ಮಂಗಳೂರು: ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿರುವ ಯುದ್ಧದ ಪರಿಣಾಮಗಳ ನಡುವೆಯೇ ಮಂಗಳೂರು ಬಂದರಿಗೆ ಸರಕು ಹಡಗುಗಳ ಆಗಮನ ಮುಂದುವರಿದಿದೆ. ಶನಿವಾರ ಕಚ್ಚಾ ತೈಲ ಹೊತ್ತ ಹಡಗು ಬಂದ ನಂತರ, ಭಾನುವಾರ ಎಲ್ಪಿಜಿ ಸಾಗಣೆ ಮಾಡುತ್ತಿದ್ದ ಮತ್ತೊಂದು ಹಡಗು ಬಂದರು ತಲುಪಿದೆ.
‘ಪಿಕ್ಸಿಸ್ ಪಯನೀರ್’ ಎಂಬ ಹೆಸರಿನ ಈ ಹಡಗು ಅಮೆರಿಕದ ಟೆಕ್ಸಾಸ್ನಿಂದ ಸುಮಾರು 16 ಸಾವಿರ ಮೆಟ್ರಿಕ್ ಟನ್ ಎಲ್ಪಿಜಿಯನ್ನು ಸಾಗಿಸಿ ತಂದಿದ್ದು, ಯುದ್ಧ ಆರಂಭವಾದ ಬಳಿಕ ಕರ್ನಾಟಕಕ್ಕೆ ಬಂದ ಮೊದಲ ಎಲ್ಪಿಜಿ ನೌಕೆಯಾಗಿದೆ. ಮಾರ್ಚ್ 14ರಂದು ಅಮೆರಿಕದಿಂದ ಪ್ರಯಾಣ ಆರಂಭಿಸಿದ್ದ ಈ ಹಡಗು ಇದೀಗ ಸುರಕ್ಷಿತವಾಗಿ ತಲುಪಿದ್ದು, ಅನಿಲ ಇಳಿಸುವ ಕಾರ್ಯ ಆರಂಭವಾಗಿದೆ.
ಇದಕ್ಕೂ ಮೊದಲು, ರಷ್ಯಾದಿಂದ ಚೀನಾಕ್ಕೆ ತೆರಳುತ್ತಿದ್ದ ‘ಅಕ್ವಾ ಟೈಟಾನ್’ ಕಚ್ಚಾ ತೈಲ ಹಡಗು ಶನಿವಾರ ಮಂಗಳೂರು ಬಂದರಿಗೆ ಬಂದಿತ್ತು. ಆ ಹಡಗಿನಿಂದ ತೈಲವನ್ನು ಪೈಪ್ಲೈನ್ ಮೂಲಕ ಎಂಆರ್ಪಿಎಲ್ ಸಂಸ್ಕರಣಾ ಘಟಕಕ್ಕೆ ಸಾಗಿಸುವ ಕಾರ್ಯ ಭಾನುವಾರವೂ ಮುಂದುವರಿದಿದೆ.
ಈ ಎರಡೂ ಹಡಗುಗಳ ಆಗಮನದಿಂದ ರಾಜ್ಯದಲ್ಲಿ ಉಂಟಾಗಿದ್ದ ತೈಲ ಮತ್ತು ಅನಿಲ ಕೊರತೆ ಬಗ್ಗೆ ಜನರಲ್ಲಿ ಉಂಟಾಗಿದ್ದ ಆತಂಕ ಕಡಿಮೆಯಾಗಿದೆ. ವಾಣಿಜ್ಯ ಬಳಕೆಯ ಎಲ್ಪಿಜಿ ಕೊರತೆಯಿಂದ ಸಂಕಷ್ಟಕ್ಕೆ ಸಿಲುಕಿದ್ದ ಹೋಟೆಲ್ ಮತ್ತು ಕ್ಯಾಂಟಿನ್ಗಳಿಗೆ ಈಗ ಸ್ವಲ್ಪ ಮಟ್ಟಿನ ನಿರಾಳತೆ ದೊರಕಿದೆ.
