ತುಳು ಕಥೆ
ಚೇತನ್ ವರ್ಕಾಡಿ
ಅಂಗಿದ ಕುಡೊಂಜಿ ತುಂಡು ಅಲ್ಪನೇ ಬೂರ್ನ ತೋಜಿಂಡ್.ನಾಡೊಂದು ಬರ್ಪೇಂದ್ ಪಿದಡ್ನ ರಗುಗು ನನ ನಾಡ್ದ್ ಪ್ರೇಜನ ಇಜ್ಜಿ ಪನ್ಪಿ ಸತ್ಯ ತೋಜೊಂದೇ ಪೋಂಡು.ಗೇನೊಡು ಕೊಡಿತಿ ಸಾರ ಅಲಚನೆಗ್ ಉತ್ತರೊಲು ತೋಜೊಂದೇ ಪೋಂಡು.ಕಾಡ ಉಲಯಿಗ್ ಪೋಯಿ ಸಂಪತ್ನ್ ಕಾಡ್ಮುರ್ಗೊಲು ಬುಡ್ಯೆರುಂಡ..?ಅವ್ವತ್ತಂದೆ ಅವ್ ನಿಜಾಂದೆ ಪನ್ಪಿಲೆಕ ನಂಬೆರೆ ಆಯೆ ಮೈಕ್ ಪಾಡಿ ಅಂಗಿಯೆ ಸಾಕ್ಷಿಗುಂಡು.ನೆರ್ದ್ ಮಿತ್ತ್ ಎಂಚಿನ ಬೋಡು ಪನ್ಪಿಲೆಕ ಆ ಸಾದಿ ತೋಜೊಂತುಂಡು.ಮುರ್ಗೊಲೆ ಬಾಯಿಗ್ ತಿಕ್ಂಡ ಗುರ್ತೊಗ್ಲ ಸಂಪತ್ನ ಒಂಜೇ ತುಂಡು ತಿಕ್ಕಂದ್,ಪನ್ಪಿನ ಬೇನೆ ಆಯನ ಉಡಲ್ಡ್ ದಿಂಜಿಂಡ್.ದಾಲ ತೆರಿಯಂದ್ ಆನ್ ಬಾಲೆಗ್ ದಾಯೆಗಿಂಚಾಂಡ..?ರಗುನ ಮನಸ್ ಕರಾದ್ ಪೋತುಂಡು.ಸುಮತಿನ್ ತೂದು ಗುರ್ತಾರ್ತ ಆದ್ ಒಂಜಿ ದಿನ ಆಂಡಲ, ಆಯಗ್ ತಂಗಡಿ ಪನ್ಪಿ ಮೋಕೆ ಎರ್ಕ್ದ್ ಪೋತುಂಡು.ಬಾಲೆದಾಂತೆ ಅಲೆನ ಬದ್ಕ್ ಎಂಚಾ..?ಸಂಪತ್ ನನ ನಂಕ್ ತಿಕ್ಕುಜೆ ಪನ್ಪಿ ಇಸಯ ಆಲೆ ಕೆಬಿಕ್ ಬೂರ್ಂಡ ಆ ಅಪ್ಪೆ ಮನಸ್ ತಾಂಗುದುಂತೆರುಂಡ..? ಇಂಚ ರಗುನ ಅಲಚನೆ ಓಡೋಡೆಗಾ ಪೋಯೆರೆ ಸುರುವಾಂಡ್.ಬತ್ತಿನೆಕ್ ಒಂತೆ ದುಂಬು ಪೋಯೀಂದ್ ಕಾಡ್ ಸುತ್ಯೆ ,ಆಯೆ ದುಂಬು ಪೋಯಿಲೆಕಾನೆ ನೆತ್ತೆರ್ ಜತ್ತಿನ ಬೊಟ್ಟ ಆಯನೆದುರು ಗುರ್ತೊನು ಎಚ್ಚಿಗೆ ಮಲ್ತ್ಂಡ್.ಅವ್ ಉದೋಗು ಅರಿಯೊಂದು ಪೋತುಂಡು.ದಾದ ಆಯೆರೆ ಬಲ್ಲೀಂದ್ ಎನ್ನಿದೆನಾ ಅವ್ ಆತ್ನೆ ನಿಗಂಟ್ ಪನ್ಪಿಲೆಕ ಮಾತಲ ಕಣ್ಣೆದುರೇ ತೋಜೊಂದುಂಡು.ನೆತ್ತೆರ್ ಅರಿಯುನ ತೋಜಿನೆಟ್ ಉಂದು ಎಚ್ಚಿಗೆ ದೂರ ಉಪ್ಪಂದೂಂದ್ ಎನ್ನಿನಾಯೆ ಅವ್ವೇ ಗುರ್ತೊನು ನಾಡೊಂದು ದುಂಬು ದುಂಬು ಪೋನಗ ಇಲ್ಲ ಜಾಲ್ಗ್ ಬತ್ತ್ ಉರ್ಡುನ ಅವ್ವೇ ನಾಯಿಲು ಪನೀತ್ ದೂರೊಡು ಆಯಗ್ ಆಂಜಿಯ,ಎಂಚಿನೆನಾ ಒಯ್ತ್ ತಿನ್ಪಿಲೆಕ ತಿನೊಂದುಲ್ಲ.ರಗುನ ತಿಗಲೆ ಜೋರುಡು ಎಡ್ಪೆರೆ ಸುರುವಾಂಡ್,ರಡ್ಡ್ ನಾಯಿಲ ಎಂಚಿನೆತನಾ ಮಾಸೊನು ಒಯ್ತೊಂದುಲ್ಲ,ರಗು ಕೈತಡೆ ಕೈತಡೆ ಪೋವೊಂದುಲ್ಲೆ,ನಾಯಿ ದೂರೊರ್ದೇ ಆಯಗ್ ಬೌರೊಂದುಂಡು,ಕೈತಡೆ ಬರ್ಯೆರೆ ಬುಡೊಂದಿಜ್ಜಿ.ನನದಾನೆ ನಾಯಿನ್ ಗಿಡಪುಗಾಂದ್ ಪನ್ನಗ ಅಲ್ಪ ತೂಯಿನ ಸತ್ಯೊನು ಕಣ್ಣೆದುರು ತೂಯಿನಾಯಗ್,ಒರೊಗು ಅಕಲೇ ಪಾರ್ಂಡ್…
