✍️ಚೇತನ್.ವರ್ಕಾಡಿ
ಆಂಡ ರಗು ಎನ್ನಿನೆಕ್ಲ ಅಲ್ಪ ನಾಯಿ ತಿಂದೊಂತುನ ಮಾಸೊಗ್ಲ ಒಂಜೆಕೊಂಜೆಕ್ ಸರಿಸಮ ಇಜ್ಜಂಡ್.ಒವ್ವಾ ಮಲ್ಲ ಮುರ್ಗ ತಿಂದ್ ಬುಡ್ನ ಎಲುಕಟ್ ಮಾಸೊನು ನಾಯಿಲು ತಿಂದೊಂತುಂಡು ಬುಡ್ಂಡ, ಸಂಪತ್ಗ್ ಅಲ್ಪ ನಾಯಿಲೆರ್ದ್ ದಾಲ ಆತ್ಜಿ ಪನ್ಪುನ ನಿಗಂಟಾಂಡ್.ಅಪಗ ಆಯನ ಅಂಗಿನ್ ನಾಯಿಲು ಎಂಚ ಒಯ್ತ,ಅವ್ಲ ಇಲ್ಲದಡೆ ದಾಯೆ ಬತ್ತ,ಆಂಡಲ ನಾಯಿಲು ಸಂಪತ್ನ್ ಗಿಡತ್ದ ಪನ್ಪಿನೆಕ್ ಸಾಕ್ಷಿದಲ್ಕನೆ ಆಯನ ಪರಿನ ಅಂಗಿ ತಿಕ್ದ್ನ ಗುರ್ತನೆ ರಗುಗು ಗಟ್ಟಿಯಾತ್ಂಡ್.ರಗು ಒರ ಸುತ್ತುಗು ಕಣ್ಣ್ ಪಾರಾಯೆ,ಅಂಚಿನ ಕಾಡವ್,ಐರ್ದ್ ದುಂಬು ಆ ಕಾಡ್ ಡೆ ಎಚ್ಚಿಗೆ ದೂರ ಪೋಯೆರೆ ಆಯಗ್ಲ ದೈರ ಬತ್ತ್ಜಿ.ಒಟ್ಟಾರೆ ಸಂಪತ್ನ ಬಗೆಟ್ ದಾಲ ತೆರಿಯಂದೆ,ಇಲ್ಲಗ್ ಪೋದುಲ ಆಯನ ಅಪ್ಪೆನೆಂಚ ಸಮದಾನ ಮಲ್ಪುನೆ ಪನ್ಪಿನ ಅಲಚನೆನೆ ಆಯನ ಗೇನೊಡುಂತುಂಡು.ಉಂತುದು ಈ ಕಾಡ್ಡ್ ಮಲ್ಪುನೆಂಡಾಲ ಎಂಚಿನಾಂದ್,ಬತ್ತಿ ಸಾದಿಗ್ ಪಲ ತಿಕ್ಕಂದೆ ಪಿರ ಪಿಜಿರ್ಯೆ.ಇಲ್ಲಮುಟ್ಟೊಗೆತ್ತ್ನಗ ದೂರೊಡು ಸುಮತಿಲ,ಜಾನಕಿಲ ರಗು ಬರ್ಪುನೆನೇ ಕಾತೊಂತೆರ್,ರಗುನ ಮಂಡೆ ತೋಜಿಲೆಕಾನೆ ಸುಮತಿ ಪಾರ್ ಬತ್ತ್ದ್ಲ ಇಸಯ ದಾಲ ತೆರಿಂಡಾಂದ್ ಅರ್ತರ್ತ್ದ್ ಕೇಂಡಲ್,ಆಂಡ ರಗು ತರೆಕಂತ ಪಾಡ್ದ್ ದಾಲ ತೆರಿಯಂದಿಲೆಕ ತರೆ ಆಡಾಯೆ.ಸುಮತಿಗ್ ಕುಡ ಕುಡ ಬುಲಿಪುನೆನ್ ಉಂತಾಯೆರೆ ಆಯಿಜಿ,ಅಕ್ಲೆ ಸಮದಾನೊಗು ಆಲ್ ತಿಕ್ಕೊಂದಿಜ್ಜಲ್.ಮಗೆದಾಂತಿ ಬೇನೆ ಅಲೆನ್ ಪುಂಟೊಂದುಂಡು.ಬಾಲೆ ಓಡೆ ಪೋಯೆನಾ..?ಆಯಗ್ ದಾನೆ ಆಂಡಾ ಇಂಚಿನ ಬೊರ್ಚಾಂದಿ ಪ್ರಸ್ನೆಡೇ ಅಲೆ ತರೆಗಿರ್ಮಿಟ್ಲೆಕಾಂಡ್.ಜಾನಕಿ ಬೊಕ್ಕ ರಗು ಏತ್ ಸಮದಾನ ಮಲ್ತ್ಂಡಲ ಸುಮತಿನ ಮಟ್ಟೆಲ್ದ ಬೇನೆದ ಗೆಂಡದ ಅಗ್ಗಿ ಅರ್ಕೆರೆ ಕೇನಿಜಿ.ಆಪುನಾತ್ ಸಮಾದಾನ ಮಲ್ತೆರ್ ಇರ್ವೆರ್ಲ.ರಗು ಅಲೆನ್ ಇಲ್ಲಡ್ ಕುಲ್ಲಾದ್ ತನ್ನ ನಿಚ್ಚೊದ ಬೆನ್ಪುಜಾಲ್ಗ್ ಬೆನ್ಯೆರೆ ಪಿದಡ್ಯೆ,ಅಲ್ಪಾಂಡಲ ಸುದ್ದಿ ತೆರಿಯುಂಡಾಂದ್ ನಾಡೋಂದು ಪೋಯೆ..
ಆಯೆ ಪೋಪಿ ಸಾದಿಡೆನೆ ಮಲ್ಲ ಕೆದು ಉಂಡು,ಆಂಡ ಏಪಲ ನರಮಾನಿ ತೋಜಂದಿ ಆ ಸಾದಿಬರಿತ ಕೆದುತ ಇನಿ ಸುತ್ತೊಲ ಕಾಂಡೆ ಕಾಂಡೆನೆ ಜನ ದಿಮ್ಕೊಂದುಂಡು,ದುಂಬೇ ಸಂಪತ್ನ ಇಸಯೊನೆ ಆಯನ ತರೆಟ್ ಕುರಿಯೊಂದುಂಡು,ಎಲಕತೆನೇ ಉಂದು ಎಂಚಿನಾ ಪಿರೊಂಜೀಂದ್ ಪೋದು ನಿಲ್ಕುವೆನೇ…?
ದುಂಬರಿಯುಂಡು.
