ತುಳು ಕಥೆ
ಚೇತನ್ ವ
ಜಕ್ಕಟ್ ಜವ್ವನ್ದಿ ಪೊಣ್ಣೊರ್ತಿನ್ ಓನಿ ಒರುಂಕ್ ಗುಡ್ಡೆ ಕಾಡ್ಂದೆನ್ಯಂದೆ ಗಿಡತ್ ಗಿಡತ್ದ್ ನಾಲ್ ಜನ ಬತ್ತ್ ಸೇರ್ನೆ ರಗುನ ಇಲ್ಲ ಜಾಲ್ಗ್.ಜಾಲ್ಡ್ ಪೊಣ್ಣ ಬದ್ಕ್ಗೆ ಕೊಲ್ಲಿ ದೀಪಿಲೆಕ ಅರೆದೊಂದುಲ್ಲೆರ್ ಅಕ್ಲ್,ಅಕ್ಲೆ ನಡುಟು ಪಿಲಿಪತ್ತಿ ಗಡಸಾತಲ್ ಆ ಪೊಣ್ಣು,ಅಕ್ಲೆ ಕೈರ್ದ್ ತಪ್ಪೆರೆ ಅರಬಾಯಿ ದೀಪಲ್,ಕಲ್ಕುವಲ್,ಬುಲ್ಪವಲ್ ಆಲ್.ರಗುನ ಕೈಕಾರ್ ಕುಂಬರೊಂದುಂಡು,ನಾಲ್ ಜನೊಟ ಕಾದ್ದ್ ಗೇಲ್ದ ಪಾಲ್ಪಡೆಪಿ ತಾಕತ್ತ್ ಆಯಗಿಜ್ಜಾಂಡ್,ಅಮಲ್ಡ್ ಕುಮೆದಿನ ಅಕ್ಲೆಗ್ ಮೈ ನಿಲಿಕೆ ಗುಮುಲೊಂದಿತ್ತಿ ಅಂಗ್ ಅರ್ಬುವೇ ಬೇತೆ.ರಗುಗು ತನ್ನ ಕಣ್ಣೆದುರುಡು ತಂಗಡಿಲೆಕ ತೋಜುನ ಪೊಣ್ಣನ ಬದ್ಕ್ ಕರಿಪತ್ತೆರೆ ಬಲ್ಲಿ ಪನ್ಪಿ ಏವ್ರೊಡು,ಔಸೊದ ಆಸೆನ್ ಬುಡ್ದು,ತನ್ನ ರಚ್ಚನೆದೊರುವಾದಿತ್ತಿನ ಬೋಂಟೆದ ಬೆಡಿ ಪತೊಂದು ಇಲ್ಲರ್ದ್ ಜಗಲಿಗ್ ಜತ್ತೆ,ರಗುನ ಬೆಡಿತ ಈಡ್ ನಾಲ್ಜನೊತ ಮಂಡೆಡ್ ಅಂಚಿಗೊರ ಇಂಚಿಗೊರ ಪಗರೊಂತುಂಡು.ಆಸೆದ ಅಮಲ್ಡ್ ಪಾಸಬೂರಿನಕ್ಲ್ ನನ ದುಂಬರಿಂಡ ದೋಸಬರ್ಪುಂಡು ಪಂಡ್ದೆನ್ನಿದ್ ಪೊಣ್ಣನ ಮೈಬುಡ್ಯೆರ್,ಪತ್ತಿನ ಕೈ ಬುಡ್ಯೆರ್.ಬೆಡಿತ ಈಡ್ ಆಯನ್ ಕೆರ್ಪುಂಡ ಎನನ್ ಕೆರ್ಪುಂಡ ಪನ್ಪಿ ಪೋಡಿಗೆ ಅಕ್ಲೆ ಗರ್ಬೊದದೆಟ್ ಎಡ್ಪೆರೆ ಸುರುವಾಂಡ್.ಸೈಪಿಲೆಕಾದಿತ್ತಿ ಪೊಣ್ಣಗ್ ತಮೆರಿಲೆಕ ತಾಂಗ್ದ ತರ್ಕೆಲಾದ್ ತೋಜಿಯೆ ರಗು.ಪೊಣ್ಣು ಅಕ್ಲೆ ನಡೂರ್ದ್ ಪಿದಯಿ ಬತ್ತಿಲೆಕಾನೆ ಒಂಜೊಂಜಿ ಮೆಲ್ಲ ಮೆಲ್ಲ ಅಲ್ತ್ ತೆಲಯೆರ್,ಬೆಡಿನೆ ತೂವೊಂದು ಪಿಜಿರೊಂದು ಪಿಜಿರೊಂದು ಬತ್ತಿ ಸಾದಿ ಕೈತತ್ತ್ ಪೋಂಡಲ ಮಲ್ಲೆಜ್ಜಿ,ಬದ್ಕ್ದೊರಿಂಡ ಪೆಜ್ಜಿ ತಿನೊಲೀಂದ್ ಪಾರ್ಯೆರ್.ಮುರ್ಗೊಲೆರ್ದ್ ತನ್ಕ್ ರಚ್ಚನೆದ ಉರ್ಕು ಆಯಿನ ಬೆಡಿ ಇನಿ ಒಂಜಿ ಪೊಣ್ಣ ಮಾನೊನು ಒರಿತ್ಂಡತ ಪಂಡ್ದ್ ಐಕೊಂಜಿ ಮುಂಡನೂರ್ದ್ ಉಲಯಿ ಕೊನೋದು ದೀಯೆ ರಗು.ಪೊಣ್ಣಿತ್ತೆ ಬಚ್ಚಿದ್ ಬಸ ಇಜ್ಜಾಂದಿನಾಲ್ ಅಕ್ಲೆ ಜಗಲಿದರುಟು ಕುಲ್ಲುದಲ್,ರಗು ಬಾಕಿಲ್ದಲ್ಪ ಉಂತೊಂದೆ,ಅಲೆ ಪಿರವು ಜಾನಕಿ ಉಲ್ಲಲ್.ಬತ್ತಿನ ಪೊಣ್ಣನ ಕಣ್ಣ್ಡ್ ಜಪ್ಪುನ ಕನನೀರ್ ಒಂಜಿ ಕರ್ಲ್ ಕಡಿಪುನ ಕತೆನ್ ಪನೊಂದುಂಡು,ಪಲಯಲೆಕ ತನ್ನ ಬದ್ಕ್ನೊರಿತಿನ ರಗುಡ ಐನ್ ಪನೊಡೂಂದ್ ಕಾತೊಂದುಂಡು,ಪನ್ಯೆರೆ ರಗು ತಂಗಡಿಲೆಕಂತಿ ಪೊಣ್ಣನ ಕತೆನ್ ಕೇನೆರೆ ತಯಾರುಲ್ಲೆನಾಂದ್ ಆಲೆಗ್ಲ ತೆರಿಯೊಡಾಂಡ ಆಯೆನೆ ಸುರು ಆಲೆಡ ಪಾತೆರೊಡೂಂದ್,ತಗೆಲಕ ತೋಜುನ ರಗುನ ಮೋನೆನೆ ತೂಪಲ್ ಆ ಪೊಣ್ಣು,ರಗು ಜಪ್ಪುನ ಕನನೀರ್ಗ್ ಕರಾದ್ ಪೋಯೆ,ಪಲಯಲೆಕ ಮಾನಾದ್ ಅಲೆ ಕನನೀರ್ನೊಚ್ಚೊಂದು ಬೇನೆದ ಉಲಕತೆನ್ ಪಟ್ಟೊನ್ಯೆರೆ ಪನ್ನಗ,ದಿಂಜಿ ಕನನೀರ್ನ್ ತಾಂಗುನ ಪಲಯೆನೇ ತಿಕಿಲೆಕ ಆ ಪೊಣ್ಣು ಜಗಲಿಡ್ ಕುಲೋಂದು ಜಕ್ಕೆಲ್ಡಿತ್ತಿ ಬೇನೆದ ಕಟ್ಟ್ನೊಂಜೊಂಜೇ ಬುಡ್ಪಾಯೆರೆ ಪಿದಡ್ಯಲ್.
