ಕಟ್ಟ (3)
ಚೇತನ್ ವರ್ಕಾಡಿ
ದಾದಯ ಗೋಪಾಲ ಇಂಚಲ ಎನನೇ ತೂದು ಮಸೆಪ…? ಬೇಲೆದಾಯನ್ ಜೋಕುಲ್ಲೆಕ ತೂಯಿನೆಕಾ. ? ಅರ್ನೊಲಯಿಡೇ ಗೋಪಾಲನ್ ತೂವೊಂದು ಅರೆಗಾರೆ ಪ್ರಸ್ನೆ ಪಾಡೊಂದುಲ್ಲೆರ್ ತ್ಯಾಂಪಣ್ಣೆ.ಗೋಪಾಲೆ ನಿಯತ್ತ್ ಪಂಡ ಜೂವ ಬುಡ್ಪುನ ನರಮಾನಿ,ತ್ಯಾಂಪಣ್ಣಗೊಂಜಿ ಬಲತ್ತ ಕೈ ಇತ್ತಿಲೆಕ ಇತ್ತೆ.ಏರೆ ರಗಲೆಗ್ಲ ಪೋವಂದಿನ ಗೋಪಾಲೆ ಇರ್ಲ್ ಬೊಲ್ಪಾಪಿನೆತ ಉಲಯಿ ಇಂಚ ಮಲ್ಪೆರೆ ಕಾರಣ ಎಂಚಿನ..? ಏಪಲ ಪರಂದಿನ ಗೋಪಾಲನ್ ಏರ್ಲ ಪರ್ಪಾಯೆರಾ…?ಇಂಚ ಆಲಚನೆದ ನಡುಟು ತ್ಯಾಂಪಣ್ಣನ ಮಂಡೆನೆ ಗಿರ್ಮಿಟಾಯೆರೆ ಸುರುವಾಂಡ್.ಊರುದ ಜನಮಂದೆಲು ಗೋಲಿದ ಮರತಡಿಟ್ ಸೇರ್ಯೆರ್.ತ್ಯಾಂಪಣ್ಣೆ ಪುನನ್ ಬಲ್ಲ್‌ರ್ದ್ ಗಿರಿಪೆರೆ ಪನ್ನಗ ,ಏರ್ಲ ಗೋಪಾಲನಡೆ ಪೋಪುಜೆರ್,ಆಯೆ ಅಂಚ ನಾಲಯಿ ಪಿದಯಿ ಪಾಡ್ದ್ ಮಸೆವೊಂತೆ.ಗೋಲಿದ ಮರ ಪಂಡ ಅವ್ ಕಾಲಿ ಗೋಲಿದ ಮರ ಆದಿಜ್ಜಂಡ್ ,ಏತೋ ತಪ್ಪು ಸರಿನ್ ಅಜತ್ ದೆತ್ತಿನ ಪಂಚಾತಿಕೆದ ಕಟ್ಟೆದ ನಡುಟು ತೆಲಿತುದುಂತಿನ ಗೋಲಿದ ಮರ ಆದಿತ್ತ್ಂಡ್ ಅವ್.ಏತೋ ತಪ್ಪುಲೆಗ್ ನ್ಯಾಯೊದ ವೊರುಟು ತೀರ್ಮಾನ ಕೊರಿ ತ್ಯಾಂಪಣ್ಣೆ ಕುಲ್ಲೊಂದಿತ್ತಿ ಕಟ್ಟೆ ಅವ್.ಇನಿ ಅವ್ವೇ ಕಟ್ಟೆದ ಬರಿಟ್ ದನಿನ ಬರೀಟ್ ಕೈಕಟ್ಟ್‌ದ್ ಉಂತೊಂದಿತ್ತಿ ಗೋಪಾಲೆ,ಆರೆರ್ದ್ ಮಿತ್ತ್ ಪೋದು ನೇಲೊಂದುಲ್ಲೆ ಪಂಡ,ಉಂದು ಗೋಪಾಲೆ ಆದೆ ದೆತೊಂದಿ ತೀರ್ಮಾನ ಅತ್ತ್ ಪಂಡ್ದ್ ಕೆಲವೆರ್ ಅಕ್ಲಕ್ಲೆ ಪಾತೆರೊಂದುಲ್ಲೆರ್.ಗೋಪಾಲನ್ ಜಪುಡಾಯೆರೆ ಏರ್ಲ ಬರಂದಿನ ತೂದು ತ್ಯಾಂಪಣ್ಣೆನೇ ಪಕೀರನ್ ಲೆತ್ತ್ ಕಟ್ಟೆದ ಮಿತ್ತ್ ಬತ್ತೆರ್.ಕೋಡೆ ಪಾತೆರಿ ಗೋಪಾಲೆ ಇನಿ ಮಾತೆರೆನ್ ಕಡತ್ ದೂರ ಪೋತೆ.ಉಸುಲು ಕಡಿದ್ ಕಾಲಿ ಜೂವ ಮಾತ್ರ ಉಂಡಾತೆ.ತ್ಯಾಂಪಣ್ಣಗ್ ಆಯನ ಕಣ್ಣ್‌ಗ್ ಕಣ್ಣ್ ಕೊರ್ಯೆರಾವಂದೆ ಕಣ್ಣ್ ಮುಚ್ಚೊಂದು ನೀರ ಒಸರ್ಡ್ ಬೇನೆ ಜಾರಾಯೆರ್.ಪಕೀರಡ ನೇಲುನ ಬಲ್ಲ್‌ನ್ ಕತ್ತಿಡ್ ಕಡ್ಪೆರೆ ಪಂಡೆರ್,ತಾಂಗೆರಾಯಿಜಿಂಡಲ ಗೋಪಾಲನೆಂಚಲ ತಾಂಗ್‌ದ್ ಕಟ್ಟೆಡ್ ಜೆಪುಡಾಯೆರ್.ಸುದ್ದಿ ಊರುಗೂರೆ ತೆರಿಂಡ್.ಕಲ್ಯಾಣಿಗ್ಲ ಇಸಯ ತೆರಿಲೆಕಾ‌ನೆ ತುತ್ತಿಕುಂಟುಡೇ ಪಾರೊಂದು ಕಟ್ಟೆ ಗ್ ಬತ್ತಲ್.ಕೈ ಪತ್ತಿ ಕಂಡನಿ ಕಣ್ಣೆದುರೇ ಜೂವ ಕಡಿದ್ ಜೆತ್ತುಪ್ಪುನಗ,ಐನ್ ಕಣ್ಣೆದುರೆ ತೂಯಿ ಆ ಪೊಣ್ಣ ಬುಲಿಪು ಎಂಚ ಉಪ್ಪು..?ಕಲ್ಯಾಣಿನ ಬೇನೆಬೆಸರ್ದ ಅರಬಾಯಿಲ ಅಂಚ ಇತ್ತ್ಂಡ್. ಮಾತೆರ್ಲ ಸೇರ್ದ್ ಸಮದಾನ ಮಲ್ತ್‌ಂಡಲ ಕಟ್ಟಿ ಕರ್ಯಮಣಿ ಗಿರ್ಪಿ ಬೇನೆ ಕಣ್ಣೆದುರುಪ್ಪುನಗ ಆ ಪೊಣ್ಣ ಉಡಲ್ಗ್ ಸಮದಾನ ಮಲ್ಪುನ ತಾಕತ್ತ್ ಇಜ್ಜಾಂಡ್..
ಮಾತೆಕ್ಲ ಕಾರಣ ದನಿಕುಲೇ,ಆರೆಗ್ ಗೋಪಾಲನ ಬೊಡೆದಿ ಕಲ್ಯಾಣಿಡ ಎಡ್ಡೆ ಇತ್ತ್ಂಡ್,ನನ ಈ ಕಲ್ವಬುದ್ದಿ ಗೋಪಾಲಗ್ ಗೊತ್ತಾಪುನ ಬೊರ್ಚೀಂದ್,ಆರೇ ಇಂಚ ಮಲ್ತುಪ್ಪೆರೆಲಾ ಯಾವು ಪಂಡ್ದ್ ದೂರೊಡೊರಿ ಮಾತೆರೆಗ್ ಕೇನುಲೆಕ ಗೊಬ್ಬೆ ಪಾಡ್ದ್,ಕೆಬಿಕೆಬಿ ಕಿನ್ಕ್‌ದ್, ಪಾರ್ ಪೋಯೆ.ಸಂಕಲ್ಪುದ ಸಾದಿಗ್ ಪಜ್ಜೆ ದೀದ್ ಆಯೆ ಬಲಿತೆ,ಇತ್ತೆ ಅಲ್ಪ ಇತ್ತಿನೆಟ್ ಕೆಲವೆರೆಗ್ ಅವ್ ಅಂದಾಯೆರ್ಲ ಆದುಪ್ಪು ಪನ್ಪುಲೆಕ ತೋಜಿಂಡ್.ತ್ಯಾಂಪಣ್ಣೆ ಜನ ಎಡ್ಡೆನೇ… ಆಂಡ ಈ ಇಸಯೊಡು ಏರೆನ್ಲ ನಂಬೆರ್ಲ ಆಪುಜಿ ಇಂಚ ಉಲ ಉಲಯಿಡೆ ಕೆಲವೆರ್ ಪನ್ಯೆರೆ ಪಿದಡ್ಯೆರ್.ತ್ಯಾಂಪಣ್ಣಗ್ ಸತ್ಯೊನು ನಾಡ್ಯೆರೆ ತೀರೊಂದಿಜ್ಜಿ,ಗ್ರಾಸ್ತೊಲಿಗೆಡ್ ಊರಜಾಲ್‌ಡ್ ದೀಯಿ ಪಜ್ಜೆಗ್ ಏರಾ ಒಡಕ್ ಪತ್ತಾಯೆರೆ ಪಿದಡ್ದೆರ್,ಪನ್ಪಿ ಸತ್ಯ ಆರೆಗ್ ತೆರಿಂಡ್.ಗೋಪಾಲೆ ಸೈತಿನತ್ತ್,ಏರಾ ಎನನ್ ಜೂವಪ್ಪ ಕೆರ್ಯೆರೆ ಬೋಡಾದ್ ಗೋಪಾಲನ್ ದರ್ಮೊಗು ಬಲಿಕೊರ್ಯೆರ್ ಪನ್ಪಿ ಬೇನೆದ ಅರ್ಕಟ್ ಅರೆನುಲಯಿ ಅರೆನ್ ಮೆದ್ಕಾಯೆರಾವಂದಿಲೆಕ ಕಟ್ಟ್ ಪಾಡ್ಂಡ್.ಸಂಕಲ್ಪುದ ಸಾದಿದೊಂಕಿ ಕೆಲವೆರ್ ಮಲ್ತಿ ಉಪಕಾರೊನೆ ಮದತ್‌ದ್ ತ್ಯಾಂಪಣ್ಣನ್ ಒಂಜಿ ನಮೂನೆಡ್ ತೂಯೆರೆ ಸುರುಪತ್ಯೆರ್,ಆತ್ ಪೊರ್ತುಗೇ ಆಮೈರ್ದ್ ಪೋಲಿಸ್‌ ದಾರ್ನ ಗಾಡಿ ಬತ್ತ್‌ದ್ ಗೋಲಿದ ಮರತ ನಿರೇಲ್ಡ್ ಉಂತುಂಡು.ಜೀಪುದ ಒಂಜಿ ಮೈಟ್ ಪೋಲಿಸ್‌ದಾರ್ ಜತ್ತೆರ್ಂಡ ಕುಡೊಂಜಿ ಮೈಟ್ ಜತ್ತಿನಾರೆನ್ ತೂದು ತ್ಯಾಂಪಣ್ಣನ ಅಕಲೇ ಪಾರ್ಂಡ್,ಜತ್ತಿನಾರ್ ತ್ಯಾಂಪಣ್ಣಗೇ ಬಿರೆಲ್ ತೋಜಾನಗ ಊರುಗೂರೇ ಪಾತೆರೊನೇ ದಾಂತೆ ಸೂತಿಗದಿಲ್ಲದಲ್ಕಾಂಡ್..ಏರೆಗ್ಲ ನೇನ್ ನಂಬೆರೆನೇ ಆವೋಂದಿಜ್ಜಿ..
