ತುಳು ಕಥೆ
ಚೇತನ್ ವರ್ಕಾಡಿ
ಮಗೆ ಲಕ್ಕ್ದ್ ಕುಲ್ಲುನ ತೂದು ಅಪ್ಪೆಗ್ ಆಚಿರ ಆಂಡ್.ಮಿನ್ಕುಡ ಮನಸಿಜ್ಜ ಪಂಡ್ದ್ ಅಲೆನಾತಿಗೆ ಎನ್ಯಲ್.ಅತ್ತ್ ಮಗ ಯಾನ್ ಪಂಡ್ನೆಟ್ ದಾಲ ತಪ್ಪುಂಡ,ಅತ್ತ್ ನಿಕ್ಕ್ ಮನಸಿಜ್ಜ ಪಂಡ್ದ್ ಕೇನ್ನಗ,ಅಂಚತ್ತ್ ಅಮ್ಮ ಮಿನ್ಕುಗು ಮಾಮುಗು ನೇತ ಬಗೆಟ್ ತೆರಿಪದರ..?ಮದ್ಮೆ ಪಂಡ ಕಡೆಮುಟ್ಟಲ ಒಟ್ಟುಗುಪ್ಪುನ ಸಮ್ಮಂದ ಅಮ್ಮ,ಮಿನ್ಕು ಎನನ್ ಬುಡ್ದು ಬೇತೆ ಆನನ್ ಮೋಕೆ ಮಲ್ತಿತ್ತಲ್ಂಡ,ಆಲೆಗ್ಲ ಬೇಜಾರತೆ,ಉಂದು ಪೂರ ಗೊತ್ತಿಜ್ಜಂದೆ ಯಾನ್ ಎಂಚ ಅಮ್ಮ ಒತ್ತೊನ್ನೆ ಪನ್ನಗ ಸುಮತಿಗ್ಲ ಉಂದು ಪೂರ ಅಂದೂಂದ್ ಆಂಡ್.ಒಯ್ಕ್ಲ ತನ್ನ ಪಲಯಡ ಸಂಗತಿನ್ ತೆರಿಪಾವೊಡು ಪಂಡ್ದ್ ,ಮನದಾನಿಯೆ ರಗುನ ಕೈತಡೆ ಪೋಯಲ್.ತನ್ನ ತಂಗಡಿನೆರ್ದ್ಲ ಎಚ್ಚಿಗೆ ಮೋಕೆಡಿತ್ತಿ ಸುಮತಿ ಪಲಯನಡೆ ಬನ್ನಗ ಕೋರಿಕಜುಪುದ ತಮ್ಮನ ಪಾಡ್ಯೆ ಪಲಯೆ.ವನಸ್ ಮಲ್ತ್ ಪಲಯಡ ತನ್ನುಲಯಿದ ಆಸೆನ್ ತೆರಿಪಾಯಲ್ ತಂಗಡಿ.ರಗುಗು ಸುಮತಿನ ಪಾತೆರ ಕೇಂದ್ ಸಂತೋಸುಡು ದಾಲ ಬಲ್ಲಿ,ಸಂಪತ್ ಎಡ್ಡೆ ಗುಣನಡತೆದ ಆನ್ ಅವ್ವತ್ತಂದೆ ಎಡ್ಡೆ ಬೇಲೆಡುಲ್ಲೆ,ಮಿನ್ಕು ಆ ಇಲ್ಲಗ್ ಸೇರ್ಂಡ ಸುಮತಿ ತನ್ನ ಮಗಲೆರ್ದ್ ಎಚ್ಚಿಗೆ ಮೋಕೆಡ್ ತೂಪಲನ್ಪಿ ನಂಬಿಕೆ ಆಯಗಿತ್ತ್ ನೆಟೇ.ಅಂಚಿಂಚಿ ತೂವಂದೆ ಆವೂಂದ್ ಒತ್ತೊಂಡೆ.ಸುಮತಿಗ್ ಸಂತೋಸುಡು ದಾಲ ಬಲ್ಲಿ,ಜಾನಕಿಗ್ಲ ಮಗಲೆ ಬದ್ಕ್ ಎಡ್ಡೆಕೋಡಿಗೆತ್ತುಂಡು ಪನ್ಪಿನ ಕೊಸಿ ಇತ್ತ್ಂಡ್.ಈ ಕೊಸಿತ ಸಂಗತಿನ್ ಪತೊಂದು ಸುಮತಿ ಅಲ್ತ್ ಪಿದಡ್ಯಲ್.ಬಯ್ಯದ ಪೊರ್ತು ಮಗಲ್ ಬತ್ತ್ ಲೆಕಾನೆ ರಗು ಮಗಲ್ಡ ಮೋಕೆಡ್ ಈ ಇಸಯ ತೆರಿಪಾಯೆ,ಆಂಡ ಅಕ್ಲ್ ಎನ್ನಿಲೆಕ ಮಿನ್ಕು ನಡತ್ಜಲ್,ಸಂಪತ್ ತೂಯೆರೆ ಒಂತೆ ಪೊರ್ಲು ಕಮ್ಮಿ ಆಯಿನೆಟ್,ಐನೇ ಪತೊನ್ನ ಮಿನ್ಕು ಆಯೆ ಎಂಕೊಯ್ಕ್ಲ ಸಮ ಇಜ್ಜೇಂದ್ ಕಡ್ಡಿ ತುಂಡಾಯಿಲೆಕ ಪಂಡಲ್.ಮಗಲ್ನ ಪಾತೆರ ಕೆಂಡಿಲೆಕನೆ ರಗು ಪಿಸ್ರ್ ಏರ್ದ್ ರಡ್ಡ್ ಪೆಟ್ಟ್ ಆಕ್ಯೆ.ಏಪಲ ಕೈದೆರ್ಪಂದಿ ರಗುಗು ಆನಿ ದಾಯೆಗ ಅಲೆನ್ ಕೆರ್ಪುಲೆಕ ಪಿಸ್ರ್ ಏರ್ಂಡ್.ಸಂಪತ್ ಲಚ್ಚನೊಡು ಮಿನ್ಕುಗ್ ಒಂತೆ ಕಮ್ಮಿ ತೂಕೊಡುಪ್ಪೆ,ಆಂಡ ಗುಣನಡತೆಡ್ ಅಂಚಿನ ಆನ್ ಲಕ್ಷಡೊರಿ ಪನ್ಪಿನ ಸತ್ಯ ಆಯಗ್ ತೆರಿದಿತ್ತ್ಂಡ್.ನನದಾಲ ಪಲ ಇಜ್ಜಿ ಪಂಡ್ದ್ ಸುಮತಿಗ್ ಈ ಇಸಯೊನು ತೆರಿಪಾಯೆ,ಏತೋ ವೊರ್ಸೊರ್ದು ಆಲ್ ಕಟ್ಟಿನ ಕನ ಕಡಿದ್ ಪೋಯಿ ಬೇನೆ ಅಲೆಗಾಂಡ್.ದಿನೊಕುಲು ಕರಿಂಡ್ ಮಿನ್ಕುಗು ಬೇಲೆಲ ತಿಕ್ಕ್ಂಡ್,ಅಲೆ ಪೊರ್ಲುಗು ಮರ್ಲಾವಂದಿ ಆನುಲುಪ್ಪಯೆರ್ ಆತ್ ಪೊರ್ಲುಡು ಮೆನ್ಕೊಂತಲ್ ಆಲ್.ತನ್ನ ಪೊರ್ಲುರ್ದಾತ್ರನೇ ಆಯೆ ಎಂಕಾವಂದ್ ಪಂಡ್ದೇ ಮದ್ಮೆನ್ ದೂರ ಮಲ್ತೊಂದು ಬತ್ತಲ್.ಒಂಜಿದಿನ ಮಿನ್ಕು ಗಾಡಿಡ್ ಪೋವೊಂದುಪ್ಪುನಗ ಆಲ್ ಇತ್ತಿನ ಗಾಡಿ ಬ್ರೇಕ್ ಪೈಲಾದ್ ಪೋದು ಗುಂಡಿಗ್ ಬೂರ್ಂಡ್.ಐಟ್ ಇತ್ತಿನಕ್ಲೆಗ್ ಪೂರ ಮಲ್ಲ ಮಲ್ಲ ಪೆಟ್ಟಾಂಡ,ಮಿನ್ಕುನ ಒಂಜಿ ಕಣ್ಣ್ ಗ್ ಗಾಡಿದ ಕುಪ್ಪಿಚೂರು ಕಂತ್ದ್ ಆಸೊತ್ರೆಡ್ ಕಣ್ಣೇ ಪೋಪುನ ಪರಿಸ್ಥಿತಿ ಬತ್ತ್ಂಡ್.ಆಲ್ ಆಸೊತ್ರೆಡ್ ಉಪ್ಪುನ ಆತ್ ದಿನಲ ಸುಮತಿ ಅಪ್ಪೆಲೆಕ ತೂಯಲ್.ಸಂಪತ್ ತನ್ನ ಇಲ್ಲದಲ್ಕನೇ ದಿನಾಲ ಬತ್ತ್ ದೈರ ಪಂಡ್ದ್ ಪೋವೊಂತೆ.ಪೊರ್ಲೂಂದೆ ಪಾರೊಂದಿತ್ತಿ ಮಿನ್ಕುನ ಬದ್ಕ್ ಗಾಡಿ ಪಲ್ಟಿ ಆಯಿನೆಟ್ ಕತ್ತಲೆಗ್ ಬೂರ್ಲೆಕಾಂಡ್.ಒಂತೆ ದಿನ ಕರಿದ್ ಆಸೊತ್ರೆರ್ದ್ ಇಲ್ಲಗ್ ಬತ್ತಲ್,ಅಲೆ ಬದ್ಕ್ದ ಒಂಜಿ ಕಣ್ಣ್ ಕತ್ತಲೆ ಆದ್ ಪೋಂಡು.ದಿನೊಕುಲು ಕರಿಂಡ್ ಮಿನ್ಕು ಉಸರಾವೊಂದು ಬತ್ತಲ್,ಆಂಡ ಅಲೆ ಆತ್ ಪೊರ್ಲುಲ ಇತ್ತೆ ಒಂಜಿ ಕಣ್ಣ್ ದಾಂತೆ ಕತ್ತಲೆ ಆತ್ಂಡ್.ಅಲೆ ಪೊರ್ಲುತೂದು ಸುತ್ತೊಂತಿ ಜವನೆರ್ ಕಣ್ಣ್ ತೂದು ಪಿರಜಾರ್ಯೆರ್.ಪೊರ್ಲುಉಪ್ಪುನೆ ಮೋನೆಡತ್ತ್ ಉಡಲ್ಡ್ ಪನ್ಪಿನ ಸತ್ಯ ಅಲೆಗಿತ್ತೆ ತೆರಿಯೊಂದುಂಡು.ಬದ್ಕೇ ಕತ್ತಲೆ ಆಂಡೂಂದ್ ಕನನೀರ್ ದೀಪಿ ಕಾಲೊಗು ಬತ್ತೆತ್ಯಲ್..
ಇಂಚೆನೆ ಒಂಜಿ ದಿನ ಸಂಪತ್ಲ ಸುಮತಿಲ ರಗುನ ಇಲ್ಲಗ್ ಪೋನಗ ಮಿನ್ಕು ಇಲ್ಲದ ಉಲಯಿಡಿತ್ತಲ್.ಕಣ್ಣ್ದಾಂತಿ ಬದ್ಕ್ ಆಯಿಬೊಕ್ಕ ಆಲ್ ಅದೆಜತ್ತ್ ಪೋತುಜಲ್.ಈ ಇಸಯ ರಗು ಪಂಡ್ದೇ ಅಕ್ಲೆಗ್ ಗೊತ್ತಾಯಿನೆ.ಬಾಲೆದ ಬದ್ಕ್ ಕತ್ತಲೆ ಆದ್ ಪೋಂಡೂಂದ್ ರಗು ಕನನೀರ್ ಪಾಡ್ಯೆ,ಜಾನಕಿ ಎತೆದೆತ್ತಲ್.ಒಂಜಿ ಪೊರ್ತುಡು ತನ್ನ ಅಪ್ಪೆನ,ತನ್ನ ಜೂವೊನೊರಿತಿ ಸಮ್ಮಲೆನಂಚಿನರೆನ ಕಣ್ಣ್ಡ್ ಕನನೀರ್ ಜಪ್ಪುನೆನ್ ಸಂಪತ್ಗ್ ತೂಯೆರಾಯಿಜಿ.ಮಾಮು ಮಿನ್ಕು ಇತ್ತೆಲ ಒಪ್ವಲೂಂದಾಂಡ ಅಲೆಗ್ ನನೊಂಜಿ ಕಣ್ಣ್ ಯಾನಾಪೆ ಮಾಮೂ ಪಂಡ್ದ್ ಸಂಪತ್ ಪಂಡೆ.ಸುಮತಿಗ್ ಮಗನ ಪಾತೆರ ಕೇಂದ್ ಕಣ್ಣ್ ಡ್ ಪನ್ನೀರ್ ಜತ್ತ್ಂಡ್.ಅದೆಜತ್ತ್ ಬರಂದಿ ಮಿನ್ಕು ಚಾವಡಿಗ್ ಬತ್ತ್ ಸಂಪತ್ನ ಮನಸ್ದ ಬೊಲ್ಪುನು ತೂದು ಕೈಮುಗ್ಯೊಂಡಲ್,ತಾನ್ ಮಲ್ತಿನ ತಪ್ಪುಗು ಮಾಪು ಕೇಂಡಲ್.ಎನರ್ದಾತ್ರ ಈರ್ನ ಬದ್ಕ್ಲ ಕತ್ತಲೆ ಆಪುನ ಬೊರ್ಚಿ ಈರೆಗ್ ಎಡ್ಡೆ ಪೊಣ್ಣು ತಿಕ್ಕಡೂಂದ್ ಕೈಮುಗ್ಯಲ್.ಆಲೆ ಮನಸ್ ಸೊಚ್ಚ ಆದಿತ್ತ್ಂಡ್,ದಿಂಜಿ ಕನನೀರ್ ಬೊರ್ಚಾಂದಿ ಕಜವುನು ಪೂರ ಸುದ್ದಮಲ್ತಿತ್ತ್ಂಡ್.ಎಂಕ್ ಏತ್ಲ ಪೊಣ್ಣು ತಿಕ್ಕು ಆಂಡ ತಿಕ್ಕುನಕ್ಲ್ ಮಾತ ಎನ್ನ ಮಿನ್ಕು ಆಪೆರಾಂದ್ ಸಂಪತ್ ಆಲೆನೇ ತೂದು ಮೋಕೆಡ್ ಪನ್ನಗ ,ಮಿನ್ಕು ಜೋರ್ಡು ಬುಲ್ತಲ್.ಬುಲ್ತಿನಲೆನ್ ಅರಾದ್ ಪತ್ತ್ ಸಮದಾನ ಮಲ್ತೊಂಡೆ.ಮಾತೆರೆ ಮನಸ್ಸ್ ಡ್ ಸಂಪತ್ ಬಿರ್ಸೆ ಆನ್ ಮಗೆ ಆದ್ ತೋಜೊಂದುಲ್ಲೆ.ಸುಮತಿನ ಕನೊತ ಕಟ್ಟ್ ಕಡೆಕ್ಲ ನಿಜ ಆಂಡ್,ಮಿನ್ಕುನ ಬದ್ಕ್ ಪೊರ್ಲುಗು ಕಣ್ಣಬೊಲ್ಪು ದಿಂಜಿಲೆಕಾಂಡ್.ರಗು ಹಕ್ಕ್ದ ಸಮ್ಮಲೆ ಆಯೆ,ಸುಮತಿ ಮಿನ್ಕುಗು ಮಾಮಿಯಾಂಡಲ ಅಪ್ಪೆ ಆದ್ ಪಲಯೆ ಆನಿ ಮಲ್ತಿ ಸಾಯೊದ ರುನೊನು ಬೂಟ್ಯೆರೆ ಪಿದಡ್ಯಲ್..
ದಿನೊಕುಲು ಕರಿಂಡ್ ಕಾಡ್ದ ಬರಿತ ಇಲ್ಲ್ನ್ ಬುಡ್ದು ಸಂಪತ್ ಕಟ್ಟ್ನ ಮಲ್ಲ ಇಲ್ಲಡ್ ಮಾತೆರ್ಲ ಸಂತೋಸುಡು ಬದ್ಕೊಂದುಲ್ಲೆರ್.ಮಿನ್ಕು ತನ್ನ ಬದ್ಕ್ದ ಬಿರ್ಸನ್ ಇತ್ತೆ ಜೂವೊರ್ದು ಎಚ್ಚಿಗೆ ಮೋಕೆ ಮಲ್ತೊಂದುಲ್ಲಲ್,ಆ ಬಿರ್ಸೆ ಅಲೆನ್ ಕಣ್ಣ್ಗ್ ಕಣ್ಣಾದ್ ಕಾತೊಂದುಲ್ಲೆ..
ಮುಗಿಂಡ್.
