ಕಟ್ಟ (10)
ಚೇತನ್ ವರ್ಕಾಡಿ
ಗೋಪಾಲಗ್ ಮದ್ಮೆ ಆಪುನೆಕ್ ದುಂಬೇ ಮಾದವಗ್ ಕಲ್ಯಾಣಿಡ ಮನಸಿತ್ತ್ಂಡ್,ಆಲೆ ಪೊರ್ಲುಗ್ ಮರ್ಲಾವಂದಿ ಆನುಲುಪ್ಪಂದ್ ಮೈದಿಂಜಿದ್ ಜಕ್ಕಟ್ ಜವನೆರ್ನ ಉಡಲ್‌ಡ್ ಮೋಕೆದ ಅಜಬಿರು ಬುಡ್ಪಾವುನಂಚಿನ ಪೊರ್ಲೆದಿ ಆಲಾದಿತ್ತಲ್.ಎಂಚೆಂಚಿ ಪೊದು ಬತ್ತ್ಂಡಲ ಕಲ್ಯಾಣಿನ್ ಕೊರ್ಜೆರ್,ಕಡೇಕ್ ಮಾದವೆ ಕೇಂಡಲ ಒತ್ತೊಂಜೆರ್. ಕಲ್ಯಾಣಿನ ಅಮ್ಮೆರೆಗ್ ಮಾದವನ ಕೆಲವೊಂಜಿ ಅಲ್ಕಟ್ ಬುದ್ದಿಲು ದುಂಬೇ ತೆರಿದಿತ್ತಿನೆರ್ದಾವರ ಮಾದವಗ್ ಪೊಣ್ಣು ಕೊರ್ದಿಜ್ಜಂಡ್,ಅವ್ವತ್ತಾಂದೆ ಮಾದವೆ ದುಂಬೇ ಪೋಲಿ ಪೋಕುರಿ ಬುದ್ದಿದಾಯೆ ಅತ್ತಾಂದೆ,ಆಯನ ದುಂಬುದ ಬೊಡೆದಿಯೆ ಆಯನ ಜೂವನ ಕರಿಯೆರೆ ಆವಂದೆ ಬುಡುಗಡೆ ಆಯಿಬೊಕ್ಕ ರಡ್ನೇ ಸಮ್ಮೊಂದೊಗು ಕಲ್ಯಾಣಿನ್ ಕೇಂದಿತ್ತೆ.ಪ್ರಾಯೊಡು ಎಚ್ಚಿಗೆನೆ ಏರ್ ತಗ್ಗ್ ಇತ್ತ್ಂಡಲ ಮಾದವೆ ಕಾಸ್‌ದ ಬಲೊಟು ಗಟ್ಟಿ ಇತ್ತಿನೆಟ್ ಕೊರ್ವೆರ್ ಎನ್ನಿದಿತ್ತೆ,ಆಂಡ ಆಯನ ಆಸೆ ಸುಳ್ಳಾದ್ ಪೋದಿತ್ತ್ಂಡ್.ಕಲ್ಯಾಣಿ ಅಪಗನೆ ಪೊರ್ಲುಡು ಪುಣ್ಣಮೆದ ಬೊಲ್ಪುಲಕ ಮೆನ್ಕೊಂತಲ್.ಕಲ್ಯಾಣಿನ ಅಮ್ಮೆರ್ ಎಡ್ಡೆ ಗುಣೊತ ಆನನ್ ನಾಡೊಂತೆರ್ ,ಅಪಗನೇ ಆರೆಗ್ ತ್ಯಾಂಪಣ್ಣನ ನಿರೆಲ್ಡ್ ಬೆನ್ಪಿ ಗೋಪಾಲಗ್ ಪೊಣ್ಣು ಆವೊಡು ಪನ್ಪಿ ಸಂಗತಿ ತೆರಿನೆ.ದರ್ಮರಾಯಲೆಕಂತಿನ ತ್ಯಾಂಪಣ್ಣನ ಕೈಯಡಿಟ್ ಬೆನ್ಪಿ ಗೋಪಾಲೆಲ ಆರ್ಲೆಕಾನೆ ಎಡ್ಡೆ ಸಂಸ್ಕಾರ ಕಲ್ತಿನಾಯೆ ಆದುಪ್ಪು ಪಂಡ್ದ್ ಕಣ್ಣ್ ಮುಚ್ಚಿದ್ ಮದ್ಮೆ ಮಲ್ತೆರ್.ಆರ್ ಎನ್ನಿನವುಲ ಸತ್ಯ ಆಂಡ್,ಗೋಪಾಲೆ ಬಡಪತ್ತ್‌ದಾಯೆ ಆಂಡಲ ಒಂಜಿ ಪೊಣ್ಣಗ್ ಬಂಗಾರ್ ಬದ್ಕ್ ಕೊರ್ಪಿ ಆನ್ ಆದಿತ್ತೆ. ಮದ್ಮೆ ಆಂಡಲ ಮಾದವಗ್ ಆಲೆನ ಪೊರ್ಲು ರೂಪೊಗು ಮಾಲಿನಾಯಗ್ ಐರ್ದ್ ಪಿರ ಬರ್ಯೆರೆನೆ ಆಯಿಜಿ.ದಿನೊಕುಲು ಏತ್ ಕರಿಂಡಲ ಆಯನ ಅಂಗ್‌ ಅರ್ಬುದ ಅರ್ಕಟ್ ಗಿರಿಜಿ.ಗೋಪಾಲೆ ಇತ್ತಿನೇಟ ಕಲ್ಯಾಣಿನ್ ತನ್ನಾಲ್ ಮಲ್ಪುನ ಆವಂದಿ ಬೇಲೆ ಪಂಡ್ದ್‌ಲ ಆಯಗ್ ತೆರಿದಿತ್ತ್ಂಡ್,ಅಪಗನೆ ಆಯಗ್ ಆಪತ್ತ್‌ಗ್ ತಾಂಗ್ ಕೊರ್ಲೆಕ ತಿಕ್ಕಿನ ಜನೊನೋ ತ್ಯಾಂಪಣ್ಣನ ಕಾಸ ಮೆಗ್ಯೆ ತಿಮ್ಮಪ್ಪಣ್ಣೆ.ಮಾದವಗ್ ಗೋಪಾಲೆ ಅಡ್ಡ ಆದಿತ್ತೆ,ತ್ಯಾಂಪಣ್ಣಡ ಪಗೆ ಇತ್ತ್ಂಡ್,ರಡ್ಡೆಕ್‌ಲ ಆನೆಬಲ ತಿಕಿನಿ ತಿಮ್ಮಪ್ಪಣ್ಣೆ ಕೈ ಪತ್ತ್‌ದಾನಗ.ಕಾಸಪಲಯಡ ತಿಮ್ಮಪ್ಪಣ್ಣಗ್ ದಾಯೆ ಪಗೆ,ಎದುರುಗು ಬಾರಿ ಎಡ್ಡೆ ಆಂಡಲ ಉಲತುಲಯಿಡ್ ಏರೆನಾ ಬುಡ್ದು ಆರ್ ಈತ್ ಮಾತ ಗೊಬ್ಬೊಡೂಂದಾಂಡ ಕಾರಣ ಎಂಚಿನವು ಪನ್ನಗ,ಐಕ್‌ಲ ಕಾರಣೊಲು ಉಲ್ಲ..
