ಡಿಸೆಂಬರ್ 14ರಿಂದ ಪರೀಕ್ಷೆ
ನವದೆಹಲಿ: ವಿಶ್ವವಿದ್ಯಾಲಯ ಧನಸಹಾಯ ಆಯೋಗದ ರಾಷ್ಟ್ರೀಯ ಅರ್ಹತಾ ಪರೀಕ್ಷೆ (ಯುಜಿಸಿ-ನೆಟ್)ಗೆ ಸಂಬಂಧಿಸಿದಂತೆ ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆ (ಎನ್‌ಟಿಎ) ಪರಿಷ್ಕೃತ ಮಾರ್ಗಸೂಚಿಗಳನ್ನು ಪ್ರಕಟಿಸಿದೆ. ಪರೀಕ್ಷಾ ದಿನಾಂಕ, ಪ್ರವೇಶ ಪತ್ರ, ಪರೀಕ್ಷಾ ಕೇಂದ್ರದ ನಿಯಮಗಳು ಹಾಗೂ ವಿಶೇಷ ಚೇತನ ಅಭ್ಯರ್ಥಿಗಳಿಗೆ ಲಭ್ಯವಿರುವ ಸೌಲಭ್ಯಗಳ ಕುರಿತು ಹೊಸ ಮಾಹಿತಿ ನೀಡಲಾಗಿದೆ.
ಪರೀಕ್ಷೆಯು ಡಿಸೆಂಬರ್ 14ರಿಂದ 18ರವರೆಗೆ ಹಾಗೂ ಡಿಸೆಂಬರ್ 21ರಂದು ನಡೆಯಲಿದೆ. ಪರೀಕ್ಷಾ ನಗರಗಳ ಮಾಹಿತಿ ನವೆಂಬರ್ 23ರಂದು ಪ್ರಕಟವಾಗಲಿದ್ದು, ಪ್ರವೇಶ ಪತ್ರಗಳನ್ನು ಡಿಸೆಂಬರ್ 7ರಿಂದ ಡೌನ್‌ಲೋಡ್ ಮಾಡಿಕೊಳ್ಳಬಹುದು.
ಪ್ರಮುಖ ದಿನಾಂಕಗಳು
- ಅರ್ಜಿ ಸಲ್ಲಿಕೆ: ಅಕ್ಟೋಬರ್ 8ರಿಂದ 28ರವರೆಗೆ
- ದಂಡ ಶುಲ್ಕದೊಂದಿಗೆ ಅರ್ಜಿ ಸಲ್ಲಿಕೆ: ಅಕ್ಟೋಬರ್ 29ರಿಂದ 31ರವರೆಗೆ
- ಅರ್ಜಿ ತಿದ್ದುಪಡಿ: ನವೆಂಬರ್ 2ರಿಂದ 4ರವರೆಗೆ
- ಪರೀಕ್ಷಾ ನಗರಗಳ ಮಾಹಿತಿ: ನವೆಂಬರ್ 23
- ಪ್ರವೇಶ ಪತ್ರ ಬಿಡುಗಡೆ: ಡಿಸೆಂಬರ್ 7ರಿಂದ
- ಪರೀಕ್ಷೆ: ಡಿಸೆಂಬರ್ 14ರಿಂದ 18ರವರೆಗೆ ಹಾಗೂ ಡಿಸೆಂಬರ್ 21ರಂದು
ಹಿಂದಿನ ವೇಳಾಪಟ್ಟಿಯಲ್ಲಿ ಡಿಸೆಂಬರ್ 14ರಿಂದ 19ರವರೆಗೆ ಪರೀಕ್ಷೆ ನಡೆಸಲು ಉದ್ದೇಶಿಸಲಾಗಿತ್ತು. ಇದೀಗ ವೇಳಾಪಟ್ಟಿಯಲ್ಲಿ ಬದಲಾವಣೆ ಮಾಡಲಾಗಿದೆ.
ಉತ್ತರಗಳಿಗೆ ಅಂಕ ನೀಡುವ ನಿಯಮ:
ಪರೀಕ್ಷೆಯ ಮೌಲ್ಯಮಾಪನ ನಿಯಮಗಳಲ್ಲೂ ಸ್ಪಷ್ಟನೆ ನೀಡಲಾಗಿದೆ. ಸರಿಯಾದ ಉತ್ತರಕ್ಕೆ 2 ಅಂಕ ನೀಡಲಾಗುತ್ತದೆ. ತಪ್ಪು ಉತ್ತರಗಳಿಗೆ ಅಂಕ ಕಡಿತವಿಲ್ಲ ಹಾಗೂ ಉತ್ತರಿಸದ ಪ್ರಶ್ನೆಗಳಿಗೆ ಅಂಕ ಇರುವುದಿಲ್ಲ. ಉತ್ತರಿಸಿ ‘Review’ ಎಂದು ಗುರುತಿಸಿರುವ ಪ್ರಶ್ನೆಗಳನ್ನೂ ಮೌಲ್ಯಮಾಪನಕ್ಕೆ ಪರಿಗಣಿಸಲಾಗುತ್ತದೆ.
ಪರೀಕ್ಷಾ ಕೇಂದ್ರಕ್ಕೆ ತೆಗೆದುಕೊಂಡು ಹೋಗಬಹುದಾದ ವಸ್ತುಗಳು:
- ಮಧುಮೇಹ ಇರುವ ಅಭ್ಯರ್ಥಿಗಳು ಸಕ್ಕರೆ ಮಾತ್ರೆಗಳನ್ನು ಕೊಂಡೊಯ್ಯಬಹುದು.
- ಬಾಳೆಹಣ್ಣು, ಸೇಬು ಮತ್ತು ಕಿತ್ತಳೆಯಂತಹ ಹಣ್ಣುಗಳನ್ನು ಪ್ಯಾಕಿಂಗ್ ಇಲ್ಲದೆ ತೆಗೆದುಕೊಂಡು ಹೋಗಬಹುದು.
- ಪಾರದರ್ಶಕ ನೀರಿನ ಬಾಟಲಿಗೆ ಅವಕಾಶವಿದೆ.
- ಬಾಲ್‌ಪಾಯಿಂಟ್ ಪೆನ್ನನ್ನು ಪರೀಕ್ಷಾ ಕೇಂದ್ರದಲ್ಲೇ ಒದಗಿಸಲಾಗುತ್ತದೆ.
ಉಡುಗೆ ನಿಯಮ ಮತ್ತು ಪ್ರವೇಶ:
ಅಭ್ಯರ್ಥಿಗಳು ಸಾಮಾನ್ಯ ಶೂ ಅಥವಾ ಚಪ್ಪಲಿ ಧರಿಸಬಹುದು. ಹೀಲ್ಸ್ ಮತ್ತು ಉದ್ದನೆಯ ಬೂಟುಗಳಿಗೆ ಅನುಮತಿ ಇರುವುದಿಲ್ಲ. ಪರೀಕ್ಷೆ ಆರಂಭವಾಗುವುದಕ್ಕಿಂತ 30 ನಿಮಿಷ ಮೊದಲು ಪ್ರವೇಶ ದ್ವಾರ ಮುಚ್ಚಲಾಗುತ್ತದೆ. ತಡವಾಗಿ ಬರುವವರಿಗೆ ಪ್ರವೇಶ ನಿರಾಕರಿಸಲಾಗುತ್ತದೆ. ಆದ್ದರಿಂದ ಪ್ರವೇಶ ಪತ್ರದಲ್ಲಿರುವ ದಿನಾಂಕ, ಸಮಯ ಮತ್ತು ಕೇಂದ್ರದ ವಿವರಗಳನ್ನು ಮುಂಚಿತವಾಗಿ ಪರಿಶೀಲಿಸಬೇಕು.
ವಿಶೇಷ ಚೇತನ ಅಭ್ಯರ್ಥಿಗಳಿಗೆ ಸೌಲಭ್ಯ:
ಅಂಗವೈಕಲ್ಯ ಹೊಂದಿರುವ ಅಭ್ಯರ್ಥಿಗಳಿಗೆ ಬರೆಯಲು ಸಹಾಯಕ ವ್ಯಕ್ತಿ (Scribe) ಮತ್ತು ಹೆಚ್ಚುವರಿ ಸಮಯ ಪಡೆಯುವ ನಿಯಮಗಳ ಕುರಿತು ಮಾಹಿತಿ ಪುಸ್ತಕದಲ್ಲಿ ವಿವರಿಸಲಾಗಿದೆ. ಶೇ. 40 ಅಥವಾ ಅದಕ್ಕಿಂತ ಹೆಚ್ಚಿನ ಅಂಗವೈಕಲ್ಯ ಹೊಂದಿರುವವರು ಹಾಗೂ ಅದಕ್ಕಿಂತ ಕಡಿಮೆ ಪ್ರಮಾಣದ ಅಂಗವೈಕಲ್ಯವಿದ್ದರೂ ಬರೆಯಲು ತೊಂದರೆ ಅನುಭವಿಸುವವರು ತಮ್ಮ ಅರ್ಹತೆಗೆ ಅನುಗುಣವಾಗಿ ಅಗತ್ಯ ದಾಖಲೆಗಳನ್ನು ಸಲ್ಲಿಸಬೇಕು.
ಸೌಲಭ್ಯ ಪಡೆಯಲು ಬಯಸುವವರು ಅಂಗವೈಕಲ್ಯ ಪ್ರಮಾಣಪತ್ರ ಸೇರಿದಂತೆ ಅಗತ್ಯ ದಾಖಲೆಗಳನ್ನು ಪರಿಶೀಲಿಸಬೇಕು. ಅರ್ಜಿಯಲ್ಲಿ ತಪ್ಪುಗಳಿದ್ದರೆ ನವೆಂಬರ್ 2ರಿಂದ 4ರೊಳಗೆ ತಿದ್ದುಪಡಿ ಮಾಡಿಕೊಳ್ಳಬಹುದು.
ಅರ್ಹತಾ ಅಂಕಗಳಲ್ಲಿ ಬದಲಾವಣೆ ಇಲ್ಲ:
ಯುಜಿಸಿ-ನೆಟ್‌ಗೆ ಅರ್ಜಿ ಸಲ್ಲಿಸಲು ಅಗತ್ಯವಿರುವ ಕನಿಷ್ಠ ಶೈಕ್ಷಣಿಕ ಅಂಕಗಳಲ್ಲಿ ಯಾವುದೇ ಬದಲಾವಣೆ ಮಾಡಿಲ್ಲ. ಸಾಮಾನ್ಯ ಮತ್ತು ಇಡಬ್ಲ್ಯೂಎಸ್ ಅಭ್ಯರ್ಥಿಗಳು ಸ್ನಾತಕೋತ್ತರ ಪದವಿಯಲ್ಲಿ ಕನಿಷ್ಠ ಶೇ. 55 ಅಂಕ ಗಳಿಸಿರಬೇಕು. ಮೀಸಲಾತಿ ವರ್ಗದ ಅಭ್ಯರ್ಥಿಗಳಿಗೆ ಕನಿಷ್ಠ ಶೇ. 50 ಅಂಕ ನಿಗದಿಪಡಿಸಲಾಗಿದೆ.
ಪರೀಕ್ಷಾ ಮಾದರಿ ಹೇಗಿರಲಿದೆ?:
ಯುಜಿಸಿ-ನೆಟ್ ಪರೀಕ್ಷೆಯನ್ನು ಕಂಪ್ಯೂಟರ್ ಆಧಾರಿತವಾಗಿ ನಡೆಸಲಾಗುತ್ತದೆ. ಎರಡು ಪತ್ರಿಕೆಗಳಿದ್ದು, ಒಟ್ಟು 150 ಪ್ರಶ್ನೆಗಳಿಗೆ 300 ಅಂಕ ನಿಗದಿಪಡಿಸಲಾಗಿದೆ.
- ಪತ್ರಿಕೆ-1: 50 ಪ್ರಶ್ನೆಗಳು, 100 ಅಂಕಗಳು.
- ಪತ್ರಿಕೆ-2: 100 ಪ್ರಶ್ನೆಗಳು, 200 ಅಂಕಗಳು.
ಎರಡೂ ಪತ್ರಿಕೆಗಳಿಗೆ ಒಟ್ಟು 180 ನಿಮಿಷಗಳ ಕಾಲಾವಕಾಶ ನೀಡಲಾಗುತ್ತದೆ. ಪರೀಕ್ಷೆಯ ನಡುವೆ ವಿರಾಮ ಇರುವುದಿಲ್ಲ. ಪ್ರತಿ ಸರಿಯಾದ ಉತ್ತರಕ್ಕೆ 2 ಅಂಕ ನೀಡಲಾಗುತ್ತದೆ ಹಾಗೂ ತಪ್ಪು ಉತ್ತರಕ್ಕೆ ಅಂಕ ಕಡಿತವಿರುವುದಿಲ್ಲ.
ಅರ್ಜಿ ಶುಲ್ಕದ ವಿವರ:
- ಸಾಮಾನ್ಯ ವರ್ಗ: ₹1,150
- ಇಡಬ್ಲ್ಯೂಎಸ್ ಮತ್ತು ಒಬಿಸಿ-ಎನ್‌ಸಿಎಲ್: ₹600
- ಎಸ್‌ಸಿ, ಎಸ್‌ಟಿ, ತೃತೀಯ ಲಿಂಗ ಮತ್ತು ಅಂಗವೈಕಲ್ಯ ಹೊಂದಿರುವ ಅಭ್ಯರ್ಥಿಗಳು: ₹325
ಅಭ್ಯರ್ಥಿಗಳಿಗೆ ಸೂಚನೆ:
ಯುಜಿಸಿ-ನೆಟ್ ಡಿಸೆಂಬರ್ 2026ರ ಪರೀಕ್ಷೆಗೆ ಸಿದ್ಧತೆ ನಡೆಸುತ್ತಿರುವವರು ಪರಿಷ್ಕೃತ ಮಾಹಿತಿ ಪುಸ್ತಕವನ್ನು ಓದಿಕೊಳ್ಳಬೇಕು. ಪರೀಕ್ಷಾ ದಿನಾಂಕ, ಪ್ರವೇಶ ಪತ್ರ, ಕೇಂದ್ರದ ನಿಯಮಗಳು ಮತ್ತು ಅಗತ್ಯ ದಾಖಲೆಗಳ ಬಗ್ಗೆ ಗಮನ ನೀಡಬೇಕು.
ಹೆಚ್ಚಿನ ಮಾಹಿತಿಗಾಗಿ ಎನ್‌ಟಿಎಯ ಅಧಿಕೃತ ವೆಬ್‌ಸೈಟ್ ugcnet.nta.ac.in ಗೆ ಭೇಟಿ ನೀಡಬಹುದು.
