ತುಳು ಕಥೆ
ಚೇತನ್ ವರ್ಕಾಡಿ
ರಡ್ಡ್ ನಾಯಿಲು ಮಣ್ಣ್ಡೊರೆಂಕ್ನ ಅಂಗಿನೊಂಜೆನ್ ತುಚ್ಚೊಂದು ಲಡಾಯಿ ಮಲ್ತೊಂದು ಮಲ್ತೊಂದು ಜಾಲ್ಡ್ ಉರ್ಡೊಂದುಲ್ಲ,ನಾಯಿಲೆ ಬಾಯಿಡ್ ನೆತ್ತೆರ್ ಪೀಂಕೊಂದುಂಡು.ಉಂದು ದಾದ ಕತೆಪ್ಪಾ..?ಇನಿ ದಾಯೆ ಇಂಚ ಪೂರ ಆವೊಂದುಂಡು,ನಾಯಿಲೆ ಬಾಯಿಡ್ ಇತ್ತಿನ ಅಂಗಿದ ತುಂಡು ಎಲ್ಯ ಜೋಕುಲ್ಲೆಕ ತೋಜುಂಡು,ಒಂಜಿ ವೇಳೆ ಸುಮತಿನ ಮಗೆ ಸಾದಿ ತತ್ತ್ದ್ ಕಾಡ್ಡೆ ಮಿನಿ ಪಾರ್ನಗ ಮುರ್ಗೊಲೆ ಬಾಯಿಗ್ ತಿಕ್ದ್ ಬೂರ್ಯೆನಾ…?ಅಲ್ಪರ್ದ್ ನಾಯಿಲು ಇಂಚಿ ಬತ್ತನ..?ಇಜ್ಜಿಜ್ಜಿ ಅಂಚ ದಾಲ ಆವಂದ್ ಪಂಡ್ದ್ ಆಯನಾತಿಗೆ ಎನ್ಯೊಂದುಪ್ಪುನಗ,ಉಂದೆಯೆ ಆ ನಾಯಿ ದಾನೆ ಆನಮುನೆ ಉರ್ಡುನೆ,ಬಾಯಿಡೆಂಚಿನೆಯೆ ಐತ..?ಪೋಲೆ ನೀರ್ ಚೇಪುಲೆಗೇಂದ್ ಕಂಬದಲ್ಕ ಉಂತುನ ಕಂಡನಿಯನ ಮೈ ಮುಟ್ಟುನಗನೆ ರಗುಗು ಎಚ್ಚೆರಿಗೆ.ಪಕ್ಕ ಉಲಯಿ ಪೋದು ನೀರ್ ಕೊನತ್ದ್ಲ ಮೇಲ್ಗ್ ಚೇತೆ.ಐತ ಲಡಾಯಿ ಉಂತುಂಡು.ತುಂಡು ಅಂಗಿನ್ ಬುಡ್ದು ಅವ್ ಅಲ್ತ್ ಪಾರ್ಂಡ್.ರಗುಗು ಉಲ ಉಲಯಿಡ್ ಪೋಡಿಗೆ ಆವೊಂದುಂಡು,ನಾಯಿಲೆ ಬಾಯಿಡಿತ್ತಿನ ಅಂಗಿ ಜೋಕುಲೆನಾಂದೆ ಆಯಗ್ ನಿಗಂಟಾಂಡ್.ನಾಯಿ ಬುಡ್ನ ಅಂಗಿದ ತುಂಡುನು ಜಾಲ್ರ್ದ್ ದೆತೊಂದು ಬನ್ನಗ,ಸುಮತಿ ಐನ್ ತೂಯಲ್.ತೂಯಿನ ಸುಮತಿಗ್ ಅಡೇಗೆ ಮತಿತತ್ತ್ ಪೋಂಡು.ನನದಾನೆ ಬೂರ್ವಲೂಂದ್ ಆನಗನೆ ಜಾನಕಿ ಪಕ್ಕ ಕೈ ಕೊರ್ಯಲ್.ಅಡೇಗೆ ತಾಂಗ್ದ್ ಮೆಲ್ಲ ಕುಲ್ಲಯಲ್.ರಗು ಪಕ್ಕ ಉಲಯಿ ಪೋದು ನೀರ್ ಕೊನತಿನಾಯೆ ಮೋನೆಗ್ ಚೇತ್ದ್,ಬಾಯಿಗ್ಲ ಒಂತೆ ಪರ್ಪಾಯೆ.ಸುಮತಿ ಕಣ್ಣ್ ಬುಲಯಲ್,ನಾಯಿ ಕನತಿನ ಪರಿನ ತುಂಡು ಅಂಗಿ ತನ್ನ ಮಗೆ ಸಂಪತ್ ಪಾಡ್ದಿತ್ತಿನಾಂದ್ ಪಂಡೊಂದು ಅರಬಾಯಿ ದೀಯಲ್.ರಗುನ ಅಕಲೇ ಪಾರ್ಲೆಕಾಂಡ್.ಆಯೆ ಎನ್ನಿನವೇ ನಿಜ ಆಪಿಲೆಕ ಆಯಗ್ ತೋಜೊಂದುಂಡು.ಕಾಡ ಉಲಯಿ ಪೋಂಡ ಪಿರಬರ್ಪುನವು ಆತ್ ಸುಲಬತ್ತೂಂದ್ ಆಯಗ್ಲ ಗೊತ್ತುಂಡು,ಆಂಡ ಸುಮತಿನ್ ಎನ್ನಿನಗ ಆಯಗ್ ದುಕ್ಕೊದೊಸರ್ ದಿಂಜಿಂಡ್.ಸುಮತಿಗ್ ಬಾಲೆಗ್ ದಾದನ ಆತ್ಂಡ್ ಪನ್ಪಿನ ಸತ್ಯ ಆ ಅಂಗಿನ್ ತೂನಗನೆ ತೆರಿಂಡ್,ಅಲೆ ಸಂಕಡೊದ ಅರಬಾಯಿಗ್ ಸಮದಾನ ಪನ್ಯೆರೆ ರಗುಡ ಸವುದನೇ ಇಜ್ಜಂಡ್.ಈತ್ ಮಾತ ಆನಗ ಮಿನ್ಕುಲ ಮೆಲ್ಲ ಲಕ್ಕ್ದ್ ಬತ್ತ್ದ್ ಅಪ್ಪೆನ ಸೆರಂಗ್ದ ಇಡೇಟ್ ನುರ್ಕುದು ಮಾತೆನ್ಲ ತೂವೊಂತಲ್.ಒಯ್ಕ್ಲ ಪುಲ್ಯ ಆವಡ್ ,ನಿನ್ನ ಬಾಲೆಗ್ ದಾಲ ಆಪುಜಿ ಯಾನ್ ನಾಡೊಂದು ಬರ್ಪೆ ಪಂಡ್ದ್ ರಗು ಸಮದಾನ ಮಲ್ತ್ಂಡಲ,ಸಾಕ್ಷಿಗ್ ಸಂಪತ್ನ ಪರಿದಿನ ಅಂಗಿನೇ ನಾಯಿಲು ಪತೊಂದು ಬತ್ತಿನೆನ್ ತೂದುಲ ,ಆಯಗ್ ದಾಲ ಆತ್ಜಿ ಪನ್ಪುನೆನ್ ಆಲ್ ನಂಬುನ ಪೊರ್ತುಡಿಜ್ಜಾಂಡ್.ಕೈ ಪತ್ತಿನಾಯೆ ಕೈ ಕೊರ್ದು ಪೋಯೆ,ಆಂಡ ಬದ್ಕ್ನ್ ಬೊಲ್ಪು ಮಲ್ಪೆರೆ ಇತ್ತಿನ ಒಂಜಿ ಆನ ಕೊಡಿಪು ಆಲ್ನ ಮಗೆ,ಆಯನ್ ಅಂಚ ಮಲ್ಪೊಡು ಇಂಚ ಮಲ್ಪೊಡೂಂದ್ ಎನ್ನಿದ್ ,ಜೂವೊನೇ ತರೆತೊಂದಿತ್ತಿ ಅಪ್ಪೆಗಿತ್ತೆ ಕರ್ಲಕೊಡಿನೇ ಕಲೆವೊಂಡೆನಾ ಪನ್ಪಿ ಬೇನೆ ಸುರ್ಲಿ ಪಾಡ್ದ್ ಸುತ್ತೊಂದುಂಡು.ಜಾತ್ರೆಗೂಂದ್ ಕೊಸಿಟ್ ಬತ್ತಿನ ಅಪ್ಪೆ ಮಗೆ ಆ ಸಡಂಗರೊದ ಜಾಲ್ಡ್ ಎಚ್ಚಿಗೆ ಪೊರ್ತು ಉಂತುನ ಆ ದೇಬೆರೆಗ್ಲ ಆಯಿಜಾ ದಾನ್ನ..?ಸುಮತಿನ ಕನನೀರ್ ಬಾಲೆನ್ ನಾಡೊಂದು ಪೋವೊಂದುಂಡು,ಆಂಡ ರಗುನ ಮಂಡೆಡ್ ಆಯೆ ಎನ್ನಿನವೇ ನಿಜ ಆಪುಲೆಕ ತೋಜೊಂದುಂಡು..
ಅವ್ ಪುಲ್ಯದ ಪೊರ್ತು ನಿದ್ರೆದಾಂತೆ ಮೂವೆರ್ಲ ಬಾನೊದರಸು ಏಪ ಬರ್ಪೆ,ಕಾಡ್ನೇಪ ಬೊಲ್ಪು ಮಲ್ಪುವೇಂದ್ ಕಾತೊಂದಿತ್ತೆರ್,ಪುಲ್ಯ ಆಯಿನೇ ರಗು ಮೆಲ್ಲ ಕಾಡ್ದಂಚಿ ಪಜ್ಜೆ ದೀಯೆ ಆಯೆ ಪನೀತ್ ದುಂಬು ಪೋವೊಡಾಂಡ,ಆಯೆ ಎನ್ನಿಲೆಕಾನೆ ನಡತಿನ ಲಚ್ಚನೊಗು ಸಾಕ್ಷಿ ಕಣ್ಣೆದುರೇ ತಿಕ್ಂಡ್..
ದುಂಬರಿಯುಂಡು..
