💢 ಕಟ್ಟ (7)
✍️ ಚೇತನ್ ವರ್ಕಾಡಿ
ಎದುರ್ಡು ಮೀಸೆ ಮಾದವೆ ಬರೊಂದುಲ್ಲೆ.ಆಯಗ್ ಆಯನೇ ನಂಬೆರಾಯಿಜಿ,ಮೀನ್ ಬತ್ತ್‌ದ್ ಅವ್ವೇ ಗಾಲೊದಡಿಕ್ ಬೂರ್ಲೆಕ ಕಲ್ಯಾಣಿ ಆಯನ ಎದುರು ತಿಕ್ಯಲ್.ಕಣ್ಣ್ ಒರ ಸರಿಕಟ್ ಬುಲಾಯಿ ಕಲ್ಯಾಣಿಗ್ ಎದುರ್ಡು ಯಮೆನೆ ಬತ್ತ್ ಉಂತುಲೆಕಾಂಡ್.ಅತ್ಯ ಕಲ್ಯಾಣಿ ದಾನೆ ಕುಲ್ಲೋಂದ ಬಚ್ಚಿಂಡಯಾ..? ಈ ಮುರಾನಿ ಅಂಚ ಮಲ್ಪೆರೆ ಬಲ್ಲಿತ್ತ್ಂಡಾವಯ,ನಿನ್ನ ಕಂಡನಿಯನಗ್ ಒಂಜಿಬೊಟ್ಟು ನೀರ್‌ಲ ಬುಡಂದಿಲೆಕ ನೆರ್ದ್ ಕಡಪುಡ್ಯ ಅತ ಅಂಚಿನ ತಪ್ಪು ಆಂಡಲ ಎಂಚಿನ ಮಲ್ತ್‌ದೆಯ..? ಮಾದವೆ ಮಸ್ಕಿ‌ರಿ ಪಾತೆರ್ಲೆಕ ಕಲ್ಯಾಣಿನ ಎದುರು ಪಾತೆರೊಂದು ಪೋನಗ ಅಲೆಗ್ ದಾನೆ ಮಲ್ಪೊಡೂಂದ್ ಆಯಿಜಿ.ಅವ್ ನಟಮದ್ಯಾನದ ಪೊರ್ತು ಆಯಿನೆರ್ದಾವರ ಆ ಸಾದಿಯೆ ಏರ್ಲ ಬರಯೆರ್ ಪಂಡ್ದ್, ಆಲೆಗ್ಲ ಗೊತ್ತುಂಡು,ಆಯಗ್ಲ ಗೊತ್ತುಂಡು.ಆಲೆಗ್ ಆಯನಲ್ತ್ ಎಂಚ ಪಿದಯಿ ಬರ್ಪುನೆ ಪನ್ಪಿನವೇ ಪೋಡಿಗೆ ಆಂಡ,ಆಯಗ್ ತಿಕ್ಕಿನ ಎಡ್ಡೆ ಪೊರ್ತುನು ಹಾಳ್ ಮಲ್ಪೆರೆ ಬಲ್ಲಿ ಪನ್ಪಿನವೇ ತರೆಟ್ ಪಾರೊಂದುಂಡು.ಸಾದಿ ಬುಡ್ಲೆ ಯಾನ್ ಪೋಪೆ ಪಂಡ್ದ್ ಸೆರಂಗ್ನ್ ಮುದ್ದೆ ಮಲ್ತ್ ,ಕಲ್ಯಾಣಿ ದುಂಬರಿನಗ,ಮಾದವನ ಮೈಲೆದ ಕಣ್ಣ್ ಆಲೆ ಪೊರ್ಲುದ ಮಿತ್ತ್ ಪಾರ್ಂಡ್.ಅತ್ಯ ಕಲ್ಯಾಣಿ ಈ ಜವ್ವಾನಾದಿಗೆನ್ ಪೊಕ್ಕಡೆ ದಾಯೆ ಹಾಳ್ ಮಲ್ಪುವ,ನಿಕ್ಕ್‌ಲ ಏರ್ಲ ಇಜ್ಜೆರ್ ಎಂಕ್‌ಲ ಏರ್ಲ ಇಜ್ಜೆರ್ ಎನ್ನೊಟ್ಟು ಬಲಯ ನಿನನ್ ಪೊರ್ಲುಡು ತೂಪೇ,ಮಾರಾಣಿಲೆಕ ಮಾನವೆ ಪಂಡ್ದ್,ಕಲ್ಯಾಣಿನ ಸೆರಂಗ್ ಪತ್ತೆರೆ ಪೋನಗ ಆಯನ್ ಕುಡ್ತುದು ದೂರ ಪೋಯಲ್.ನಿಕ್ಕ್ ಮರ್ಯಾದಿ ಕೊರ್ದು ಪಾತೆರುನಲ ಎಚ್ಚಿಗೆ,ದಾದ ಪಂಡ ನಿನ್ನೊಟ್ಟು ಬರೊಡ..?ನಿಕ್ಕ್ ನಾಚಿಗೆ ಆಪುಜಯ ಕರ್ಯಮನಿ ಕಟ್ಟಿನ ಬೊಡೆದಿನ್ ಗಿಡತ, ಏತೋ ಪೊಣ್ಣುಲೆನ ಬದ್ಕ್‌ನ್ ಹಾಳ್ ಮಲ್ತಿನಾಯೆ ಈ,ದಾಲ ತಪ್ಪು ಮಲ್ಪಂದಿನ ಎನ್ನ ಕಂಡನಿಯನೆ ಕೆರ್ದ್ ಆ ಅಪವಾದೊನು ದನಿನ ಮಿತ್ತ್ ಪಾಡ್ಯ,ಈ ಎಡ್ಡೆ ಆಪುಜಯ ಮಣ್ಣ್ ತಿಂದ್ ಪೋಪ ಪಂಡ್ದ್ ಬೇನೆದಗ್ಗಿಡ್ ಮುರಿಯದೀಯಲ್.ನೇನ್ ಪೂರ ಕೇನ್ ಕೇನ್ದ್ ಅಬ್ಬೆಸ ಆಯಿನ ಮಾದವಗ್ ಅವ್ ಒಂಜಿ ಮಲ್ಲ ಇಸಯೊನೆ ಆಯಿಜಿ.ಕಲ್ಯಾಣಿನ್ ಇನಿ ಬುಡ್ಂಡ ನನ ತಿಕುಜಲ್ ಪಂಡ್ದ್ ಪೋರ್ಜರಿಡ್ ಆಲ್ನ ಮೇಲ್ ಮುಟ್ಯೆರೆ ಪೋಯೆ,ಆಯನ ಕೈರ್ದ್ ತಪ್ಪಾದ್ ಪೋಯಿನ ಕಲ್ಯಾಣಿ ಅಲ್ತ್ ಪಾರೊಂದು ಪೋಯಲ್,ಮಾದವೆ ಆಲೆನ್ ಬೆರಿಪತೊಂದು ಆಲೆರ್ದ್ ದುಂಬು ಪೋದು ಉಂತ್ಯೆ.ಕುಡ ಪಿರ ಬತ್ತಿ ಸಾದಿದಂಚಿ ತಿರ್ಗ್‌ಯಲ್.ಕಟ್ಟೆದ ಸುತ್ತ ಆಯನ ಕೈಕ್ ತಿಕ್ಕಂದಿಲೆಕ ಪಾರುನವೇ ಆಲ್ನ ಬೇಲೆ ಆಂಡ್.ಮಾನ ಪೋಪಿ ಪೊರ್ತು ಬತ್ತ್ಂಡ ಜೂವ ಆಂಡ ಬುಡ್ವೆ ಆಂಡ,ಬದ್ಕ್‌ದ್ ಒರಿಯಯೆ ಪಂಡ್ದ್ ಮನಸ್‌ಡ್ ಗಟ್ಟಿದ ನಿರ್ದಾರ ಮಲ್ತೊಂಡಲ್.ಇಂಚಿಡ್ ಮಾದವೆ ಎಂಚಿನ ಆಂಡಲ ಮಲ್ಲೆಜ್ಜಿ ಕಲ್ಯಾಣಿನ್ ತನ್ನಾಲ್ ಮಲ್ತೊನಂದೆ ಮುಲ್ತು ಪಿದಯಿ ಪೋವಯೆ ಪನ್ಪಿಲೆಕ ಸಪತ ಪಾಡೊಂಡೆ.ಪಿಲಿಪತ್ತಿ ಗಡಸ್‌ದಲ್ಕ ಆಂಡ್ ಕಲ್ಯಾಣಿನ ಕತೆ,ಅವ್ವೇ ಗೋಲಿದ ಮರಟ್ ಆನಿ ಗೋಪಾಲೆ ತನ್ನ ಬದ್ಕ್‌ನ್ ಮುಗಿತೊಂಡೆಂಡ,ಇನಿ ಕಲ್ಯಾಣಿ ಬದ್ಕುನ ಆಸೆ ಬುಡ್ದು ಸುತ್ತು ಬರೊಂದುಲ್ಲಲ್.ಪಾರ್ ಪಾರ್ದ್ ಬಚ್ಚಿನ ಕಲ್ಯಾಣಿ ಕಡೆಕ್ಲಾ ಮಾದವನ ಕೈಕ್ ತಿಕ್‌ದ್ ಬೂರ್ಯಲ್.ಆಲೆ ಕಣ್ಣ್‌ಡ್ ಕನನೀರ್ ದೊರಿಯೊಂದುಂಡು,ಎನನ್ ಬುಡು,ಈ ಎನ್ನಿನಂಚಿನ ಪೊಣ್ಣು ಯಾನತ್ತ್ ಪಂಡ್ದ್ ಕೈಯೊಪ್ಪ ಮಲ್ತ್ ನಟ್ಟ್ಂಡಲ,ಆಯನ ಕೆಬಿಕ್ ಅವ್ ಕೇನ್ಜಿ.ಮೀಸೆನೊರ ಪೂಜಿದ್ ಕಾರ್ಗ್‌ಬೂರಿ ಕಲ್ಯಾಣಿನ್ ಕೈಟ್ ಪತ್ತ್ ದೇರ್ಪುನಗ,ಆಯನ ಕೋಲೊನು ಸೈಸೊನೆರೆ ಆವಂದಿ ಕಲ್ಯಾಣಿ ಕೆಬಿತಂಡೆಗ್ ಕೊರ್ಯಲ್,ದುಂಬೇ ಪಿಸ್ರ್‌ಡಿತ್ತಿ ಮಾದವೆ,ಮರಿನಾಂಡಲ ಮೂಜಿಸರ್ತಿ ಸಾರುನೆ ಪಂಡೊಂದು ಆಲೆನ್ ಬಲತ್ಕಾರ ಮಲ್ಪೆರೆ ದುಂಬಾಯೆ,ಮಾದವನ ಕೈರ್ದ್ ನನ ದಾನೆ ತಪ್ಪಾಯೆರೆ ಆಪುಜಿ ಪನ್ನಗ…ಗೋಲಿದ ಮರತ ಕೊಡೀರ್ದ್,ಇರೆ ಪಂದೆರೆ ಸುರುವಾಂಡ್,ಮಾದವೆ ಮಿತ್ತನ್ನಾದ್ ತೂಪೆನೇ…
