್” ಪಾಳೆದ ಮರನ್ ನಾಡೊಂದು ಪೋಯೆರ್. ಅರ್ಧ ಮುಕ್ಕಾಲ್ ಗಂಟೆ ಬುಡ್ದು ಕುಡ ಬತ್ ದ್ ಎನನ್ ಲೆತ್ತೊಂದು, ಕುಡ ಒಂಜಿ ಗಂಟೆ ಪಾಳೆದ ಕೆತ್ತೆದ ಮರನ್ ನಾಡೊಂದು ನಾಡೊಂದು ಎತ್ ದೂರ ಪೋತನ ವಾ ಊರುಡು ಉಲ್ಲನಂದ್ ಈ ಕುಡಿ ಪುರುಷನಕ್ಲೆಗೆ ಅಂದಾಜವೊಂದಿಜ್ಜಿ….!
ಸಾದಿ ತತ್ತ್ ದ್ ಏರೆರ್ನ ಬಿತ್ತಿಲ್ ದ ತಡಮೆ ಲಾಗ್ಯೊಂದು ಒಂಜಿ ಕಡೆ ಬನ್ನಗ ನಾಯಿ ಕೊರೆಪುನೆನ್ ಕೆನ್ದ್ ಇಲ್ಲದಕುಲು ಲೈಟ್ ಪಾಡ್ ದ್ ಪಿದಯಿ ಬತ್ತೆರ್. ಆ ಇಲ್ಲದಕ್ಲೆಗ್ ಎನ್ನ ಅಮ್ಮೆರ್ನಲ ಗಿರ್ಗೋಲು ಪೊರ್ಬುಲೆನಲ ಗುರ್ತ ಇತ್ತ್ಂಡ್, ನಿಕುಲು ದಾದ ಮಲ್ಪುನು ಮಾರ್ರೆ ಈ ಗುಡ್ಡೆಡ್ ಪನ್ನಗ “ಎಂಕುಲು ಪಾಳೆದ ಕೆತ್ತೆ ಕನಯೆರೆ ಬೈದಿನಿ ಪಂಡೆರ್”, “ಓ ದೇವರೇ ಪಾಳೆದ ಕೆತ್ತೆ ದೆಪ್ಪೆರೆ ಈ ಬಾಲೆನ್ ಪತ್ತೊಂದು ರಡ್ಡ್ ಗಂಟೆ ರಾತ್ರೆಗ್ ದಾಯೆ ಬೈದರ್ ಮಾರ್ರೆ” ಪನ್ನಗ ರಡ್ಡ್ ಜನತಲ ಪರ್ತಿನ ಪೂರ ಜತ್ತ್ ದ್ ಪೋದು ಮೋನೆ ಮೋನೆ ತೂವೊಂದುಲ್ಲೆರ್. ಎನನ್ ಎನ್ನ ಅಮ್ಮೆರ್ ಪದ್ರಾಡ್ ಗಂಟೆ ರಾತ್ರೆಗ್ ಲಕ್ಕದ್ ಲೆತ್ತೊಂದೂ ಬೈದಿನಿ, ಆ ನಡು ರಾತ್ರೆಗ್ ಆ ಮಲ್ಲ ಮರತ ಮುದೆಲ್ಡ್ ಒರಿಯೆ ಅರ್ದ ಮುಕ್ಕಲ್ ಗಂಟೆ ಕುಲ್ಲಿದಿನೆನ್ ಎನ್ನ್ ದ್ ಪೋಡಿದ್ ಲೋಕ ಇಜ್ಜಿ. ಆ ಇಲ್ಲದಕುಲು ಪುಲ್ಯ ಅಪಿನೆಟ ಮುಲ್ಪನೆ ಜೆತ್ತ್ ದ್ ಬೊಕ್ಕ ಪಾಳೆದ ಕೆತ್ತೆ ಪತ್ತೊಂದು ಪೊಲೆಂದ್ ಪಂಡೆರ್. ಅಮ್ಮೆರ್ಲ ಗಿರ್ಗೊಲ್ ಪೊರ್ಬುಲುಲ ಸೊಂಟೊಡ್ ಇತ್ತಿನ ಒರಿದಿನ ಕುಪ್ಪಿ ದೆತ್ತ್ ದ್ ತಾಂಟದ್ ಚೀಯರ್ಸ್ ಪಂದ್ ಜ್ಜಾಲಿಡ್ ಜಗಲಿಡ್ ಕಂಕನೆ ಮಗಿರಿಯೆರ್, ಅಕ್ಲೆಗ್ ಗುಡ್ಡಗಾಡು ಪ್ರದೇಶಗ್ ಪ್ರವಾಸಗ್ ಬೈದಿಲೆಕಾತ್ಂಡ್…..!
ಮನದನಿ ಕಾಂಡೆ ಸಂಗಿಸ್ ದ ಚೀಲಡ್ ಆ ಇಲ್ಲದಕುಲು ಕೊರ್ನ ಪಾಳೆದ ಕೆತ್ತೆನ್ ಪತ್ತೊಂದು ಯಾನೊರಿಯೆ ಇಲ್ಲಗ್ ಬತ್ತೆ. ಟೈಟಾತಿನ ವಿಜಯ ಮಲ್ಯನ ರಡ್ಡ್ ವಿಮಾನೊಲು ಆ ಇಲ್ಲದ ಜಗಲಿಡ್ ಪತನ ಆದಿತ್ಂಡ್, ಯಾಪ ಲಕ್ಕೊಂದು ಬೈದೆರ ಗೊತ್ತಿಜ್ಜಿ..
ಎರ್ನ ಸಹವಾಸಾಂಡಲ ಆವು ಈ ಲೂಟಿದ ಅಮ್ಮೆರೆನ ಜಂಬಾರವಂದ್.
ಎಂಕ್ ಆ ಆಟಿದ ಅಮವಾಸ್ಯೆದ ನಡು ರಾತ್ರೆಗ್ ಆ ಕಾಡ್ ಗುಡ್ಡೆಡ್ ಏತ್ ಪೊಣ್ಣು ಕುಲೆಕುಲು ಪೊಯ್ಯೆ ದಕ್ಕ್ ದನ ಏರೆಗೊತ್ತು…..!!!
