ಅರ್ಕಟ್(ಗಿರಿಪೆರಾವಂದಿನ)
ಕಟ್ಟ(8)
✒️ಚೇತನ್. ವರ್ಕಾಡಿ..
ಇಡೀ ಗೋಲಿದ ಮರ ಪಂದೊಂದು ಉಂಡು.ಒಂಜಿ ತುಂಡು ಗೆಲ್ಲ್ ಐತಾತಿಗೆ ತುಂಡಾದ್ ಆಯಗ್ ಒರೆಸ್ಸ ಬೂರ್ಂಡ್.ಮೀಸೆ ಮಾದವಗ್ ವೊರ ಮಾತಲ ಎನ್ನಿದ್ ಪೋಂಡು,ಕಣ್ಣ್ ಕತ್ತಲೆನೇ ಆಂಡ್.ಉಂದು ಮಾತ ಗೋಪಾಲನ ಉಪದ್ರನ ದಾನ್ನ,ಪಂಡ್ದ್ ರಪಕ್ಕ ಕಲ್ಯಾಣಿನ ಕೈ ಬುಡ್ಯೆ,ಆಯೆ ಬುಡ್ಲೆಕಾನೆ ಕಲ್ಯಾಣಿ ರುಂಬುದು ಬಲ್ತ್ ತಪ್ಪಾವೊಂಡಲ್.ಮಾದವೆ ಬೆಗರ್ದ್ ಬೊದುಲ್ಯೆ,ಆಯಗ್ ತೆರಿಯಂದೆನೆ ಬದಲಾಯೆರೆ ಸುರು ಆಯೆ.ಕಟ್ಟೆದ ಸುತ್ತ ಆಯಗ್ ತೆರಿಯಂದೆನೇ ಸುತ್ತು ಬರ್ಯೆರೆ ಸುರು ಮಲ್ತೆ,ಮಂಡೆಗಿರ್ಮಿಟಾಯಿಲೆಕ ತೆಲಿಪೆರೆ ಪತ್ಯೆ,ನಲಿಪೆರುಂತ್ಯೆ,ಅಂಗಿ ಕುಂಟುನು ಪರ್ತೊಂಡೆ.ಗೋಲಿದ ಮರತಡಿಟ್ ಜೆತೋಂಡೆ.ಪೊಣ್ಣ ಸಾಪನ,ತ್ಯಾಂಪಣ್ಣನ ಕನನೀರ್ ಕಂತ್ಂಡ,ಗೋಪಾಲನ್ ಕೆರ್ತಿ ಪಾಪನಾ ದಾನ್ನ ಪೊಣ್ಣ ಮಾನೊಗು ಕೈಪಾಡಿ ಮಾದವೆ ಗಲಿಗೆದುಲಯಿ ಮರ್ಲೆ ಆದ್ ಬದಲಾವೊಂದೇ ಪೋಯೆ.ತನ್ನ ಗೇನೊದ ನೆಂಪುನೇ ಮದತ್‌ದ್ ಅಂಗಿಕುಂಟು ಪರ್ತೊಂದು ಊರಿಡೀಕ ಸುತ್ಯೆ,ಗೋಪಾಲನ್ ಯಾನ್ ಕೆರ್ನೆ ಗೋಪಾಲನ್ ಯಾನ್ ಕೆರ್ನೇಂದ್ ಆಯಗ್ ಗೇನ ಇಜ್ಜಾಂದೆ ಆಯನಾತಿಗೆ ಪಂಡೊಂದು ಪೋಯೆ,ಇತ್ತೆ ಊರಜನೊಕುಲೆಗ್ ಸತ್ಯ ಸಂಗತಿ ತೆರಿಯೆರೆ ಸುರುವಾಂಡ್. ದರ್ಮರಾಯಲೆಕಂತಿನ ತ್ಯಾಂಪಣ್ಣೆ ಮಾದವನ ಅಪವಾದೊದಡಿಕ್ ಬೂರ್ದ್ ಕರ್ಪಿಲ್ಲ್‌ ಸೇರೊಂಡೆರ್ ಪನ್ಪಿ ಸಂಗತಿ ಗೊತ್ತಾಯಿಲೆಕಾನೆ ,ದನಿನ್ ಎಂಚಾಂಡಲ ಬುಡ್ಪಾವೊಡು ಪಂಡ್ದ್ ಊರೆ ವೊಟ್ಟು ಸೇರ್ಂಡ್.ಮಾದವಗ್ ಮರ್ಲ್ ಸುರು ಆಯಿಬೊಕ್ಕ ಉಂದು ಪೂರ ಆಯನ ಕತೆನೇಂದ್ ಪೋಲಿಸ್‌ದಕ್ಲೆಗ್ಲ ತೆರಿಂಡ್.ಆಂಡ ಈತ್ ಮಾತ ಮಲ್ತ್‌ನೆ ಆಯೆನೇ ಆಂಡಲ ಆಯನ್ ಗೊಬ್ಬಾವೊಂದು ಇತ್ತಿ ಮಲ್ಲ ಕೈ ವೊಂಜಿ ಇರ್ಲ್‌ರ್ದ್ ಬೊಲ್ಪುಗು ಬತ್ತ್‌‌ನೇ ಇಜ್ಜಿ.ನನ ಬರ್ಯೆರೆಲ ಇಜ್ಜಿ,ದಾಯೆ ಪಂಡ ಅವ್ ಗೊತ್ತುಪ್ಪುನೆ ಮಾದವಗ್ ಮಾತ್ರ, ಮಾದವಗ್ ಮರ್ಲ್ ಪತ್ತ್‌ದಾತ್ಂಡ್,ಆಯೆ ಸರಿಯಾಪಿಲೆಕ ತೋಜುಜಿ..
ದಿನೊಕುಲು ಕರಿಂಡ್ ತ್ಯಾಂಪಣ್ಣಗ್ ಕಡೇಕ್ಲ ಗೇಲಾಂಡ್.ಕರ್ಪಿಲ್ಲ್‌ದ ಅದೆರ್ದ್ ಸೀದ ಪಿದಯಿ ಬತ್ತಿನಾರೆನ್ ಎದ್ಕೊನಿಯೆರೆ ಊರುಗೂರೇ ಸೇರ್ದಿತ್ತ್ಂಡ್.ತರೆಕಂತ ಪಾಡ್ದ್ ಪೋದಿತ್ತಿನ ತ್ಯಾಂಪಣ್ಣೆ ಅಪವಾದೊದ ಕಲೆ ಮಾಜಿದ್ ಪಿದಯಿ ಬತ್ತೆರ್.ಬತ್ತಿನಾರ್ ಸೀದ ಗೋಲಿದ ಕಟ್ಟೆದಂಚಿ ಪೋದು ಒಂತೆ ಪೊರ್ತು ಕುಲೋಂಡೆರ್.ಗೋಪಾಲೆ ನನಲ ಆರ್ನ ಮನಸ್‌ರ್ದ್ ಪೋತುಜೆ.ಗೋಲಿದ ಮರತ ಗೆಲ್ಲ್ ಗೆಲ್ಲ್‌ಡ್ ಆಯೆನ ಪಾತೆರುನ ಸೊರ ಕೇನುಂಡರೆಗ್.ತಡೆಯೆರಾವಂದೆ ಅಲ್ತ್ ಸೀದ ತನ್ನಿಲ್ಲಗ್ ಬನ್ನಗ,ಪಾರ್ವತಿಯಕ್ಕೆ,ತನ್ನ ಜೋಕುಲು,ಅರ್ವತ್ತಲ್ಲು,ಪುಲ್ಯಲ್ಲು ಮಾತ ತೆಲಿಕೆದಿಂಜಿ ಮೋನೆಡ್ ಆರೆನ್ ಎದ್ಕೊಂಡೆರ್.ಒಂಜಾತ್ ದಿನ ಬಂಜಿಗ್ ನುಪ್ಪು ಸೇರಂದೆ ಎತೆಟ್ ಇತ್ತಿನ ಆರೆನ್ ಬಂಜರ ಉನ್ಪವೊಡು ಪಂಡ್ದ್ ಜೋಕುಲು ಸೇರ್ದ್ ತಮ್ಮನೊದ ಅಟ್ಟಿಲ್ ಮಲ್ತ್ ಅಮ್ಮೆರೆಗ್ ಬಲಸ್ಯೆರ್.ವನಸ್ ಮಲ್ತ್‌ಲೆಕಾನೆ ತ್ಯಾಂಪಣ್ಣನ ಕನ್ನ್‌ಡ್ ನೀರ್ ಜತ್ತ್ಂಡ್, ಪಾರ್ವತಿಯಕ್ಕೆ ಐನ್ ಬೂಮಿಗ್ ಮುಟ್ಟೆರೆ ಬುಡ್ಜೆರ್,ತನ್ನ ಸೆರಂಗ್‌ಡ್ ವೊಚ್ಯೆರ್.ಮಾತೆರ್ನ ಮೋನೆ ತೂವೊಂದು ಗಟ್ಟಿ ವೊನಸ್ ಮಲ್ತ್ ಲಕ್ಕ್‌ದ್ ಕೈ ದೆಕ್ಯೆರೆ ಪಿದಯಿ ಬರ್ಪೆರ್,ಆರೆಗೆ ವೊರ ಆಚಿರ.ಮಾದವೆ ಬಾಯಿನೀರ್ ಜಪುಡಾವೊಂದು ಕಾಲಿ ಚಡ್ಡಿಡ್ ಆರ್ನ ಎದುರು ಪಾರೊಂದು ಬರೊಂದುಲ್ಲೆ,ತ್ಯಾಂಪಣ್ಣಗ್ ನೇನ್ ತೂದು ಬಂಜಿಗ್ ಬೀಸತ್ತಿ ಪಾಡಿಲೆಕಾಂಡ್..
ದುಂಬರಿಯುಂಡು
