ಕಟ್ಟ(4)
ಚೇತನ್ ವರ್ಕಾಡಿ
ಇತ್ತೆ ತ್ಯಾಂಪಣ್ಣಗ್ ಅಂದಜಾಂಡ್ ಗೋಪಾಲೆ ನೇಲ್ಯೆರೆ ಕಾರಣ ಏರೂಂದ್.ಪೋಲಿಸ್‌ದಾರೆನ್ ಲೆತೊಂದು ಬತ್ತಿ ಬಿರ್ಸಾದಿಗೆದ ನರಮಾನಿ ಬೇತೆ ಏರ್ಲ ಅತ್ತ್,ಒಂಜಿ ಪೊರ್ತುಡು ಅವ್ವೇ ಪಂಚಾತಿಗೆದ ಕಟ್ಟೆಡ್ ಉಂದುವೇ ತ್ಯಾಂಪಣ್ಣನ ಕೈಟ್ ಮಲ್ತಿ ಪಾಪೊಗು ಆರ್ ಕೊರ್ತಿ ತೀರ್ಪುನು ಪತೊಂದು ಪೋಯಿನ ಮೀಸೆ ಮಾದವೆ.ಮಾದವೆ ಪಂಡ ಜನ ಎಲ್ಯ ಅತ್ತ್ ಆಂಡ ತ್ಯಾಂಪಣ್ಣನ ಎದುರ್ಡುಂತು ತಾಂಟ್ಯೆರೆ ಆಯಗ್ ಆ ಊರುದ ಜನೊಕುಲೆನ ಬೆರಿಬಲ ಇಜ್ಜಾಂದೆ ಸೋತುದಿತ್ತೆ.ತನ್ನ ಪಗೆತ ಪುಗೆನ್ ಒಂಜತ್ತ್ ಒಂಜಿ ದಿನ ತೂಪೇಂದ್ ದಿನ ಲೆಕ್ಕ ಮಲ್ತೊಂದಿತ್ತಿ, ಮಾದವೆ ಸುರು ಈಡ್ ದೀನೆ ಗೋಪಾಲಗ್.ಐಕ್‌ಲ ಒಂಜಿ ಕಾರಣ ಉಂಡು,ಕಲ್ಯಾಣಿನ ಮಿತ್ತ್ ಆಯನ ಕಲ್ವಕಣ್ಣ್ ಬೂರ್ದಾತ್ಂಡ್.ಒಂಜಿ ಕಲ್ಲ್‌ಡ್ ರಡ್ಡ್ ಕಾಯಿ ತಾಲುಂಡತ ಪನ್ಪಿ ಮಾದವನ ಕೊಸಿಕ್ ಅವ್ ಗೆಲ್ಮೆದ ಕಲ ಆಯಿಲೆಕ ಆಯಗ್ ತೋಜೊಂತುಂಡು.ಆಂಡ ಸತ್ಯಾದಿಗನ ಬದ್ಕ್‌ಡ್ ಮಾಜವಂದಿ ಕಲೆನ್ ಪತ್ತಾಯೆರೆ ಪಿದಡ್ದೆ ಪನ್ಪಿ ಸತ್ಯ ಆಯಗ್ ತೆರಿಯಂದೆ ಪೋಂಡು.ಕಲ್ಯಾಣಿನ ಕನನೀರ್ ಆಯಗ್ ತೋಜಿಜಿ,ಕಲ್ವಕಣ್ಣ್‌ಡ್ ಅಲೆ ಪೊರ್ಲುಗು ಬಾಯಿನೀರ್ಯೆ.ಮಾತ ಪಾತೆರ್ಲೆಕಾನೆ ಗಾಡಿಜತ್ತ್ ಮಿತ್ತ್ ಬತ್ತಿನ ಪೋಲಿಸ್‌ದಾರ್ ನಡತಿ ಇಸಯೊನು ಕೇನ್ನಗ ,ಏರಾ ಪಂಡಿನೆನ್ ಕೇಂದ್ ಮಾತೆರ್ಲ ತ್ಯಾಂಪಣ್ಣನ‌ಡೆಗೇ ಸಂಕಲ್ಪುಡು ತೂಯೆರೆ ಪತ್ಯೆರ್,ನೇನೇ ಕಾತೊಂದಿತ್ತಿ ಮಾದವೆ ಪಾತೆರೊಗೊಂತೆ ನೆಸಲ್ ಪಾಡ್ದ್ ತ್ಯಾಂಪಣ್ಣೆನೇ ಕೆರ್ಲೆಕ ಸುದ್ದಿ ಪಟ್ಯೆ.ಒಂಜಿ ಕಡೆಟ್ ಮಲ್ಪಂದಿ ತಪ್ಪುಗಾದ್ ಗೋಪಾಲೆ ಇಂಚಾಯೆ ಪಿರೊಂಚಿ ಮೈಟ್ ಏರಾ ಮಲ್ತಿನ ಬೇಲೆನ್ ತನ್ನ ತರೆಕ್ ಕಟ್ಟ್ ಕೊರ್ಪಿ ಮಾದವನ ಉಲಗೊಬ್ಬು ತೂದು ಪಿಸ್ರ್ ನೆತ್ತಿಗೇರ್ನ ತ್ಯಾಂಪಣ್ಣೆ ,ಪಲಯಿದಂಚಿನ ಕೈಟ್ ಮಾದವನ ಕೆಬಿತಂಡೆಗ್ ದರ್ತೆರ್.ಸತ್ಯಾದಿಗನ ಬಲೊತ ಪೆಟ್ಟ್‌ಡ್ ಒರ ಮಾದವಗ್ ಮೂಜಿ ಲೋಕ ತೋಜಿಲೆಕಾಂಡ್,ದುಂಬೇ ಬೋಡುಬೋಡಾಪಿನ ಬೇಲೆ ಮಲ್ತೊಂದೇ ಬೈದಿನಾಯೆ ಪೆಟ್ಟ್ ತಿಂದ್‌ದ್ಲ,ತನ್ನ ಬತ್ತಿ ಬೇಲೆನ್ ಮುಗಿತೆ.ಕಲ್ಯಾಣಿಗ್ಲ ತ್ಯಾಂಪಣ್ಣೆ ಇಂಚ ಮಲ್ಪಯೆರ್ ಪನ್ಪಿ ಸತ್ಯ ಗೊತ್ತುಂಡು,ಆಂಡ ಆಲ್ ಏತ್ ಪಂಡಲಾ ಆಲೆನೇ ಸಂಕಲ್ಪುದ ಜಾಗೆಡ್ ತೂಯೆರೆ ಸುರುಪತ್ಯೆರ್.ಕರ್ಪಿಲ್ಲ್‌ದ ಮುಟ್ಟುಮಿತರಂದಿ ತ್ಯಾಂಪಣ್ಣೆ ಮಲ್ಪಂದಿ ತಪ್ಪುಗಾದ್,ಏರಾ ಗೊಬ್ಬಿ ನಾಟಕೊಗು ಸೂತ್ರೊದ ಗೊಂಬೆ ಆಯೆರ್.ಗೋಪಾಲೆ ದೇವೆರ್ಲೆಕ ಪೂಜೆ ಮಲ್ತೊಂದಿತ್ತಿ ದನಿ ಇನಿ ಆಯನೆರ್ದಾದೆ ಕರ್ಪಿಲ್ಲ್‌ ಸೇರ್ವೆರ್ ಪನ್ಪಿ ಸತ್ಯೊನು ಪಲಯಡ್ಡ ಜೆತೋಂದು ಮನಿಮಂಬುದಾಂತೆ ಕಣ್ಣೆದುರು ತೂವೊಂದುಲ್ಲೆ.ಪಾರ್ವತಿಯಕ್ಕ‌ನ ಪೊರ್ಲುದ ಸಂಸಾರೊಡು ಇನಿಮುಟ್ಟ ಕಂಡನಿ ಬೊಡೆದಿ ದೂರ ದೂರ ಆದ್ ಕುಲ್ಲುದಿನಾರ್ ಆರತ್ತ್,ತ್ಯಾಂಪಣ್ಣನ ಸತ್ಯಾದಿಗೆನೆ ಇನಿಕಾನಗ ಅರೆಗ್ ಮುಲ್ಲಾಂಡ ದಾನ್ನ,ಪೊಣ್ಣ ಮರ್ಲ್‌ದ ಸಂಕಲ್ಪುದ ಪಟ್ಟೊಡು ಮಾದವನ ಉಲಗೊಬ್ಬು ಆರೆನ್ ಕುಲ್ಲಾವುಲೆಕ ಮಲ್ತ್ಂಡ್.ತರೆದೆರ್ತ್ ಪೋವೊಂತಿ ತ್ಯಾಂಪಣ್ಣನ್ ತರೆಕಂತ ಪಾಡುಲೆಕ ಮಲ್ತೆರ್,ಅಜ್ಜೆರ್ನ ಇಲ್ಲಗ್ ಬತ್ತಿ ಪುಲ್ಯಲ್ಲೆಗ್ ಈ ಗೊಬ್ಬುದ ಅಂತುಗೊಂತೇ ತೆರಿಜಿ.ದೊಡ್ಡಡ ಪ್ರಸ್ನೆ ಪಾಡೊಂದು ಕನನೀರ್ ಅರಿಪಾಯೆರ್.ಪಾರ್ವತಿಯಕ್ಕ ನ್,ಕಲ್ಯಾಣಿ‌ನ್ ಮಾತ ಸೇರ್ದ್ ಅಕ್ಲಕ್ಲೆ ಇಲ್ಲ್ ಸೇರಾಯೆರ್ಂಡ,ಗೋಪಾಲನ ಪುನ ಆಸೊತ್ರೆಗ್ ಪೋಂಡು,ತ್ಯಾಂಪಣ್ಣೆ ಕರ್ಪಿಲ್ಲ್‌ದ ಅದೆ ಸೇರ್ಯೆರ್..
ಜನಬಿರಿಂಡ್ ಏತೋ ದಿನೊರ್ದ್ ಬೊಕ್ಕ ಮಾದವೆ ಮೀಸೆ ಪೂಜಿದ್ ಬಾಯಿಅಂಗಾದ್ ತೆಲಿತೆ.ತನ್ನ ದೋಸ್ತಿಲೆನ್ ಪತ್ತ್‌ದ್ ಗೋಪಾಲನ್ ಪರ್ಪಾದ್ ಮಂಗೆಮಲ್ತ್ ಬೋಂಟೆದ ಅಡ್ಡಿಡ್ ಆಯನ್ ಗುಡ್ಡೆದ ಜೇರೊಗು ಲೆತ್ತ್‌ದ್,ತ್ಯಾಂಪಣ್ಣಗ್ ಈ ಇಸ ಪಾಡ್ದ್ ಕೊರೊಡು ಇಜಿಂಡ ನಿನ್ನ ಬೊಡೆದಿನ್ ಕಡ್ತ್ ಕೆರ್ಪಾಂದ್ ದೌಲತ್ತ್ ತೋಜಾಯೆರ್.ಉನ್ಪು ಪಾಡಿ ದನಿಕ್ ರಡ್ಡ್ ಬಗೆವಯೆ ಪಂಡ್ದ್ ಅಕ್ಲ್ ಎಂಚಿನ ಮಲ್ತ್ಂಡಲ ಬೇನೆನ್ ತಿಂದ್‌ದ್ ಒತ್ತೊಂಜೇಂದ್ ಪಂಡ್ದಾನಗ,ಆಯನೇ ಈ ಲೋಕೊರ್ದು ಕಡಪುಡ್ದು ತ್ಯಾಂಪಣ್ಣನ್ ಜೂವ ಇತ್ತ್‌ದ್ಲ ಸೈಪಿಲೆಕ ಮಲ್ತೆರ್.ಆಂಡ ಈ ಗೊಬ್ಬು ಪಸುತಂಚಿನ ಆ ಊರುದ ಜನೊಕುಲೆಗ್ ಅಂದಜಾವಂದೆ ಪೋಂಡು.
ಈ ಇಸಯ ಊರುಗೂರೆ ಪಟ್ಟ್ಂಡ್ ,ತ್ಯಾಂಪಣ್ಣನ ಮೂಜಿ ಜೋಕುಲು,ಅರ್ವತ್ತಲ್ಲುಲ ಅರೆ ಇಲ್ಲಗ್ ಬತ್ತ್‌ದೆತ್ಯೆರ್.ನಂದನಬಿತ್ತಿಲ್ ಆದಿತ್ತಿ ಇಲ್ಲಡ್ ಮಸನೊದ ಗಾಲಿ ಬೀಜಿಲೆಕಾತ್ಂಡ್,ಪಾರ್ವತಿಯಕ್ಕ ಮೂಜಿ ಜೋಕುಲೆನ ಕೈ ಕೈ ಪತೋಂದು ಕೇನ್ವೆರ್,ಜೋಕುಲೇ…. ಎನ್ನ ಒಂಜಿ ಕಡೇತ ಆಸೆ ನೇನ್ ನಡಪಾವರ…? ಆತ್ ಪನ್ನಗ ಮೂಜೆತ ಮೋನೆಡ್ಲ ದಿರಿದಿರೀಂದ್ ಕನನೀರ್ ಜಾರ್ಂಡ್..
