ಇಸ್ಲಾಮಾಬಾದ್: ಪಾಕಿಸ್ತಾನದಲ್ಲಿ ಈದ್‌ ಅಲ್‌ ಅಧಾ ಹಬ್ಬದ ಆಚರಣೆ ನಡುವೆ ತರಕಾರಿಗಳ ಬೆಲೆ ಗಗನಕ್ಕೇರಿದ್ದು ಪ್ರತಿ ಕಿಲೋ ಟೊಮೆಟೋ ಬೆಲೆ 200 ರೂಪಾಯಿಗೆ ಏರಿಕೆಯಾಗಿದೆ. ಮೊದಲೇ ಆರ್ಥಿಕವಾಗಿ ದಿವಾಳಿಯಾಗಿರುವ ಪಾಕಿಸ್ತಾನದ ಜನತೆಯು ತರಕಾರಿ ಬೆಲೆ ಏರಿಕೆಯಿಂದ ಕಂಗೆಟ್ಟಿದ್ದಾರೆ.
ಪಾಕ್‌ ನ ಪ್ರಾಂತೀಯ ಸರ್ಕಾರ ಒಂದು ಕೆಜಿ ಟೊಮೆಟೋ ಬೆಲೆಯನ್ನು 100 ರೂಪಾಯಿ ಎಂದು ನಿಗದಿಪಡಿಸಿದ್ದು ಪೇಶಾವರದಲ್ಲಿ ಜಿಲ್ಲೆಯಿಂದ ಟೊಮೆಟೋ ಸಾಗಾಟ ಮಾಡದಂತೆ ನಿಷೇಧ ಹೇರಿ 144 ಸೆಕ್ಷನ್‌ ಜಾರಿಗೊಳಿಸಿರುವುದಾಗಿ ತಿಳಿಸಿದೆ.
ಪೇಶಾವರದಿಂದ ಟೊಮೆಟೋ, ಹಣ್ಣು, ಹಂಪಲು ಸರಬರಾಜು ಆಗದ ಪರಿಣಾಮ ಲಾಹೋರ್‌ ನಲ್ಲಿ ತರಕಾರಿ, ಹಣ್ಣು ಮಾರಾಟಗಾರರು ದುಪ್ಪಟ್ಟು ಬೆಲೆ ಏರಿಕೆ ಮಾಡಿರುವುದಾಗಿ ಮೂಲಗಳ ಪ್ರಕಾರ ತಿಳಿದು ಬಂದಿದೆ.
ಲಿಂಬೆ ಹಣ್ಣಿನ ಬೆಲೆ ಪ್ರತಿ ಕೆಜಿಗೆ 480 ರೂಪಾಯಿಯಾಗಿದೆ. ಒಂದು ಕೆಜಿ ಈರುಳ್ಳಿ ಬೆಲೆ 100 ರೂಪಾಯಿ ಎಂದು ಪಾಕ್‌ ಸರ್ಕಾರ ನಿಗದಿಪಡಿಸಿದ್ದರೂ ಮಾರ್ಕೆಟ್‌ ನಲ್ಲಿ ಒಂದು ಕೆಜಿ ಈರುಳ್ಳಿ ಬೆಲೆ 150 ರೂಪಾಯಿಗೆ ಏರಿಕೆಯಾಗಿದೆ. ಸಾರ್ವಜನಿಕರು ಹಣದುಬ್ಬರದಿಂದ ತತ್ತರಿಸಿ ಹೋಗಿದ್ದು, ಪಾಕ್‌ ಸರ್ಕಾರ ಮಾತ್ರ ಕಣ್ಮುಚ್ಚಿ ಕುಳಿತಿರುವುದಾಗಿ ಜನರು ತಮ್ಮ ಅಳಲು ತೋಡಿಕೊಂಡಿದ್ದಾರೆ.
ಒಂದು ಕೆಜಿ ಕೋಳಿ ಮಾಂಸದ ಬೆಲೆ 494 ರೂಪಾಯಿ ಎಂದು ಸರ್ಕಾರ ಬೆಲೆ ನಿಗದಿಪಡಿಸಿದ್ದು ಆದರೆ ಮಾರ್ಕೆಟ್‌ ನಲ್ಲಿ ಒಂದು ಕೆಜಿ ಕೋಳಿ ಮಾಂಸದ ಬೆಲೆ 700 ರೂಪಾಯಿ, ಬಟಾಟೆ ಬೆಲೆ ಕೆಜಿಗೆ 100ರೂಪಾಯಿ ದಾಟಿರುವುದಾಗಿ ವರದಿ ತಿಳಿಸಿದೆ
