ಚೇತನ್ ವರ್ಕಾಡಿ
ಭಕ್ತಿ ಶ್ರದ್ಧೆಯೊಳಗೊಂದು ನಾ ಕಂಡ ದಸರಾ
ಎಷ್ಟೊಂದು ಸಡಗರ ಎಷ್ಟೊಂದು ಸಂಭ್ರಮ
ಬಲೂನು ಕೀ ಚೈನು ಬಲು ಒತ್ತಾಯದಿ ಕೊಟ್ಟವ
ಮಾರಿಬಿಟ್ಟ ಖುಷಿಯಲ್ಲಿ ಹಸಿವು ನೀಗಿಸಿದ ದಸರಾ.
ಜಗಮಗಿಸುವ ಜಾತ್ರೆ ಈ ಸುಂದರ ಯಾತ್ರೆ
ಜಗತ್ತೇ ಕೊಂಡಾಡಲು ಬೆಳಕಿನಡಿಯಲಡಗಿದೆ ಬೆವರಿನ ಪಾತ್ರೆ
ಕಡಲೆ ಮಾರುವ ಅಜ್ಜಿಗಿದು ಬದುಕಿನಬ್ಬದ ದಸರಾ
ಕೊಳಲನಿಡಿದ ಕಂದನಿಗೆ ಬದುಕ ರೂಪಿಸುವ ದಸರಾ.
ಮಣ್ಣಿಗೆ ರೂಪ ಕೊಟ್ಟ ಶಿಲ್ಪಿಗಿದು ಅನ್ನ ನೀಡಿದ ದಸರಾ
ಭಕ್ತಿಯೊಳು ಬಂದ ಭಕ್ತನಿಗಿದು ಶಕ್ತಿ ನೀಡಿದ ದಸರಾ
ನವರಾತ್ರಿ ವಿಜಯಯಾತ್ರೆಯಾಗಿ ವಿಜೃಂಭಿಸಿದ ದಸರಾ.
ಚದುರಿನಿಂತ ಆತ್ಮೀಯತೆಗೆ ಪ್ರೀತಿಯ ಚಿಗುರು ನೀಡಿದ ದಸರಾ
ಕಷ್ಟ ನೋವಲಿ ಬೆಂದ ಜೀವಕ್ಕೆ ಸಹಾಯ ಹಸ್ತ ಮಿಡಿದ ದಸರಾ
ಹುಲಿವೇಷದಬ್ಬರದಿ ಘರ್ಜಿಸಿದ ದಸರಾ
ಬೆವರು ಫಲವನ್ನು ಸಾಂತ್ವನದ ಮಡಿಲಿಗರ್ಪಿಸಿದ ದಸರಾ.
ನಾ ಕಂಡ ದಸರಾ ವಿವರಿಸಲಾಗದ ವಿಸ್ಮಯ ಜಗತ್ತು
ಹಸಿವ ತಣಿಸಿತು ಖುಷಿಯ ಪೋಣಿಸಿತು
ಜನಜಂಗುಳಿಯೊಳಗೆ ಜಗತ್ತನ್ನೇ ಮರೆತಂತ ಭಾವ
ಹೇಗೆ ಬರೆದಿಡಲಿ ಬದುಕುತಿದೆ ಅದರೊಳಗೆ ಎಷ್ಟೋಂದು ಜೀವ..
