ಬೆಂಗಳೂರು: ಪ್ರಸಿದ್ಧ ಆಪಲ್ ಕಂಪನಿ ತನ್ನ ಮುಂಬರುವ ಐಫೋನ್ ಮಾದರಿಗಳಲ್ಲಿ ಬಹುದೊಡ್ಡ ಬದಲಾವಣೆ ಮಾಡುವ ನಿರ್ಧಾರ ತೆಗೆದುಕೊಳ್ಳುವ ಸೂಚನೆ ನೀಡಿದೆ.
ಇತ್ತೀಚಿನ ವರದಿಯ ಪ್ರಕಾರ, ಐಫೋನ್ 17 ಏರ್ ವಿನ್ಯಾಸವನ್ನು ಅಪ್ಗ್ರೇಡ್ ಮಾಡಲು ಸಿದ್ಧತೆಗಳು ನಡೆಯುತ್ತಿದ್ದು ಕಂಪನಿಯು ಈ ಫೋನ್ ಅನ್ನು ಚಾರ್ಜಿಂಗ್ ಪೋರ್ಟ್ ಇಲ್ಲದೆ ಬಿಡುಗಡೆ ಮಾಡಬಹುದು ಎನ್ನಲಾಗುತ್ತಿದೆ.
ಕಂಪನಿಯು ನಿಧಾನವಾಗಿ ವೈರ್ಲೆಸ್ ಪರಿಸರ ವ್ಯವಸ್ಥೆಯತ್ತ ಸಾಗುತ್ತಿರುವಂತೆ ತೋರುತ್ತಿದ್ದು ಇದರಲ್ಲಿ ಮ್ಯಾಗ್ಸೇಫ್ ಚಾರ್ಜಿಂಗ್ ಅನ್ನು ಮುಂದುವರೆಸಲಾಗುತ್ತಿದೆ ಮತ್ತು ವೈರ್ಲೆಸ್ ಡೇಟಾ ವರ್ಗಾವಣೆ ವೇಗವನ್ನು ಸುಧಾರಿಸುವತ್ತ ಕೆಲಸ ಮಾಡಲಾಗುತ್ತಿದೆ. ಬ್ಲೂಮ್ಬರ್ಗ್ ವರದಿಯ ಪ್ರಕಾರ, ಐಫೋನ್ 17 ಏರ್ ಯಶಸ್ವಿಯಾದರೆ, ಭವಿಷ್ಯದಲ್ಲಿ ಕಂಪನಿಯು ಸಂಪೂರ್ಣವಾಗಿ ಪೋರ್ಟ್-ಮುಕ್ತ ಮಾದರಿಗಳನ್ನು ಬಿಡುಗಡೆ ಮಾಡುವತ್ತ ಗಮನ ಹರಿಸುತ್ತದೆ ಎಂದು ಆಪಲ್ ಅಧಿಕಾರಿಗಳು ನಂಬಿದ್ದಾರೆ.
ಈ ಬಾರಿಯೂ ಕಂಪನಿಯು ತನ್ನ ಹೊಸ ಐಫೋನ್ ಸರಣಿಯನ್ನು ಅಂದರೆ ಐಫೋನ್ 17 ಅನ್ನು ಸೆಪ್ಟೆಂಬರ್-ಅಕ್ಟೋಬರ್ ತಿಂಗಳಲ್ಲಿ ಬಿಡುಗಡೆ ಮಾಡಬಹುದು. ಈ ಬಾರಿ ಸರಣಿಯಲ್ಲಿ ದೊಡ್ಡ ಬದಲಾವಣೆಯನ್ನು ಕಾಣಬಹುದಾಗಿದ್ದು ಸರಣಿಯಲ್ಲಿ ಪ್ಲಸ್ ಮಾದರಿಯ ಬದಲಿಗೆ ಐಫೋನ್ 17 ಏರ್ ಅನಾವರಣಗೊಳ್ಳಲಿದೆ. ಕಂಪನಿಯು ಸೆಪ್ಟೆಂಬರ್ 18 ಅಥವಾ 19 ರಂದು ಐಫೋನ್ 17 ಅನ್ನು ಬಿಡುಗಡೆ ಮಾಡಬಹುದು ಎಂದು ಅಂದಾಜಿಸಲಾಗಿದೆ.
