ಕಟ್ಟ(2)
ಚೇತನ್ ವರ್ಕಾಡಿ
ಸೇಂಕೊಂದು ಬತ್ತಿನಾಲ್ ಉಸುಲು ದೆಪ್ಪೆರೆ ತೀರಂದೆ ಅರ್ದೊಗರ್ದ ಪಾತೆರೊನು ನಿಂಗೊಂದು ಪನ್ನಗ,ತ್ಯಾಂಪಣ್ಣಗ್ಲ ,ಪಾರ್ವತಿಯಕ್ಕಗ್ಲ ಅಂದಜಾಯಿಜಿ.ಉಂದ ಮಾರಾಯ್ದಿ ಪನಿ ಕುಲ್ಲುದು ಸುದರ್ತೊನು,ಬೊಕ್ಕ ಇಸಯೊಗು ಬಲ ಪಂಡಿನ ಪಾರ್ವತಿಯಕ್ಕ, ಉಲಯಿರ್ದ್ ಅಲೆಗೊಂಜಿ ಚೆಂಬು ನೀರ್ ಕೊರ್ದು ಸುರೂ ಅಸರ್ ತಗ್ಗಯೆರೆ ಪಂಡೆರ್.ಕಲ್ಯಾಣಿನ ಮೋನೆಡ್ ದಾದನಾ ಕಲೆವೊಂದಿನ ಬೇನೆ ಕಲೆಪತ್ತ್‌ದ್ ತೋಜೊಂತುಂಡು.ಕನನೀರ್ ಪಾತೆರೊನು ಕಟ್ಟ್ ಪಾಡೊಂದುಂಡು.ಎಂಚಿನಯ ಕಲ್ಯಾಣಿ ದಾಯೆ ಪಾರ್‌ಬತ್ತ,ಗೋಪಾಲೆ ಇಜ್ಜೆನ…?ಈತ್ ಕೇನೊಡಾಂಡ ಆಲ್ ಕಟ್ಟ್ ಪಾಡ್‌ದಿತ್ತಿ ಕನನೀರ್ ಬೊಲ್ಲದಲ್ಕ ಅರಿಯೆರೆ ಸುರುವಾಂಡ್.ಸಮದಾನ ಮಲ್ತೊನು ಮಾರಾಯ್ದಿ ಇಸಯ ಎಂಚಿನ ಪನ್,ಎಂಕ್ಲೆಗ್ ಪಂಡತ ತೆರಿಯುನೆ ಪನ್ನಗ ಕಲ್ಯಾಣಿ ತ್ಯಾಂಪಣ್ಣನ ಮೋನೆ ತೂವೊಂದು ಇಸಯ ಬುಡ್ಪಾಯಲ್.ದನಿಕುಲೆ ಏಪಲ ಒಂಜಿ ಬೊಟ್ಟುಲ ಪರೊಂದು ಬರಂದಿನ ಮೇರ್ ಕೋಡೆ ದಾಯೆ ಪರ್ದ್ ಬೈದೆರಾ ಗೊತ್ತಿಜ್ಜಿ,ಪರ್ಯೆರಾ ಮಲ್ಲೆತ್ತ್ ,ಎನ್ನ ಪಾತೆರಲ ಕೇನಂದೆ ಏರಾ ಲೆತ್ತೆರ್ ಪಂಡ್ದ್ ಬೋಂಟೆಗ್ ಪೋತೆರ್,ಆರ್ ಏರ್ನೊಟ್ಟು ಪೋತೆರಾ ಎಂಚಿನ ಕತೇಂದ್ ಅವ್ಲ ಪಂಡಿಜೆರ್ ದನಿ,ಇರ್ಲ್ ಇಡೀ ಇತ್ತೆ ಬರ್ಪೆರ್ ಇತ್ತೆ ಬರ್ಪೆರೂಂದ್ ಕಣ್ಣ್‌ಗ್ ಎಣ್ಣೆ ಬುಡ್ದು ಕುಲ್ಯೆ,ಆರ್ ಬರ್ಪುನನೇ ತೋಜ್ಜಿ,ನನ ಪುಲ್ಯ ಆನಗ,ಏಪಲ ಇಡೆ ಬರ್ಪಿನಾರ್ ಮೂಲಾಂಡಲ ಉಲ್ಲೆರಾಂದ್ ಪಾರೊಂದು ಬತ್ತೇಂದ್ ಪನ್ನಗ ತ್ಯಾಂಪಣ್ಣಗ್ ಬೊಕ್ಕ ಪಾರ್ವತಿಯಕ್ಕಗ್ಲ,ಅಕಲ್ ಒರ ಪಾರಿಲೆಕಾದ್ ಪೋಡಿಗೆ ಸುರುವಾಂಡ್. ಅತ್ತ್ ಅಂತುಗೊಂತು ಗೊತ್ತಿಜ್ಜಾಂದಿನಕ್ಲೆನೊಟ್ಟು ಈ ಗೋಪಾಲಗ್ ಬೋಂಟೆಗ್ ಪೋಪುನ ಬೇಲೆ ದಾಯೆಯ ಪಾರ್ವತಿ…? ಮುಲ್ಪ ದಾನೆ ಕಾಡ್‌ಡ್ ಎಲ್ಯ ಮುರ್ಗೊಲು ಉಪ್ಪುನ್ನ…? ದುಂಬೇ ಪೊರ್ತು ತತ್ತಿ ಬೊಕ್ಕ ಸಾದಿಜಪ್ಪೆರೆನೆ ಪೋಡಿಗೆ ಆಪುಂಡು,ಈ ಗೋಪಾಲೆ ದಾಯೆ ಒಂಜೊಂಜಿ ಒಯ್ತ್ ಪಾಡ್ವೆನಾ…? ಈತ್ ಪನ್ನಗ ಕಲ್ಯಾಣಿನ ಉಸುಲು ಬಿರ್ಸ್‌ಡ್ ಎಡ್ಪೆರೆ ಸುರುವಾಂಡ್.ಅಜ್ಜೆರೆ ಕಾಡ್‌‌ಗ್ ಪೋಂಡ ಮುರ್ಗೊಲು ನರಮಾನ್ಯನ್ ತಿನ್ಪುಜೆ ಅಜ್ಜೆರೆ…? ಕೇನಂದಿ ಪೊರ್ತು ಜೋಕ್ಲು ಗೊತ್ತುದಾಂತಿ ಪ್ರಸ್ನೆ ಕೇನ್ನಗ,ಜವಾಬು ಕೊರ್ಯೆರಾವಂದಿ ತ್ಯಾಂಪಣ್ಣೆ,ಪುಲ್ಯಲ್ಲೆನ್ ರಡ್ಡ್ ನೆರ್ದ್ ಉಲಯಿ ಕಡಪುಡ್ಯೆರ್..
ಈ ಮಂಡೆಬೆಚ್ಚ ಮಲ್ಪೊಚಿ ಕಲ್ಯಾಣಿ ಗೋಪಾಲೆ ಬರ್ವೆ,ಓಲ್ಲ ಪರ್ನ ಎಚ್ಚಿಗೆ ಆದ್ ಸಾದಿಡ್ ಬೂರ್ದೆನಾ ದಾನ್ನ ಯಾನ್ ಪಕೀರನ್ ಪಂಡ್ದ್ ಒರ ನಾಡ್ಯೆರೆ ಪನ್ಪೆ ಪಂಡ್ದ್ ಕಲ್ಯಾಣಿ‌ನ್ ಸಮದಾನ ಮಲ್ತ್ ಇಲ್ಲಗ್ ಕಡಪುಡ್ಯೆರ್.ಕಲ್ಯಾಣಿ ಅರೆ ಜಾಲ್ ಕಡಪೊಡಾಂಡ ಪಿರವುಜಾಲ್‌ರ್ದ್ ಪಕೀರ ಪಾರೊಂದು ಬರೊಂದುಲ್ಲೆ.ಎಂಚಿನಯ ಪಕೀರ ದಾಯೆ ಪಾರೊಂದು ಬತ್ತ,ಇಂಚಿರ್ದ್ ಒರ್ತಿನ್ ಸಮದಾನ ಮಲ್ತ್ ಕಡಪುಡ್ನೆ ಆತೆ,ಕಾಂಡೆ ಕಾಂಡೆನೆ ನಿನ್ನ ಎಂಚಿನಯಾ….?ಪಂಡ್ದ್ ಕೇನ್ನೆಕ್ ಪಾತೆರೊಡು ಜವಾಬ್ ಕೊರ್ಯೆರೆ ತೀರಂದಿ ಪಕೀರೆ,ದನಿನ ಕೈನ್ ಪತೋಂದು ಪಿರವು ಸಾದಿಡೆ ಪೋಯೆ..ತೋಟ ಕಡತ್‌ದ್ ಕಾಡ್‌ಗೊತ್ತುನ ಗೋಲಿದ ಮರತಡೆ ಲೆತೊಂದು ಪೋದು ಪಕಿರೆ ಕೈ ತೋಜಾವೆನೇ,ತ್ಯಾಂಪಣ್ಣೆ ಮರನ್ ತೂಪೆರ್ ಗೋಪಾಲನ ಪುನ ಗೋಲಿದ ಮರಟ್ ಅಕ್ಕ್‌ಡ್ ಪಾಡ್ಲೆಕ ನೇಲೊಂದುಂಡು.ಉನ್ಪು ಪಾಡಿ ಕೈ,ಎಡ್ಡೆತನೊನೆ ತೂಯಿ ಗೋಪಾಲನ್ ಈ ಗಲಿಗೆ ತ್ಯಾಂಪಣ್ಣೆ ಗೋಪಾಲನ ಆ ಪೊರ್ಲುನು ಎಂಚ ತೂಪುನೇ….?ನಾಲಯಿ ಪಿದಯಿ ಪಾಡ್ದ್ ಅಕಲ್ ಪಾರುಲೆಕ ಆರೆ ಒರ ಕಲ್ಕ್‌ಯೆರ್.ಗೋಪಾಲೆ ಎಂಚಿನವಾ ಸತ್ಯ ಪನ್ಪಿಲೆಕ ಆ ಪುನ ತ್ಯಾಂಪಣ್ಣಡ ಎಂಚಿನವಾ ಸತ್ಯೊನು ಬಾಯಿ ಬುಡ್ಪಿಲೆಕ ಮಸೆವೊಂದುಂಡು..
ದುಂಬರಿಯುಂಡು
