💢 ಕಟ್ಟ (9)
✍️ ಚೇತನ್ ವರ್ಕಾಡಿ
ಕಡಕ್ಕ್ ಇಸ್ತ್ರಿ ಪಾಡ್ನ ಬೊಲ್ದು ಅಂಗಿಲ ಬೊಲ್ದು ಮುಂಡುಲ ಪಾಡ್ದ್, ಮೀಸೆ ತಿರ್ಗಾವೊಂದು ತಿರ್ಗೊಂದಿತ್ತಿ ಮಾದವೆ ಕಾಲಿ ಚಡ್ಡಿ‌ಲ ವೊಟ್ಟೆ ಬನ್ಯಾನ್ ಪಾಡೊಂದು ದೊಲ್ಲೆ ಅರಿಪಾವೊಂದು,ತ್ಯಾಂಪಣ್ಣನ ಎದುರು ಬತ್ತ್‌ದ್ ,ನೀರ್ ಬೋಡು ಪನ್ಪಿಲೆಕ ರಡ್ಡ್ ಕೈನ್ ದುಂಬು ಪತ್ಯೆ.ತ್ಯಾಂಪಣ್ಣೆ ಕೈಟಿತ್ತಿ ಚೆಂಬುನು ಆಯಗ್ ಕೊರ್ಯೆರ್,ರಪರಪ ನೀರ್ ಪರ್ದ್ ಚೆಂಬುನಡೇಗೆ ತಿರ್ತ್ ಪಾಡ್ನಾಯೆ,ಗೋಪಾಲನ್ ಯಾನ್ ಕೆರ್ನೆ,ಗೋಪಾಲನ್ ಯಾನ್ ಕೆರ್ನೇಂದ್ ಆರೆ ಸುತ್ತು ಸುತ್ತು ಬತ್ತ್ ಪನೊಂದು ಪಿಜಿರ್ದ್ ಅಲ್ತ್ ಸೀದ ಪಾರ್ ಪೋಯೆ.ಪಗೆಮಾನಿ ಆಂಡಲ ಇಂಚ ಆಯೆರೆ ಬಲ್ಲಿ ಪಂಡ್ದ್ ತ್ಯಾಂಪಣ್ಣನ ಉಡಲ್ ಕರಂಡ್.ದೇವೆರೆ ಗೊಬ್ಬುದ ನಡುಟು ನಮ ಕಾಲಿ ಗೊಂಬೆ ಆತೆ ಪನ್ಪಿ ಸತ್ಯ ಸಂಗತಿ ಮಾದವನ್ ತೂಂಡನೆ ಮಾತೆರೆಗ್ಲ ತೆರಿವು.ಮಾದವೆ ಕಣ್ಣ್‌ರ್ದ್ ಮಾಜಿಲೆಕಾನೆ,ತ್ಯಾಂಪಣ್ಣೆ ಕೈ ದೆಕೊಂದು ಉಲಯಿ ಪೋಯೆರ್.ಅಮ್ಮೆರ್ ಬತ್ತ್ ಇಲ್ಲ್ ದುಂಬುದಲ್ಕ ಆಯಿನ್ನೇ ಜೋಕುಲು ಅರ್ವತ್ತಲ್ಲು ಪೂರ ಅಕ್ಲಕ್ಲೆ ಇಲ್ಲಗ್ ಪೋಯೆರ್.ಇತ್ತೆ ಒರಿನೆ ಆರ್ನ ನಾಲ್ ಪುಲ್ಯಲ್ಲು‌ಲ ಬೊಡೆದಿಲ.ಅಜ್ಜೆರೆ ಈರೆಗ್ ಕರ್ಪಿಲ್ಲ್‌ದ ಅದೆಟ್ ಅಕ್ಲ್ ಆಕ್ಯೆರೆ ಅಜ್ಜ,ಅತ್ತ್ ಈರೆನ್ ದಾಯೆ ಅಜ್ಜ ಕೊನೊಯಿನಿ,ಅಕ್ಲ್ ಎಂಕ್ಲೆಗ್ ತಿಕ್ಕಡ್ ಮಲ್ಲೆ ಆಯಿಬೊಕ್ಕ ಎಂಕುಲುಲ ಪೋಲಿಸಾದ್ ಅಕ್ಲೆಗ್ ಸರಿ ಆಕ್ವ.ಪುಲ್ಯಲ್ಲೆನ ಪಾತೆರ ಕೇನೊಂತುಲೆಕಾ‌ನೆ,ಅಜ್ಜೆರೆಗ್ ಎಂಚಿನ ಪಾತೆರೊಡೂಂದೆ ಆಯಿಜಿ.ಜೋಕ್ಲೆ ಮೋಕೆದ ಪಾತೆರೊನೇ ಆರ್ನ ಬೇನೆನ್ ಮಾಜಾಂಡ್.ಜೋಕುಲೇ ಪಂಡೊಂದು ಮಾತೆರೆನ್ಲ ಅರಾದ್ ಪತ್ಯೆರ್.ಅತ್ಯೆ ಅಲ್ಪ ಈರೆಗ್ ಆಕ್ಯೆರೇ ಪಂಡ್ದ್ ಪಾರ್ವತಿಯಕ್ಕೆ ಕೇನ್ನಗ,ಏಯ್ ಇಜ್ಜಿ‌ಯ ಪಂಡ್ದ್ ಕುಸಾಲ್ಡ್ ಕೊನೊಯೆರ್,ಆಂಡ ಆರ್ ಕಣ್ಣ್‌ಕಟ್ಟ್‌ಗ್ ಆತೆ ಪಂಡಿನವು ಅತ್ತಾಂದೆ,ಮಾದವೆ ಪಂಡಿನನೆ ಸತ್ಯ ಎನ್ನಿನ ಪೋಲಿಸ್‌ದಕ್ಲ್ ತ್ಯಾಂಪಣ್ಣನ ಪ್ರಾಯಲ ತೂವಂದೆ ಬಾಯಿ ಬುಡ್ಪಾಯೆರೆ ಸರಿ ಆಕ್‌ದಿತ್ತೆರ್,ಅವ್ ಪಾರ್ವತಿಯಕ್ಕೆಗ್ ಗೊತ್ತಾಯಿನಿ ತ್ಯಾಂಪಣ್ಣೆ ಅಂಗಿ ದೆಪ್ಪುನಗನೆ.ನಾಗರಬೆತ್ತದ ನಾರ್ ಪೆಟ್ಟ್ ಆರೆ ಬೆರಿಟ್ ಬೂರುದಲ್ಕ ಅಂಚಿಂಚಿ ಪಾರ್‌ದಿತ್ತ್ಂಡ್.ನೇನ್ ತೂಯಿ ಪಾರ್ವತಿಯಕ್ಕ‌ನ ಕಣ್ಣ್ ಬೊದುಲ್‌ಂಡ್,ಎಂಚಿನೆಯೆ ಉಂದು ಅಕ್ಲ್ ನರಮಾನಿಲತ್ತ ಅಪಗ,ಈತ್ ಬೇನೆನ್ ಎಂಚ ತಾಂಗೊಂಡರ್ಯೆ ಪಂಡ್ದ್ ಉಲಯಿ ಪೋದು ಬೇನೆದ ಎಣ್ಣೆ ಕೊನತ್ ಬೆರಿಕ್ ಸಮಾ ಪೂಜಿದ್ ಸಾಕ ಕೊರ್ಯೆರ್.ಏತೋ ದಿನೊರ್ದ್ ಬೊಕ್ಕ ತ್ಯಾಂಪಣ್ಣೆ ಆನಿ ಒಂಜಿ ಪೊರ್ಲುಡು ನಿದೆರ್ಯೆರ್..
ಮೀಸೆ ಮಾದವೆ ಇತ್ತೆ ಮೀಸೆ ಪೋದು ಮರ್ಲೆ ಮಾದಾವೆ ಪಂಡ್ದ್ ಮಾತೆರೆ ಬಾಯಿಡ್ ಸಸಾರೊಡು ಬೂರ್ಯೆರೆ ಸುರುವಾಯೆ,ಒಂಜಿ ಪೊರ್ತುಡು ಆಯನ ಪುದರ್ ದೆಪ್ಪೆರೆಲ ಪೋಡ್ಯೊಂತಿ ಜನೊಕುಲು ಇನಿ ಆಯೆ ಮಲ್ಪುನ ಅವಸ್ಥೆ ತೂದು ಚೀ ತೂಂದ್ ಉಬಿಪೆರ್.ಕಾಲ ಏತೊಂಜಿ ಕಲ್ಜಿಗ ಮಾದವನ ಬದ್ಕ್‌ಡ್ ಗೊಬ್ಬಿನಾಯೆ ಒರಿ,ಗೋಪಾಲನ ಬದ್ಕ್‌ಡ್ ಗೊಬ್ಬೆರೆ ಕಾರಣ ಆಯಿನಿ ಒರಿ,ತ್ಯಾಂಪಣ್ಣನ ಬದ್ಕ್‌ಡ್ ಗೊಬ್ಬಿನಾಯೆ ಒರಿ .ಆ ಒರಿ ಮಾದವನ್ ಪತೊಂದು ಬೋಡಾಯಿಲೆಕ ಮಾದಾಯೆ,ಕಾಸ್‌ದ ಬಲೊಟು ಒರೊಗು ಅವ್ ಎಡೇನ ತಿರ್ಗ್‌ಂಡ್,ಮಾದವನ ಪಗೆಲ ಸಂದುಂಡು ಪನ್ಪಿಲೆಕ ಇತ್ತ್ಂಡ್,ಆಂಡ ದರ್ಮ ತಪ್ಪುಂಡು ಪನ್ನಗ,ಒವ್ವಾ ಒಂಜಿ ಶಕ್ತಿ ದರ್ಮದಂಟೆರೆ ಬುಡ್ಜಿ. ಮಾದವನ ಬದ್ಕೇ ಬಲ್ಲ್ ತತ್ತಿ ಗಾಲಿಪಟ ಆದ್ ಓಲೋಲು ಆದ್ ಪೋಂಡು,ಮಾದವೆ ಕಲ್ಯಾಣಿನ್ ತನ್ನಾಲ್ ಮಲ್ಪೊಡೂಂದ್ ಪೊಕ್ಕಡೆ ಪಿದಡ್ದ್ ಇಜ್ದಾಂಡ್ ಐಟ್‌ಲ ಒಂಜಿ ಕತೆ ಉಂಡು..ಮಾತಲ ಆಯನ ತಪ್ಪೂಂದುಲ ಪನ್ಯೆರಾಪುಜಿ.
ದುಂಬರಿಯುಂಡು…
